ന്യുദല്ഹി: കോണ്ഗ്രസ് ഭരണകാലത്താണ് ലഡാക്കിനു നാശനഷ്ടം സംഭവിച്ചതെന്ന് ബിജെപി എംപി ജമിയാങ് സെറിംഗ് നംഗ്യാല്. പ്രതിരോധ നയങ്ങളില് ഈ പ്രദേശത്തിന് ശരിയായ പ്രാധാന്യം ലഭിച്ചിക്കാതതു കൊണ്ടാണ് ചൈന ഡെംചോക്ക് മേഖല വരെ പിടിച്ചെടുത്തതെന്നും അദേഹം വ്യക്തമാക്കി. ആര്ട്ടിക്കിള് 370 നെക്കുറിച്ച് ലോക്സഭയില് നടത്തിയ ആവേശപൂര്വമായ പ്രസംഗം കൊണ്ട് പ്രശസ്തി നേടിയ പാര്ലമെന്റ് അംഗംകൂടിയായ നംഗ്യാല് മുന് കോണ്ഗ്രസ് സര്ക്കാരുകള് കശ്മീരിനെ നശിപ്പിച്ചതായി ആരോപിച്ചു. പ്രതികൂല സാഹചര്യങ്ങളിലും സമാധാന നയം സ്വീകരിച്ചതാണ് ലഡാക്കിനെ നശിപ്പിച്ചത്.
കശ്മീരിലെ സ്ഥിതി പ്രതികൂലമാകുമ്പോഴെല്ലാം അത് സമാധാനിപ്പിക്കാനുള്ള നയമാണ് സര്ക്കാരുകള് പിന്തുടര്ന്നത്. ഇത് ഒരിക്കലും കര്ശനമായി കൈകാര്യം ചെയ്തിട്ടില്ലെന്നും നംഗ്യാല് വാര്ത്താ ഏജന്സിയോട് പറഞ്ഞു. കശ്മീരില് സ്ഥിതിഗതികള് രൂക്ഷമാകുമ്പോഴെല്ലാം പ്രത്യേക പാക്കേജുകള് പ്രഖ്യാപിച്ച് കോണ്ഗ്രസ് കോപം ശമിപ്പിക്കാന് ശ്രമിച്ചു. ഇത് കല്ലെറിയുന്നവരെ സന്തോഷിപ്പിക്കുകയും വിഘടനവാദികള്ക്ക് സംരക്ഷണം നല്കുകയും ചെയ്തെന്നും അദ്ദേഹം വ്യക്തമാക്കി. നയമോ ഉദ്ദേശ്യമോ ശരിയല്ലാത്തതുകാരണമാണ് കശ്മീര് നശിച്ചതെന്നും അദേഹം പറയുന്നു.
മുന് പ്രധാനമന്ത്രി ജവഹര്ലാല് നെഹ്റു നമ്മുടെ പ്രദേശത്തേക്കുള്ള ചൈനീസ് നുഴഞ്ഞുകയറ്റത്തിനെതിരെ ആവിഷ്കരിച്ച പോളിസിയുടെ അപാകതകളും നംഗ്യാല് ചൂണ്ടികാട്ടി. ഇഞ്ചോടിഞ്ചായി ചൈനയുടെ നേര്ക്കു പോകുക എന്ന ഉദ്ദേശത്തോടെയാണ് ജവഹര്ലാല് നെഹ്റു ‘മുന്നോക്ക നയം’ രാജ്യത്തിനു വേണ്ടി ഉണ്ടാക്കിയത്. എന്നാല് നടപ്പാക്കിയപ്പോള് ഇതൊരു ‘പിന്നോക്ക നയം’യായി മാറി. അതുകൊണ്ടാണ് അക്സായി ചിന് പൂര്ണ്ണമായും ചൈനയുടെ കീഴിലായത്. പീപ്പിള്സ് ലിബറേഷന് ആര്മി ഉദ്യോഗസ്ഥര് ഡെംചോക്കിന്റെ ‘നള്ളഹ്’ വരെ എത്തിയിട്ടുണ്ട്, കാരണം 55 വര്ഷത്തെ കോണ്ഗ്രസ് ഭരണത്തില് പ്രതിരോധ നയങ്ങളില് ലഡാക്കിന് ശരിയായ പ്രാധാന്യം കിട്ടിയിട്ടില്ല. ഡെംചോക്കിനടുത്തുള്ള സ്വന്തം പ്രദേശത്ത് ഇന്ത്യ ഒരു കനാല് നിര്മ്മിക്കുന്നതിനെ പീപ്പിള്സ് ലിബറേഷന് ആര്മി എതിര്ത്തതിനെ തുടര്ന്ന് കഴിഞ്ഞ ജൂലൈയില് ചൈനീസ്, ഇന്ത്യന് സൈനികര് ഏറ്റുമുട്ടല് നടത്തിയിരുന്നു.
