ന്യൂദല്ഹി: പ്രധാനമന്ത്രിയുടെ ക്ഷണം സ്വീകരിച്ച് ഇസ്രായേല് പ്രധാനമന്ത്രി ബെഞ്ചമിന് നെതന്യാഹു ഇന്ത്യയിലേക്ക്. സെപ്റ്റംബര് എട്ടിന് ഇസ്രായേലില് രാജ്യത്ത് തിരഞ്ഞെടുപ്പ് പ്രചാരണത്തിനിടയിലാണ് ഇന്ത്യയിലേക്ക് നെതന്യാഹു വരുന്നത്. എ.ഡബ്ല്യു.എ.സി.എസ് സങ്കേതിക വിദ്യ മുതല് ആയുധം, കൃഷി, ജലം, മാലിന്യ നിര്മാര്ജനം എന്നീ വിഷയങ്ങളെ കുറിച്ചും ചര്ച്ചചെയ്യുമെന്നാണ് റിപ്പോര്ട്ട്. രണ്ടാഴ്ചത്തേക്ക് നെതന്യാഹു ഇന്ത്യയില് ഉണ്ടാകുമെന്നാണ് പ്രതീക്ഷ. ഇതിന്റെ ഭാഗമായുള്ള ചര്ച്ചകള് പൂര്ത്തിയാക്കാന് ഇസ്രായേല് മധ്യസ്ഥ സംഘം സെപ്റ്റംബര് രണ്ടിന് ഇന്ത്യയിലെത്തും. സെപ്റ്റംബര് 17 ന് ഇസ്രായേലില് പൊതു തിരഞ്ഞെടുപ്പ് നടക്കാനിരിക്കെ ഇന്ത്യാ സന്ദര്ശനം നെതന്യാഹുവിനെ സംബന്ധിച്ചിടത്തോളം നിര്ണായകമാണ്.
ഇസ്രായേലില് നിന്ന് വ്യോമാക്രമണങ്ങളെ മുന്കൂട്ടി കണ്ട് പ്രതിരോധിക്കാനുള്ള എയര്ബോണ് ഏര്ലി വാണിങ് ആന്ഡ് കണ്ട്രോള് സിസ്റ്റ(അവാക്സ്)ത്തിന്റെ രണ്ട് യൂണിറ്റുകള് വാങ്ങാനുള്ള കരാറാണ് ഇതിലൊന്ന്. വ്യോമാക്രമണത്തിന് ഉപയോഗിക്കുന്ന എയര് ടു എയര് മിസൈലായ ഡെര്ബിയുടെ പരിഷ്കരിച്ച പതിപ്പ് വാങ്ങാനുള്ളതാണ് മറ്റൊന്ന്.
ഇന്ത്യയുടെ പക്കല് നിലവില് അഞ്ച് അവാക്സ് സംവിധാനമാണ് ഉള്ളത്. റഷ്യന് നിര്മിത എ50, ഇസ്രായേലിന്റെ ഫാല്കണ് എന്നിവയാണ് അവ. ഇതിനൊപ്പമാണ് രണ്ടെണ്ണം കൂടി വാങ്ങാനൊരുങ്ങുന്നത്. 200 കോടി ഡോളറിന്റേതാണ് ഇടപാട്. പാകിസ്താന് നിലവില് സ്വീഡിഷ്, ചൈനീസ് നിര്മിതമായ ഏഴ് അവാക്സ് വിമാനങ്ങളുണ്ട്. ഇതിന് പുറമെ മൂന്നെണ്ണം കൂടി ചൈനയില് നിന്ന് വാങ്ങാനാണ് പാകിസ്താന്റെ പദ്ധതി.
ബാലാകോട്ട് ആക്രമണത്തിന് പിന്നാലെ ഫെബ്രുവരി 27 ന് പാകിസ്താന് നടത്തിയ വ്യോമാക്രമണ നീക്കത്തില് പാക് വ്യോമസേന 70 കിലോമീറ്റര് പരിധിയുള്ള എ.ഐ.എം 120 സി മിസൈല് പ്രയോഗിച്ചിരുന്നു. സമാനമായി ഇന്ത്യയുടെ പക്കലുള്ള മിസൈലിന് അത്രയും പ്രഹര പരിധിയില്ല. 70 കിലോമീറ്റര് ആക്രമണ പരിധിയുള്ള ഡെര്ബി മിസൈല് വാങ്ങാനാണ് ഇന്ത്യ പദ്ധതിയിടുന്നത്. സുഖോയ് 30എം.കെ.ഐ വിമാനത്തില് ഘടിപ്പിക്കാനായാണ് ഇവ വാങ്ങുന്നത്. ഇതിനായുള്ള ചര്ച്ചകളും നെതന്യാഹുവിന്റെ സന്ദര്ശനത്തില് നടക്കുമെന്നാണ് പുറത്തുവരുന്ന റിപ്പോര്ട്ടുകള്.
