കോഴിക്കോട്: കോടതി ഉത്തരവിനെ വെല്ലുവിളിച്ച് മുത്തൂറ്റ് ഫിനാന്സിന്റെ ഓഫീസുകള്ക്ക് മുന്നിലെ സമരം ശക്തമാക്കി സി.ഐ.ടി.യു. കോഴിക്കോട് മാവൂര് റോഡിലെ ശാഖ തുറക്കാനെത്തിയപ്പോഴാണ് സി.ഐ.ടി.യു പ്രവര്ത്തകര് ബ്രാഞ്ച് മാനേജറെ കൈയേറ്റം ചെയ്യ്തു. സ്ഥാപനം തുറക്കാന് അനുവദിക്കില്ലെന്ന നിലപാടിലാണ് സമരക്കാര് സ്വീകരിച്ചത്. ഇതു മറികടന്നതോടെയാണ് സംഘര്ഷം ഉണ്ടായത്.
കേരളത്തിലെ മുത്തൂറ്റ് ശാഖകള്ക്ക് മുന്നില് സി.ഐ.ടി.യുവിന്റെ നേതൃത്വത്തില് ബലം പ്രയോഗിച്ച് നടത്തുന്ന സമരത്തിനെതിരെ ഇന്നലെ ഹൈക്കോടതി രംഗത്തെത്തിയിരുന്നു. ജോലി ചെയ്യാന് തയാറാകുന്ന എല്ലാ ജീവനക്കാര്ക്കും സര്ക്കാരും പോലീസും സംരക്ഷണം നല്കണം. ജോലിക്ക് വരുന്ന ഒരാളെയും തടയാന് പാടില്ല. ഓഫീസുകള് തുറക്കാതിരിക്കാന് ബലം പ്രയോഗിക്കരുത്. ജീവനക്കാരെ സുഗമമായി പ്രവര്ത്തിക്കാന് അനുവദിക്കണം. ഇതിനായി സര്ക്കാരും പോലീസും സംവിധാനം ഒരുക്കണമെന്നും ഹൈക്കോടതി ഉത്തരവിട്ടിരുന്നു. ഈ ഉത്തരവിനെ വെല്ലുവിളിച്ചാണ് സി.ഐ.ടി.യു ഇന്ന് രംഗത്തെത്തിയത്.
നേരത്തെ, സിഐടിയു സമരത്തെ തുടര്ന്ന് കേരളത്തിലെ 15 ശാഖകള് കൂടി പൂട്ടുന്നതായി മുത്തൂറ്റ് ഫിനാന്സ് പരസ്യം നല്കിയിരുന്നു. ഇതിനെ തുടര്ന്ന് ഇവിടെ ജോലി ചെയ്തിരുന്ന ജീവനക്കാരാണ് ഹൈക്കോടതിയെ സമീപിച്ചത്. ഇതേ തുടര്ന്നാണ് സമരം നടക്കുന്ന 16 ശാഖകള്ക്ക് പോലീസ് സംരക്ഷണം ഉറപ്പാക്കാന് ഹൈക്കോടതി നിര്ദേശിച്ചിരിക്കുന്നത്. സിഐടിയുവിന്റെ നേതൃത്വത്തില് സമരം തുടരുന്നതിനിടെയാണ് ശാഖകള് പൂട്ടുന്നതായുള്ള പരസ്യം പ്രത്യക്ഷപ്പെടുന്നത്. കഴിഞ്ഞ ദിവസം എറണാകുളത്തെ മുത്തൂറ്റ് ഫിനാന്സിന്റെ ശാഖയില് എത്തിയ ജീവനക്കാരെ സിഐടിയു തടഞ്ഞിരുന്നു.
സംഭവ സ്ഥലത്തെത്തിയ ഉടമ ജോര്ജ് അലക്സാണ്ടര് മുത്തൂറ്റിനേയും സമരക്കാര് തടഞ്ഞുവെക്കുകയും സംഘര്ഷാവസ്ഥ ഉടലെടുക്കുകയും പോലീസ് എത്തി നിയന്ത്രിക്കുകയുമായിരുന്നു. സമരം മറികടന്ന് ജോലിയില് പ്രവേശിക്കാന് ശ്രമിച്ച് ജീവനക്കാര് രാവിലെ മുതല് മൂത്തൂറ്റ് ഓഫീസിന് മുന്നില് എത്തിയപ്പോള് സിഐടിയു പ്രവര്ത്തകര് അവരെ തടയുകയായിരുന്നു. അതാണ് സംഘര്ഷത്തിലേക്ക് എത്തിയത്. അതിനു പിന്നാലെയാണ് ശാഖകള് പൂട്ടുന്നതായി അറിയിച്ചത്.
