തിരുവനന്തപുരം: പ്രസിദ്ധമായ അമ്പലപ്പുഴ പാല്പ്പായസത്തിന്റെ പേര് ദുരുപയോഗം ചെയ്തതില് മാപ്പ് പറഞ്ഞ് തോംസണ് ബേക്കറി. ബേക്കറിക്കെതിരെ നിയമനടപടി സ്വീകരിക്കുമെന്ന് ദേവസ്വം ബോര്ഡ് വ്യക്തമാക്കിയതോടെയാണ് ബേക്കറി ഉടമകള് മാപ്പ് പറഞ്ഞത്. അമ്പലപ്പുഴ പാല്പ്പായസം പേര് തെറ്റായി ലേബല് ചെയ്തിരിക്കുന്ന തെറ്റില് ഖേദിക്കുന്നുവെന്നും അതിന് ക്ഷമ ചോദിക്കുന്നുവെന്നും ആരെയും വേദനിപ്പിക്കാന് തങ്ങള് ഒരിക്കലും ഉദ്ദേശിച്ചിട്ടില്ലെന്നും തോംസണ് ബേക്കറി ഉടമകള് ഇറക്കിയ മാപ്പ് അപേക്ഷയില് പറയുന്നു. തിരുവല്ല കടപ്പറ ജോളി ഫുഡ് പ്രോഡക്ട്സ് ആണ് തങ്ങളുടെ ഉടമസ്ഥതയിലുള്ള തോംസണ് ബേക്കറിയില് ദിവസങ്ങളായി അമ്പലപ്പുഴ പാല്പ്പായസം വിറ്റു വന്നത്. ഇത് സംബന്ധിച്ച പരാതി ലഭിച്ചതിനെ തുടര്ന്ന് ഹരിപ്പാട് ഡെപ്യൂട്ടി ദേവസ്വം കമ്മീഷണറുടെ നിര്ദ്ദേശപ്രകാരം അമ്പലപ്പുഴ ശ്രീകൃഷ്ണസ്വാമി ക്ഷേത്രത്തിലെ ഉദ്യോഗസ്ഥര് ബേക്കറിയിലെത്തി പാല്പ്പായസം ആവശ്യപ്പെട്ടിരുന്നു.
ആദ്യം അമ്പലപ്പുഴ പാല്പ്പായസം നല്കാന് വിസമ്മതിച്ച ബേക്കറി ജീവനക്കാര് പിന്നീട് 175 രൂപ വില ഈടാക്കി പായസം നല്കി. ഇക്കാര്യം സംബന്ധിച്ച് വിജിലന്സും പരിശോധന നടത്തി തട്ടിപ്പ് മനസ്സിലാക്കി. തുടര്ന്ന് വിഷയം ദേവസ്വം ബോര്ഡിന്റെ ശ്രദ്ധയില്പ്പെടുത്തുകയായിരുന്നു. തിരുവിതാംകൂര് ദേവസ്വം ബോര്ഡിന്റെ അമ്പലപ്പുഴ ക്ഷേത്രത്തില് തയ്യാറാക്കി ക്ഷേത്രത്തിലെ കൗണ്ടറിലൂടെ മാത്രം ഭക്തര്ക്ക് വിതരണം ചെയ്ത് വരുന്ന ചരിത്രപ്രസിദ്ധമായ പായസം ഭക്തരെ തെറ്റിദ്ധരിപ്പിച്ചാണ് വിറ്റതെന്ന് അന്വേഷണത്തില് കണ്ടെത്തിയിരുന്നു. തുടര്ന്നാണ് തിരുവല്ല തോംസണ് ബേക്കറി ഉടമക്കെതിരെ നിയമനടപടി സ്വീകരിക്കാന് ഹരിപ്പാട് ഡെപ്യൂട്ടി ദേവസ്വം കമ്മീഷണറെ ദേവസ്വം പ്രസിഡന്റ് എ.പത്മകുമാര് ചുമതലപ്പെടുത്തിയത്. ഇതനുസരിച്ച് ആലപ്പുഴ എസ്പി, അമ്പലപ്പുഴ പോലീസ് എന്നിവര്ക്ക് ദേവസ്വം ബോര്ഡ് പരാതിനല്കിയതായി ഡെപ്യൂട്ടി കമ്മീഷണര് പറഞ്ഞു.
500മില്ലിലിറ്റര് അമ്പലപ്പുഴ പാല്പ്പായസം എന്ന പേരില് 175 രൂപ വാങ്ങിയാണ് ബേക്കറി ജീവനക്കാര് വില്പ്പന നടത്തിയത്. കൂടാതെ സ്വകാര്യ ബേക്കറിയില് അമ്പലപ്പുഴ പാല്പ്പായസ വില്പ്പന എന്ന് തരത്തില് വാര്ത്തകള് സോഷ്യല് മീഡിയയിലൂടെയും വാട്സ് അപ് സന്ദേശങ്ങള് വഴിയും വ്യാപകമായ പ്രചരിപ്പിക്കുകയും ചെയ്തിട്ടുണ്ട്. തിരുവിതാംകൂര് ദേവസ്വംബോര്ഡിന്റെ വരുമാനങ്ങളിലൊന്നായ അമ്പലപ്പുഴപാല്പ്പായസ വില്പ്പനയെ തകര്ക്കാനും അമ്പലപ്പുഴ ശ്രീകൃഷ്ണ സ്വാമി ക്ഷേത്രത്തിന്റെ പ്രസിദ്ധിക്ക് കോട്ടം വരുത്താനുമുള്ള ചിലകേന്ദ്രങ്ങളില് നിന്നുള്ള ഗൂഢനീക്കമാണ് ഇത്തരം പ്രവര്ത്തനങ്ങള്ക്ക് പിന്നിലെന്ന് സംശയിക്കേണ്ടിയിരിക്കുന്നുവെന്ന് ദേവസ്വം ബോര്ഡ് പ്രസിഡന്റ് അഭിപ്രായപ്പെട്ടു. ഇതിനെതിരെ നിയമനടപടി തുടങ്ങിയെന്ന് ബോര്ഡ് പ്രസിഡന്റ് എ. പദ്മകുമാര് അറിയിച്ചു. ഇതോടെയാണ് ബേക്കറി ഉടമകള് മാപ്പ് പറഞ്ഞത്.
