ന്യൂദല്ഹി : ട്രാഫിക് നിയമം ലംഘിച്ച ഇരു ചക്ര യാത്രികന് പിഴ നല്കിയത് സ്കൂട്ടര് വാങ്ങിയതിനേക്കാള് കൂടിയ നിരക്ക്. ദല്ഹി സ്വദേശിയായ ദിനേശ് മദനാണ് ട്രാഫിക് നിയമം ലംഘിച്ചതിന് കഴിഞ്ഞ ദിവസം 23,000 രൂപ ഗുരുഗ്രാം പോലീസ് പിഴ ചുമത്തിയത്. ദിനേശ് നടത്തിയ നടത്തിയ വിവിധ നിയമലംഘനങ്ങള്ക്ക് ഒന്നിച്ച് പിഴയിട്ടപ്പോഴാണ് ഇത്രയും വലിയ തുക ആയത്.
കേന്ദ്ര മോട്ടോര് വാഹന നിയമ ഭേദഗതി പ്രകാരം ഈ മാസം ഒന്നുമുതല് പിഴ കുത്തനെ ഉയര്ത്തിയിരുന്നു. ഇതനുസരിച്ച് ഹെല്മറ്റില്ലാതെ വണ്ടിയോടിച്ചതിനൊപ്പം ഡ്രൈവിങ് ലൈന്സന്സ്, ആര്സി, തേഡ് പാര്ട്ടി ഇന്ഷുറന്സ്, എയര് പൊലൂഷന് സര്ട്ടിഫിക്കറ്റ് എന്നീ രേഖകളൊന്നും കൈവശം ഉണ്ടാകാതിരുന്നതിനെ തുടര്ന്നാണ് ഇത്രയും തുക പിഴ ഈടാക്കിയിരിക്കുന്നത്. 23000 രൂപ പിഴ ചേര്ത്ത ചലാന് പോലീസ് ഡ്രൈവര്ക്ക് കൈമാറി.
ലൈസന്സിന്റേയും, വാഹന രജിസ്ട്രേഷന് സര്ട്ടിഫിക്കറ്റിന്റേയും പകര്പ്പ് കൈവശം വെയ്ക്കാത്തതിന് 5,000 രൂപ വീതവും, ഇന്ഷുറന്സിന് ഇല്ലാത്തതിന് 10,000 രൂപ, പൊല്യൂഷന് സര്ട്ടിഫിക്കറ്റ് ഇല്ലാത്തതിന് 1000 എന്നിങ്ങനെയാണ് 23,000 രുപ പിഴ ഇട്ടത്. അതേസമയം തന്റെ സ്കൂട്ടറിന്റെ വില വെറും 15,000 രൂപ മാത്രമാണ്. അതിനേക്കാള് വലിയ തുകയാണ് പിഴ ചുമത്തിയതെന്നും ദിനേശ് ആരോപിച്ചു.
കൂടാതെ വാഹനത്തിന്റെ നിയമപരമായ രേഖകളെല്ലാം വീട്ടിലുണ്ടെന്നും എന്നാല് പരിശോധനയ്ക്കിടെ ഇവയെല്ലാം വാട്സ്ആപ്പ് ചെയ്ത് തരാമെന്ന് അറിയിച്ചെങ്കിലും പോലീസ് അത് നിരസിക്കുകയായിരുന്നു എന്നും അറിയിച്ചു. കുടാതെ വണ്ടിയുടെ താക്കോല് നല്കാന് പോലീസ് ആവശ്യപ്പെട്ടപ്പോള് അത് നല്കാതിരുന്നതോടെ 23,000 രൂപയുടെ ചെല്ലാന് അടിച്ചുകൈയില് തന്നെന്നും ദിനേശ് പറഞ്ഞു.
