ന്യൂദല്ഹി: രാജ്യത്തെ ധനകാര്യ മേഖലയില് വന് പ്രഖ്യാപനങ്ങളുമായി കേന്ദ്ര ധനകാര്യമന്ത്രി നിര്മല സീതാരാമന്. രാജ്യത്തെ പ്രമുഖങ്ങളായ പൊതുമേഖല ബാങ്കുകളെ ലയിപ്പിക്കാന് തീരുമാനം. നാലു ഘട്ടങ്ങളിലാണ് ലയനം. പഞ്ചാബ് നാഷനല് ബാങ്ക്, ഓറിയന്റല് ബാങ്ക്, യുണൈറ്റഡ് ബാങ്ക് എന്നിവയെ ലയിപ്പിക്കും. 17.95 ലക്ഷം കോടിയുടെ ബിസിനസുള്ള ഏറ്റവും വലിയ രണ്ടാമത്തെ പൊതുമേഖലാ ബാങ്കാക്കി ഇതിനെ മാറ്റുകയാണു ലക്ഷ്യം. കാനറ, സിന്ഡിക്കേറ്റ് ബാങ്കുകളും ലയിപ്പിച്ച് നാലാമത്തെ വലിയ പൊതുമേഖലാ ബാങ്കിന് രൂപം നല്കും. ഇന്ത്യന് ബാങ്ക്, അലഹബാദ് ബാങ്ക് എന്നിവ ഒന്നാകും. യൂണിയന്, കോര്പ്പറേഷന്, ആന്ധ്രാ ബാങ്കുകളും ഒന്നാകും. ഇതോടെ രാജ്യത്തെ പൊതുമേഖല ബാങ്കുകളുടെ എണ്ണം 27ല് നിന്ന് 12 ആയി കുറയും. ബാങ്കിങ് മേഖലയ്ക്ക് ഊന്നല് നല്കിയായിരുന്നു ധനമന്ത്രിയുടെ പ്രഖ്യാപനങ്ങള്. ബാങ്കിങ് മേഖലയെ ഇനിയും ശക്തിപ്പെടുത്തും. കിട്ടാക്കടം കുറഞ്ഞു. 18 പൊതുമേഖലാ ബാങ്കുകളില് 14 ഉം പ്രവര്ത്തിക്കുന്നതു ലാഭത്തിലാണ്. ബാങ്ക് ലയനവും ധനമന്ത്രി പ്രഖ്യാപിച്ചു. ലയനം പൂര്ത്തിയായിക്കഴിഞ്ഞാല് പൊതുമേഖലയില് 12 ബാങ്കുകള് മാത്രമായിരിക്കും രാജ്യത്ത് ഉണ്ടായിരിക്കുക.
ആഗോള സാന്നിധ്യമുള്ള വലിയ ബാങ്കുകളാണു ലക്ഷ്യം. വന് വായ്പകള് നല്കുന്നതിന് പ്രത്യേക ഏജന്സി രൂപികരിക്കും. ഇവയുടെ തിരിച്ചടവു നിരീക്ഷിക്കുന്നതിനു പ്രത്യേക സംവിധാനം ഏര്പ്പെടുത്തും. 250 കോടി രൂപയിലേറെയുള്ള വായ്പകള് ഈ ഏജന്സിയുടെ ചുമതലയായിരിക്കുമെന്നും ധനമന്ത്രി പറഞ്ഞു.ഭവന വായ്പാ മേഖലയിലേക്കു 3,300 കോടി രൂപയുടെ സഹായം പ്രഖ്യാപിച്ചിട്ടുണ്ട്.
