ശാസ്ത്രീയനാമം: Argyreia speciosa
സംസ്കൃതം: വൃദ്ധദാരുകം, സമുദ്രപാത, സമുദ്രഫല
തമിഴ്: സമത്തിര പച്ചൈ
എവിടെ കാണാം: ഇന്ത്യയിലുടനീളം വരണ്ട പ്രദേശങ്ങളിലും നനവാര്ന്ന പ്രദേശങ്ങളിലും ഒരു പോലെ കണ്ടു വരുന്നു. പാറക്കെട്ടുകളിലാണ് ഇത് സാധാരണ കണ്ടു വരുന്നത്.
പ്രത്യുല്പാദനം: വിത്തില് നിന്ന്
ഔഷധപ്രയോഗങ്ങള്: വൃദ്ധരെ യുവാക്കളാക്കുന്ന ഔഷധിയാണിത്. വൃദ്ധദാരുകം എന്ന പേര് ഈ ഔഷധസസ്യത്തിന് ലഭിക്കാനുള്ള കാരണവും ഇതാണ്. ധാതുവൃദ്ധിക്കും ശരീരബലം കൂട്ടാനും ഓജസ്സ് നിലനിര്ത്തുന്നതിനും വളരെ ശ്രേഷ്ഠമായ ഔഷധമാണ് സമുദ്രപ്പച്ച. വാത, പിത്ത രോഗികള്ക്ക് ഒരു പോലെ ഉപയോഗപ്രദം. ഇതിന്റെ വേര് ഉണക്കിപ്പൊടിച്ച് അഞ്ച് ഗ്രാം വീതം പാലിലോ, നെയ്യിലോ കലക്കി കുടിച്ചാല് വാതവും ആമവാതവും സുഖപ്പെടും.
ആമവാതത്തിന് ഈ മരുന്ന് ഗോമൂത്രത്തില് കലക്കികുടിക്കുന്നതാണ് ഏറെ ഉത്തമം. സമുദ്രപ്പച്ചയുടെ വേര് ഉണക്കിപ്പൊടിച്ച് ശതാവരി നീരില് ഒരു രാത്രി കലക്കി വെയ്ക്കുക. പകല് സൂര്യപ്രകാശത്തില് ഇതൊന്നാകെ ഉണക്കിയെടുക്കുക. (ഭാവന ചെയ്യുക എന്നാണ് ഈ പ്രക്രിയയ്ക്ക് പറയുന്നത്). ഇങ്ങനെ ഏഴു ദിവസം ഭാവന ചെയ്തെടുത്ത പൊടി ഓരോ സ്പൂണ് വീതം ദിവസം രണ്ടു നേരം നെയ്യില് സേവിക്കുക. ഇങ്ങനെ പത്തു ദിവസം തുടര്ന്നാല് ഏത് വൃദ്ധനും യുവാവായി മാറും.
ആമവാതത്തിനുള്ള അജമോദാദി വടകത്തില് ഇതൊരു ചേരുവയാണ്.
അജമോദാദി വടകം ഉണ്ടാക്കുന്ന വിധം: അയമോദകം, കുരുമുളക്, വിഴാലരി, തിപ്പലി, ദേവതാരം, കൊടുവേലിക്കിഴങ്ങ്, ശതകുപ്പ, ഇന്തുപ്പ്, കാട്ടു തിപ്പലിവേര് ഇവയോരോന്നും 60 ഗ്രാം വീതമെടുത്ത് അതിനൊപ്പം, ചുക്ക് 600 ഗ്രാം, സമുദ്ര പച്ച 600 ഗ്രാം, കടുക്കാത്തൊണ്ട് 300 ഗ്രാം എന്നിവ ചേര്ത്ത് നന്നായി പൊടിച്ച്, പൊടിയുടെ ഇരട്ടി ശര്ക്കരയും ചേര്ത്ത് യോജിപ്പിച്ച് ഒരു നെല്ലിക്കാ വലിപ്പത്തില് ഉരുട്ടി ഉണക്കി, ദിവസം രണ്ടു നേരം ഓരോ ഗുളിക വീതം ഒരു മാസം തുടര്ച്ചയായി സേവിച്ചാല് ആമവാതം കൊണ്ടുള്ള സന്ധി വേദന, സന്ധിവീക്കം, നട്ടെല്ല് മുമ്പോട്ടും പിറകിലേക്കും വളഞ്ഞിരിക്കുന്ന രോഗം, അസ്ഥി സംബന്ധായ വേദന തുടങ്ങിയവ ശമിക്കും. ഈ ഗുളിക കഴിക്കുമ്പോള് ബൃഹത് സൈന്ധവ തൈലം ദേഹത്തു തേയ്ക്കുന്നത് നല്ലതാണ്. (ലേഖകന് വളരെ ഫലപ്രദമായി ഈ ചികിത്സ നടത്തി വരുന്നു.)
– അവസാനിച്ചു
