കോട്ടയം: ഇറാഖിലെ ഐഎസ് തടവറയില് നിന്ന് മലയാളികള് ഉള്പ്പെടെ 46 നഴ്സുമാര് ഉയിരോടെ തിരിച്ചെത്തിയതിന് കളമൊരുക്കിയത് വിദേശകാര്യ മന്ത്രിയായിരുന്ന സുഷമ സ്വരാജിന്റെ ഉറക്കമൊഴിച്ചുള്ള നയതന്ത്ര നീക്കങ്ങള്. ജീവന് മാത്രം കൈയില് പിടിച്ച് അവര് വിമാനമിറങ്ങിയപ്പോള് ഏറെ ആശ്വാസിച്ചത് കോട്ടയം ജില്ലയായിരുന്നു. നഴ്സുമാരില് 16 പേര് കോട്ടയത്ത് നിന്നുള്ളവരാണ്. അവരുടെ കുടുംബങ്ങളെല്ലാം സുഷമ സ്വരാജിന്റെ ആകസ്മിക വേര്പാടില് ദുഃഖിതരാണ്.
2014ല് ഏറെ ഉദ്വേഗജനകമായ സംഭവങ്ങള്ക്ക് ഒടുവിലാണ് ഭീകരരുടെ തടവറയില് നിന്ന് നഴ്സുമാരെ മോചിപ്പിച്ചത്. ഐഎസ് തടവറയില് നഴ്സുമാര് അനുഭവിച്ച നരകയാതനകള് അനാവരണം ചെയ്ത ടേക്ക് ഓഫ് എന്ന സിനിമയ്ക്ക് അന്നത്തെ നയതന്ത്ര നീക്കങ്ങളും ഇതിവൃത്തമായി. ഇന്നും ചുരുളഴിയാത്ത നയതന്ത്ര രഹസ്യങ്ങളാണ് കലാപ കലുഷിതമായ ഇറാഖില് നിന്ന് നഴ്സുമാരെ രക്ഷപ്പെടുത്താന് സഹായകമായത്. ഇന്ത്യന് എംബസി പോലും അന്നവിടെ പ്രവര്ത്തിച്ചിരുന്നില്ല. ഇറാഖില് നിന്ന് വിമാനങ്ങളൊന്നും സര്വീസും നടത്തിയിരുന്നില്ല. ഇത്തരമൊരു അവസ്ഥയിലാണ് പ്രത്യേക വിമാനം അയച്ച് 46 നഴ്സുമാരെയും ഒരു പോറല് പോലും ഏല്പ്പിക്കാതെ മാതൃരാജ്യത്ത് എത്തിച്ചത്. ഇതിന് പിന്നില് ദൃഢനിശ്ചയത്തോടെയുള്ള സുഷമയുടെ പ്രവര്ത്തനമായിരുന്നു.
മൂന്ന് ദിവസത്തോളം ഉറക്കമൊഴിച്ച് പ്രവര്ത്തിച്ചതിനു ശേഷമാണ് നഴ്സുമാരെ രക്ഷിച്ചെടുക്കാനുള്ള വഴി തെളിഞ്ഞത്. നയതന്ത്ര ചര്ച്ചകള്ക്കൊടുവില് പ്രത്യേക വിമാനം ഇറാഖിലേക്ക് അയയ്ക്കാന് തീരുമാനമായി. വിമാനത്തില് കേരളത്തില് നിന്നുള്ള രണ്ട് ഉന്നത ഉദ്യോഗസ്ഥരെ കൊണ്ടുപോകാനും അനുമതി നല്കി. ഇതനുസരിച്ച് എയര് ഇന്ത്യയുടെ പ്രത്യേക വിമാനം നഴ്സുമാരെ കൊണ്ടുപോകാന് ഇറാഖ് ലക്ഷ്യമിട്ട് പറന്നു. അര്ധരാത്രിയില് ഇറാഖിന് മുകളില് വട്ടമിട്ടു പറന്ന വിമാനത്തിന് വിമാനത്താവളത്തില് ഇറങ്ങാന് അനുമതി ലഭിച്ചില്ല. വിമാനത്തിലുണ്ടായിരുന്ന കേരള സര്ക്കാര് പ്രതിനിധി ഗ്യാനേഷ് കുമാര് മുഖ്യമന്ത്രിയായിരുന്ന ഉമ്മന്ചാണ്ടിയെ വിളിച്ച് ഇക്കാര്യം ധരിപ്പിച്ചു. അപ്പോള് സമയം രാത്രി ഒന്നര. രണ്ടാമതൊന്ന് ആലോചിക്കാതെ ഉമ്മന്ചാണ്ടി വിളിച്ചത് വിദേശകാര്യമന്ത്രി സുഷമ സ്വരാജിനെ തന്നെ. അങ്ങേത്തലയ്ക്കല് ഫോണ് എടുത്ത അവര് മുന്കൂട്ടി നിശ്ചയിച്ചത് പോലെ കാര്യങ്ങള് നടക്കുമെന്ന് ഉറപ്പിച്ച് പറഞ്ഞു. തുടര്ന്ന് പതിനഞ്ച് മിനിറ്റിനുള്ളില് തന്നെ പ്രശ്നം പരിഹരിച്ചതായി ഉമ്മന്ചാണ്ടിക്ക് വിദേശകാര്യമന്ത്രിയുടെ ഫോണ്കോളെത്തി.
ഇറങ്ങാന് അനുമതി ലഭിക്കാതെ വന്നതോടെ പ്രതീക്ഷകളെല്ലാം അസ്തമിക്കുന്ന അവസ്ഥയിലായിരുന്നു. വിമാനം മടങ്ങാനൊരുങ്ങവെയാണ് സുഷമയുടെ ചടുലമായ നീക്കങ്ങളിലൂടെ വിമാനത്തിന് ലാന്ഡിങ്ങിനുള്ള അനുമതി നേടി നഴ്സുമാരെയും കൊണ്ട് കേരളത്തിലേക്ക് പറന്നുയരാനായത്. ഇറാഖില് നിന്ന് വിമാനം ടേക്ക് ഓഫ് ചെയ്തെന്നറിഞ്ഞതോടെ നാടൊന്നാകെ നെടുവീര്പ്പിട്ടു. ഈ സന്ദര്ഭങ്ങള് രക്ഷപ്പെട്ടെത്തിയ നഴ്സുമാരും, കുടുംബങ്ങളും ബന്ധുക്കളും ഇന്നും ഓര്മ്മിക്കുന്നു.
