നവി മുംബൈ: സീവുഡ്സ് മലയാളി സമാജവും ഏഷ്യയിലെ തന്നെ ഏറ്റവും വലിയ റെയിൽവേ സ്റ്റേഷൻ കോംപ്ലക്സുകളിലൊന്നായ സീവുഡ്സ് ഗ്രാന്ദ് സെൻട്രൽ മാളും കൈകോർത്ത് ഭീമൻ പൂക്കളവും കലാസാംസ്കാരിക പരിപാടികളും സംഘടിപ്പിക്കുന്നു. ഓഗസ്റ്റ് 31ന് രാവിലെ പത്തര മുതൽ ഭീമൻ പൂക്കളവും സീവുഡ്സ് ഗ്രാൻഡ് സെൻട്രൽ മാളിന്റെ അകത്തളത്തിൽ ഒരുങ്ങും. അന്ന് വൈകിട്ട് നാലര മുതൽ ഒമ്പതര വരെ വിവിധ കലാപരിപാടികളും മാളിൽ അരങ്ങേറും.
ഓണത്തിന്റെ ഐതിഹ്യങ്ങളെ ആസ്പദമാക്കി ഒരുക്കുന്ന ഓണം ഓപ്പുലൻസ് എന്ന കലാസന്ധ്യയിൽ മെഗാപ്പൂക്കളത്തിന് പുറമേ കഥകളി, തെയ്യം, മാവേലിത്തമ്പുരാന്റെ സന്ദർശനം, ചെണ്ടമേളം, തിരുവാതിരക്കളി, മോഹിനിയാട്ടം, മാർഗംകളി, ഒപ്പന എന്നിവയുണ്ടാകും. വാമനൻ തുടങ്ങിയ വേഷങ്ങളും കലാസന്ധ്യയിൽ അണി നിരക്കും.
ഓണത്തെയും കേരള സംസ്കാരത്തെയും അന്യസംസ്ഥാനക്കാർക്ക് പരിചിതമാക്കുന്ന രീതിയിലാണ് ഓണം ഓപ്പുലൻസ് ഒരുക്കിയിരിക്കുന്നത്. സീവുഡ്സ് സമാജം കഴിഞ്ഞ വർഷം ഗ്രാൻഡ് സെൻട്രൽ മാളിൽ ഭീമൻ പൂക്കളമൊരുക്കി പ്രളയബാധിതയായ കേരളത്തിന് കൈത്താങ്ങാകാൻ മുന്നിട്ടിറങ്ങി വന്നിരുന്നു. കേരളത്തിന്റെ സംസ്കാരിക വൈവിധ്യത്തെ വിളിച്ചോതുന്ന രീതിയിലാണ് പരിപാടികൾ ആസൂത്രണം ചെയ്തിരിക്കുന്നത്.
റെക്കോഡിനരികെ എത്തുന്ന പൂക്കളമൊരുക്കുന്നത് സീവുഡ്സ് സമാജത്തിന്റെ നൂറിൽപ്പരം വരുന്ന കലാകാരന്മാരാണ്. മുംബൈയിൽ ശ്രദ്ധേയമായ പ്രവർത്തനങ്ങൾ ചെയ്യുന്ന സമാജങ്ങളിലൊന്നായ സീവുഡ്സ് മലയാളി സമാജം. ഇത് മൂന്നാം തവണയാണ് മെഗാപ്പൂക്കളമൊരുക്കുന്നത്.
വിവരങ്ങൾക്ക് പി.ജി.ആർ നായർ 9665982686
