അരുന്ധത്യനസൂയ ച സാവിത്രീ ജാനകീ സതീ
ദ്രൗപദീ കണ്ണകീ ഗാര്ഗീ മീരാ ദുര്ഗാവതീ തഥാ
മിഥിലാധിപനായ ജനകരാജര്ഷിയുടെ പുത്രിയും മര്യാദാപുരുഷോത്തമനായ ശ്രീരാമചന്ദ്രന്റെ ധര്മപത്നിയുമായ ജാനകി പാതിവ്രത്യത്തിന്റെ അനുപമ ആദര്ശമാണ്. ജീവിതത്തില് സീതാദേവിക്ക് കഠിനപരീക്ഷണങ്ങളും ദു:ഖങ്ങളുമാണ് നേരിടേണ്ടി വന്നത്. എന്നാല് അചഞ്ചലമായ പാതിവ്രത്യബലത്താല് ആ സാധ്വി സകല പ്രതികൂല സാഹചര്യങ്ങളേയും ധൈര്യപൂര്വം സന്തോഷത്തോടു കൂടി നേരിട്ടു. തന്റെ ഭര്ത്താവിനൊപ്പം വനവാസത്തിലെ ഓരോ കഷ്ടതകളും ആനന്ദപൂര്വം സഹിച്ചു. രാക്ഷസരാജാവായ രാവണനും ആ മനോബലത്തിനു മുന്നില് പരാജയപ്പെട്ടു. അഗ്നി പരീക്ഷ നടത്തിക്കൊണ്ട് സീതാദേവി ചാരിത്ര്യശുദ്ധിയും സ്വഭാവനൈര്മല്യവും തെളിയിച്ചു. ശ്രീരാമന് വനവാസത്തിനു ശേഷം പ്രജാഹിതമനുസരിച്ച് സീതയെ പരിത്യജിച്ചപ്പോള് അവര് വാല്മീകി മഹര്ഷിയുടെ ആശ്രമത്തില് അഭയം തേടി. സീതാദേവിയുടെ പാതിവ്രത്യത്തെയും ചാരിത്ര്യത്തേയും കുറിച്ച് എല്ലാവര്ക്കും പൂര്ണബോധ്യം വന്നപ്പോള് ആ ഭൂമിപുത്രി ഭൂമിയെപ്പോലെ സഹനശീലയായി പേരിനെ അന്വര്ഥമാക്കി.
(ഹോ. വെ. ശേഷാദ്രിയുടെ ‘ഏകാത്മതാസ്തോത്രം’ വ്യാഖ്യാനത്തില് നിന്ന്)
