കേശിക്ക് സുകേശന് എന്നുപേരും നല്കി. സുകേശന് പെട്ടെന്ന് വളര്ന്ന് യുവാവായി. ശിവന്റെ അനുഗ്രഹത്താല് പുഷ്കരദേശത്തില് നല്ല ഒരു കൊട്ടാരമുണ്ടാക്കി അവിടെ താമസമാക്കി. ശിവഭൃത്യന്റെ ഐശ്വര്യം കണ്ടപ്പോള് ഗന്ധര്വ്വശ്രേഷ്ഠനായ ഗ്രാമണി തന്റെ പുത്രിയായ വേദവതിയെ സുകേശനു പത്നിയായി നല്കി.
അവര്ക്ക് വീരന്മാരായ ആര്ക്കും പരാജയപ്പെടുത്താന് കഴിയാത്ത സുമാലി, മാല്യവാന്, മാലി എന്നീ മൂന്നു പുത്രന്മാരുണ്ടായി. മഹാപരാക്രമികളായിരുന്ന അവര് മൂവരും മേരു പര്വ്വതസാനുക്കളില് ചെന്ന് നിരാഹാരവ്രതത്തോടെ ബ്രഹ്മാവിനെ ചിന്തിച്ചുകൊണ്ട് ഘോരമായ തപസ്സുതുടങ്ങി. ഇഷ്ടവരങ്ങള് സമ്പാദിച്ച് വളരെ ശക്തരായിത്തീര്ന്നു. വിശ്വകര്മ്മാവിനെക്കൊണ്ട് ത്രികൂടാചലത്തിനു മുകളില് അറുപതുകാതം വിസ്തീര്ണ്ണമുള്ള ലങ്കയെന്ന പുരം നിര്മ്മിച്ച് രാക്ഷസന്മാരോടോപ്പം താമസമാക്കി.
അഷ്ടദിക് പാലന്മാരില് ഒരാളായ വൈശ്രവണന് വലിയ വിരൂപിയായിരുന്നു. പൊക്കം കുറവാണ്. എന്നാല് വണ്ണിച്ച ശരീരം. അതില് മൂന്നുകാലുണ്ട്. ഒരു കണ്ണേയുള്ളു. മറ്റേകണ്ണിന്റെ സ്ഥാനത്ത് ഒരു മഞ്ഞപ്പുള്ളിയാണുള്ളത്. അതുകൊണ്ട് പിംഗളാക്ഷന് എന്നും വിളിക്കുന്നു.
ആകെ എട്ടു പല്ലേയുള്ളു. ഇപ്രകാരം കുത്സിതമായ ബേരം ( നിന്ദ്യമായ ശരീരം) ഉള്ളതുകൊണ്ട് കുബേരന് എന്നറിയപ്പെട്ടു. യക്ഷന്മാരുടെ രാജാവായ കുബേരന് വലിയ ശിവഭക്തനും ശിവന്റെ അടുത്ത മിത്രവുമായിരുന്നു. കുബേരന്റെ ഭാര്യ മുരാസുരന്റെ പുത്രിയായ യക്ഷിയാണ്. പുത്രന്മാര് നളകൂബരനും മണിഗ്രീവനും. കൈലാസത്തിനടുത്തുള്ള അളകാപുരിയാണ് യക്ഷന്മാരുടെ രാജാവായ കുബേരന്റെ രാജധാനി. രാക്ഷസന്മാരുടെ പ്രതാപവും വിഷ്ണുവില് നിന്നുള്ള പരാജയവും
സുമാലിയും മാല്യവാനും മാലിയും ലങ്കയില് വസിച്ചുകൊണ്ട് ഭരണം തുടങ്ങി. നര്മ്മദയെന്നു പേരുള്ള ഗന്ധര്വ്വസ്ത്രീ തന്റെ മൂന്നു പുത്രിമാരെ അവര്ക്കു വിവഹം ചെയ്തുകൊടുത്തു. അതില് മാല്യവാന്റെ പത്നിയായ സുന്ദരിയില് ഏഴുപുത്രന്മാരും ഒരു പുത്രിയും ജനിച്ചു. ആ പുത്രന്മാരാണ് മത്തന്, ഉന്മത്തന്, വജ്രദംഷ്ട്രന്, സുപ്തഘ്നന്, വിരൂപാക്ഷന്, ദുര്മ്മുഖന്, യജ്ഞാന്തകന് എന്നിവരാണ്. പുത്രിയുടെ പേര് അനല. സുമാലിയുടെ ഭാര്യ കേതുമതി. അവര്ക്ക് പത്ത് പുത്രന്മാരും നാലുപുത്രിമാരും ഉണ്ടായി.
പുത്രന്മാരുടെ പേരുകള് പ്രഹസ്തന്, വികടന്, ധൂമ്രാക്ഷന്, അകമ്പനന്, സുപാര്ശ്വന്, ദണ്ഡന്, സംഹ്രാദി, പ്രജംഘന്, കാലധനുസ്സ്, ദാസശ്രവണന്. നാലുപുത്രിമാര് ബക, പുഷ്പോല്കട, കൈകസി, കുംഭീനസി എന്നിവരാണ്. മാലിക്ക് ഭാര്യ വസുധയില് അനലന്, അനിലന്, വരന്, സമ്പാതി എന്നീ നാലു പുത്രന്മാര്. വരബലം കൊണ്ട് മത്തരായ സുമലി മാല്യവാന്, മാലി എന്നിവര് അവരുടെ വീരന്മാരായ പുത്രന്മാരോടൊപ്പം സൈന്യസമേതരായി മൂന്നുലോകത്തിലും സഞ്ചരിച്ച് ദേവതാപസ ഗന്ധര്വ്വ ഉരഗവര്ഗ്ഗത്തെയെല്ലാം ഉപദ്രവിക്കാന് തുടങ്ങി. ഇവരെപ്പേടിച്ച് മറ്റാര്ക്കും പുറത്തിറങ്ങാന് പോലും കഴിയാതായി. എല്ലാവരും കൂടി ശിവന്റെ അടുത്തെത്തി കേശിയുടെ സന്താനങ്ങളെക്കൊണ്ട് തങ്ങള്ക്ക് പുറത്തിറങ്ങാന് കഴിയുന്നില്ലെന്ന് പരാതിപ്പെട്ടു.
(തുടരും)
