തിരുവനന്തപുരം: സഭാ തര്‍ക്ക കേസില്‍ പിണറായി സര്‍ക്കാരിനെ വെട്ടിലാക്കി ഓര്‍ത്തഡോക്‌സ് സഭ. അനുനയ ചര്‍ച്ചകള്‍ ഫലം കാണാതെ വന്നതോടെ സര്‍ക്കാരിന് ഓര്‍ത്തഡോക്‌സ് സഭയുടെ അന്ത്യശാസനം. ഒരാഴ്ചയ്‌ക്കുള്ളില്‍ സുപ്രീം കോടതി വിധി നടപ്പാക്കിയില്ലെങ്കില്‍ സര്‍ക്കാരിനെതിരേ കോടതി അലക്ഷ്യ ഹര്‍ജി നല്‍കുമെന്ന് സഭ നേതൃത്വം വ്യക്തമാക്കി. ഇതോടെ വിഷയത്തില്‍ മുഖ്യമന്ത്രി പിണറായി വെട്ടിലായി. നേരത്തേ, സുപ്രീംകോടതി വിധി നടപ്പാക്കേണ്ട നിയമബാധ്യത സംസ്ഥാന സര്‍ക്കാരിനുണ്ടെന്ന് ഓര്‍മ്മിപ്പിച്ച് ഓര്‍ത്തഡോക്‌സ് സഭയുടെ മുന്നറിയിപ്പ് കത്ത് നല്‍കിയിരുന്നു. ചീഫ് സെക്രട്ടറിക്കാണ് ഓര്‍ത്തഡോക്‌സ് സഭ സെക്രട്ടറി കത്തയച്ചത് സര്‍ക്കാരിനെതിരെ കോടതിയലക്ഷ്യ ഹര്‍ജി നല്‍കുന്നതിന് മുന്നോടിയായുള്ള നീക്കമാണിതെന്ന് വ്യക്തമായിരുന്നു. മലങ്കര സഭാ തര്‍ക്കം പരിഹരിക്കാന്‍ മന്ത്രിസഭ ഉപസമിതി ചര്‍ച്ച നടത്താനിരിക്കെയാണ് ഓര്‍ത്തഡോക്‌സ് സഭ സര്‍ക്കാരിന് മുന്നറിയിപ്പ് നല്കിയത്. പള്ളിത്തര്‍ക്കങ്ങളില്‍ തങ്ങള്‍ക്കനുകൂലമായി സുപ്രീംകോടതി വിധി പുറപ്പെടുവിച്ചിട്ടും അതിനനുസരിച്ച് നടപടിയെടുക്കാത്ത സര്‍ക്കാര്‍ നിലപാടില്‍ ഓര്‍ത്തഡോക്‌സ് സഭ വന്‍ പ്രതിഷേധത്തിലാണ്. വിധി നടപ്പാക്കാതെ ഒരു സമവായത്തിനുമില്ലെന്ന് സഭാ പ്രതിനിധികള്‍ വ്യക്തമാക്കിയിട്ടുള്ളതുമാണ്.
സമവായ ചര്‍ച്ചയിലും യാക്കോബായ വിഭാഗത്തിനൊപ്പം ഓര്‍ത്തഡോക്‌സ് സഭാ പ്രതിനിധികള്‍ ചര്‍ച്ചയില്‍ പങ്കെടുത്തിരുന്നില്ല.പക്ഷേ, ഓര്‍ത്തഡോക്‌സ് പിആര്‍ഒ മന്ത്രി ഇ പി ജയരാജനുമായി പ്രത്യേകം കൂടികാഴ്ച നടത്തിയിരുന്നു. ഇതിനു ശേഷവും ആലപ്പുഴ കട്ടച്ചിറയിലും, മൂവാറ്റുപ്പുഴ,മുടവൂര്‍ പള്ളികളിലും ഇരുവിഭാഗങ്ങള്‍ തമ്മില്‍ സംഘര്‍ഷമുണ്ടായി. ഈ സാഹചര്യത്തിലാണ് വീണ്ടും സമവായ ചര്‍ച്ചക്ക് സര്‍ക്കാര്‍ ശ്രമിച്ചത്. ഇതു ഫലം കണ്ടിരുന്നില്ല.
