ശ്രീനഗര്‍: ജമ്മു കശ്മീരില്‍ നുഴഞ്ഞുകയറാന്‍ ശ്രമിച്ച ഭീകരരുടെ മൃതദേഹങ്ങള്‍ വെളുത്ത പതാകയുമായി വന്നാല്‍ വേണമെങ്കില്‍ തിരികെ കൊണ്ടു പോകാമെന്ന് ഇന്ത്യ. കേരാര്‍ സെക്ടറില്‍ കഴിഞ്ഞ ദിവസം നുഴഞ്ഞുകയറാന്‍ ശ്രമിച്ച പാക് ഭീകരരെ ഇന്ത്യന്‍ സൈന്യം വെടിവെച്ചു വീഴ്‌ത്തിയിരുന്നു. ആക്രമണ ഉദ്ദേശമില്ലാതെ വെളുത്ത പതാകകളുമായി വരികയാണെങ്കില്‍ പാക് സൈന്യത്തിന് ഇവരുടെ മൃതദേഹങ്ങള്‍ കൊണ്ടു പോകുമെന്നാണ് ഇന്ത്യ അറിയിച്ചിരിക്കുന്നത്.
പാക്കിസ്ഥാന്റെ ബോര്‍ഡര്‍ ആക്ഷന്‍ ടീമിലെ അംഗങ്ങള്‍, ഇന്ത്യയിലേക്ക് നുഴഞ്ഞു കയറാന്‍ ശ്രമിക്കവേ കൊല്ലപ്പെട്ടത്. പാക് സൈന്യത്തിന്റേയും ഭീകരരുടെയും സംയുക്ത ഒളിപ്പോര്‍ സംഘമാണ് ബോര്‍ഡര്‍ ആക്ഷന്‍ ടീം അഥവാ ബാറ്റ്. വേഷം മാറിയും, അല്ലാതെയും നിയന്ത്രണരേഖയ്‌ക്ക് സമീപം ആക്രമിക്കാനാണ് ബാറ്റ് സംഘത്തെ നിയോഗിക്കുന്നത്. ഇവര്‍ കേരാനിലെ ഒരു ഇന്ത്യന്‍ സൈനിക പോസ്റ്റ് ആക്രമിക്കാനും ശ്രമിച്ചു. പാക്കിസ്ഥാന് ഭീകര പ്രവര്‍ത്തനങ്ങള്‍ തുടരുന്നുവെന്നും, ഇത്തരത്തില്‍ നിയന്ത്രണ രേഖ അതിക്രമിച്ച് കയറാന്‍ ശമിച്ചാല്‍ ശക്തമായ പ്രതിരോധവും തിരിച്ചടിയും നേരിടേണ്ടി വരുമെന്നും സൈന്യം മുന്നറിയിപ്പും നല്‍കി.
അതേസമയം ജൂലെ 30നും 31നും ആക്രമണം നടന്നതായി പാക് സൈന്യവും സ്ഥിരീകരിച്ചു. എന്നാല്‍ കൊല്ലപ്പെട്ടത് സാധാരണക്കാരാണെന്നാണ് പാക്കിസ്ഥാന് ന്യായീകരിച്ചിരിക്കുന്നത്. കൂടാതെ 11 പേര്‍ക്ക് പരിക്കേറ്റെന്നും ജനീവ കരാറിന്റെ ലംഘനം ആണിതെന്നും പാക്കിസ്ഥാന് അറിയിച്ചു.
ജമ്മു കശ്മീരില്‍ ഭീകരാക്രമണത്തിന് സാധ്യതയുണ്ടെന്ന് ഇന്റലിജെന്‍സ് മുന്നറിയിപ്പ് നല്‍കുകയും സംസ്ഥാനത്ത് അതീവ സുരക്ഷ ഏര്‍പ്പെടുത്തുകയും ചെയ്തതിനു പിന്നാലെയാണ് കേരാര്‍ സെക്ടര്‍ വഴി ഭീകരര്‍ നുഴഞ്ഞു കയറാന്‍ ശ്രമിക്കുന്നത്. ഭീകരര്‍ അമര്‍നാഥ് തീര്‍ത്ഥയാത്രികരേയും ലക്ഷ്യമിട്ടിരുന്നതിനാല്‍ സംസ്ഥാനത്തെ തീര്‍ത്ഥാടകരോടും വിനോദ സഞ്ചാരികളോടും മടങ്ങിപ്പോകാനും നിര്‍ദ്ദേശം നല്‍കിയിട്ടുണ്ട്.
പാക് സൈനിക പരിശീലന കേന്ദ്രങ്ങളില്‍ ഭീകരര്‍ക്ക് പരിശീലനം നല്‍കുന്നതായി ഇന്ത്യ അന്താരാഷ്‌ട്രവേദികളിലടക്കം പല തവണ ഉന്നയിച്ചിട്ടുള്ളതുമാണ്.
സംസ്ഥാനത്ത് ഭീകരാക്രമണ ഭീഷണി നേരിടുന്ന പശ്ചാത്തലത്തില്‍ കേന്ദ്ര ആഭ്യന്തരമന്ത്രി അമിത് ഷാ ജമ്മു കശ്മീര്‍ സന്ദര്‍ശിച്ച് സ്ഥിതിഗതികള്‍ വിലയിരുത്തും. സുരക്ഷാ സംവിധാനങ്ങളും, അമര്‍നാഥ് തീര്‍ത്ഥാടനം സംബന്ധിച്ച കാര്യങ്ങളും അദ്ദേഹം പരിശോധിക്കും.
