ശ്രീനഗര് : പാക് സൈന്യത്തിന്റേയും വിഘടനവാദികളുടേയും പിന്തുണയില് കശ്മീരില് ഭീകരരെ എത്തിക്കാന് പദ്ധതിയിടുന്നതായി റിപ്പോര്ട്ട്. കശ്മീര് വിഷയവുമായി ബന്ധപ്പെട്ട് ഇമ്രാന് ഖാന് കഴിഞ്ഞ ദിവസം നടത്തിയ പ്രസ്താവന ഉള്ക്കൊണ്ട് പാക് അധീന കശ്മീരിലെ ജമ്മു കശ്മീര് ലിബറേഷന് ഫ്രണ്ട് എന്ന വിഘടനവാദി സംഘടന അതിര്ത്തിയിലേയ്ക്ക് റാലി സംഘടിപ്പിക്കുന്നുണ്ട്. ഇത് മറയാക്കി അതിര്ത്തിയിലേയ്ക്ക് നുഴഞ്ഞു കയറ്റക്കാരെ എത്തിക്കാനാണ് നീക്കം.
പാക് രഹസ്യാന്വേഷണ ഏജന്സിയാണ് ഇതിനു പിന്നില് പ്രവര്ത്തിക്കുന്നതെന്നും റിപ്പോര്ട്ട് പുറത്തുവന്നിട്ടുണ്ട്. ഇതിനെ തുടര്ന്ന് കേന്ദ്ര ആഭ്യന്ത്ര മന്ത്രാലയം പ്രദേശത്തെ സുരക്ഷ ശക്തമാക്കി. എന്തും നേരിടാനുള്ള ഒരുക്കത്തിലാണ് കര-വ്യോമ സേനകള്. മാത്രമല്ല അതിര്ത്തി കടന്നെത്തുന്ന ഒരു ഭീകരനും ജീവനോടെ മടങ്ങിപ്പോകില്ലെന്ന മുന്നറിയിപ്പും അമിത് ഷാ അറിയിച്ചു.
മുസഫറാബാദില് നിന്നും ശ്രീനഗര് ഹൈവേ വഴിയാണ് മാര്ച്ച് ചെയ്യുന്നത്. ജമ്മു കശ്മീര് ലിബറേഷന് ഫ്രണ്ടിന്റെ തലവന് റഫീഖ് ദാറാണ് റാലിയുടെ തലവന്. നിയന്ത്രണ രേഖ കടക്കുമെന്നാണ് ഇവരുടെ ആഹ്വാനമെങ്കിലും ഇവരെ ചകോത്തിയില് തടയുമെന്ന് അധികൃതര് അറിയിച്ചു.
പാക് അധീന കശ്മീരിലുള്ളവര് അതിര്ത്തി കടക്കരുതെന്നും, ഇന്ത്യ അതിനെ ഇസ്ലാമിക ഭീകരവാദമായി കണക്കാക്കുമെന്നും പാക് പ്രധാനമന്ത്രി ഇമ്രാന് ഖാന് കഴിഞ്ഞ ദിവസം മുന്കൂറായി പ്രസ്താവന നടത്തിയിരുന്നു.
അതേസമയം പാക് വിദേശകാര്യമന്ത്രി ഷാ മുഹമ്മദ് ഖുറേഷി കഴിഞ്ഞ ദിവസം പാക് അധീന കശ്മീരിലെത്തിയിരുന്നതായും റിപ്പോര്ട്ടുണ്ട് . ജമ്മു കശ്മീര് ലിബറേഷന് ഫ്രണ്ട് സംഘടിപ്പിക്കുന്ന ഈ റാലി മറയാക്കി ജെയ്ഷെ ഭീകരരെ രാജ്യത്തേക്ക് കടത്താനാണ് ശ്രമം. നേരത്തെ പാക് ചാര സംഘടന ഭീകരരെ ഇന്ത്യയില് എത്തിക്കാന് ശ്രമിക്കുന്നതായി ഇന്ത്യന് രഹസ്യാന്വേഷണ സംഘം വിവരം പുറത്ത് വിട്ടിരുന്നു. ചാവേര് ബോംബാക്രമണ പദ്ധതിയാണ് ആസൂത്രണം ചെയ്യുന്നതെന്നാണ് വിവരം.
