കൊച്ചി : ശക്തമായ മഴയെ തുടര്ന്ന് ജലനിരപ്പുയര്ന്നതിനാല് മലങ്കര, ഭൂതത്താന്കെട്ട് ഡാമുകളുടെ കൂടുതല് ഷട്ടറുകള് തുറന്നു. തൊടുപുഴ, മൂവാറ്റുപുഴ ആറിന്റെ തീരത്തുള്ളവര് ജാഗ്രത പാലിക്കണമെന്ന് അധികൃതര് അറിയിച്ചു. ഭൂതത്താന് കെട്ട് ഡാമിന്റെ 13 ഷട്ടറുകള് ഉയര്ത്തി.
ആകെ 15 ഷട്ടറുകളാണുള്ളത്. ഇപ്പോഴത്തെ ജല നിരപ്പ് 30. 60 മീറ്റര് ആണ്. രാവിലെ 11 ഷട്ടറുകളാണ് തുറന്നിരുന്നത്. എന്നാല് ജല നിരപ്പ് ഉയര്ന്നതോടെ വീണ്ടും രണ്ട് ഷട്ടറുകള് കൂടി ഉയര്ത്തുകയായിരുന്നു. 34.95 ആണ് ഡാമിന്റെ സംഭരണ ശേഷി.മലങ്കര ഡാമിന്റെ ജലനിരപ്പ് തേഡ് വാണിങ് ലെവല് കഴിഞ്ഞിരിക്കുകയാണ്. 35.68 എംഎം ആണ് സംഭരണ ശേഷി നിലവില് 41.52 എംല് ജലനിരപ്പ് എത്തി ഈ സാഹചര്യത്തില് ഡാമിന്റെ മൂന്നു ഷട്ടറുകള് 30 സെന്റീ മീറ്റര് ഉയര്ത്തി. ജനങ്ങള് ജാഗ്രത പാലിക്കണമെന്ന് അധികൃതര് അറിയിച്ചു.
പെരിയാറിലെ ജല നിരപ്പ് ഉയര്ന്നതിനെ തുടര്ന്ന് ആലുവ ശിവരാത്രി മണപ്പുറത്തെ ശിവക്ഷേത്രത്തിലും വെള്ളം കയറി. രണ്ടു ദിവസമായി തുടരുന്ന മഴമൂലം വ്യാഴാഴ്ച രാത്രിയോടെ തന്നെ ക്ഷേത്രത്തിന്റെ ചുറ്റമ്പലത്തില് വെള്ളം കയറിയിരുന്നു. ഇന്ന് പുലര്ച്ചെ അമ്പലത്തിന് അകത്തേയ്ക്കും വെള്ളം കയറി. എങ്കിലും ആറാട്ട് നടന്നില്ല. സമുദ്ര നിരപ്പില് നിന്നും 1.8 മീറ്റണ് ഇന്ന് രാവിലത്തെ പെരിയാറിലെ ജലനിരപ്പ്. വെള്ളത്തില് ചെളിയുടെ അംശവുമുണ്ട്.
കനത്ത മഴയെത്തുടര്ന്ന് മലപ്പുറം, ഇടുക്കി, വയനാട്, കോഴിക്കോട്, കണ്ണൂര്, കാസര്കോട്, കോട്ടയം ജില്ലകളിലെ പ്രൊഫഷണല് കോളേജ് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ജില്ലാ കളക്ടര് ഇന്ന് അവധി പ്രഖ്യാപിച്ചു. എന്നാല്, യൂണിവേഴ്സിറ്റി പരീക്ഷ അടക്കമുള്ള പൊതു പരീക്ഷകള്ക്ക് മാറ്റം ഉണ്ടാകില്ല.
കാസര്ഗോഡ് ജില്ലയിലെ വെള്ളരിക്കുണ്ട് താലൂക്കിലെ ഹയര്സെക്കന്ഡറിവരെയുള്ള വിദ്യാഭ്യാസസ്ഥാപനങ്ങള്ക്ക് നേരത്തെ തന്നെ അവധി പ്രഖ്യാപിച്ചിരുന്നു. ഇന്ന് രാവിലെയാണ് ജില്ലയിലെ എല്ലാ വിദ്യാഭ്യാസ സ്ഥാപനങ്ങള്ക്കും കളക്ടര് അവധി പ്രഖ്യാപിച്ചത്. പാലക്കാട് ജില്ലയിലെ അട്ടപ്പാടിയിലെ അഗളി, ഷോളയൂര്, പുതൂര് പഞ്ചായത്തുകളിലെ ഹയര്സെക്കന്ററി വരെയുള്ള വിദ്യാഭ്യാസ സ്ഥാപനങ്ങള്ക്കും ഇന്ന് അവധി നല്കിയിട്ടുണ്ട്.
