ന്യൂദല്‍ഹി: മുതിര്‍ന്ന കോണ്‍ഗ്രസ് നേതാവ് കപില്‍ സിബലിന്റെ തിരംഗ ചാനല്‍ സാമ്പത്തിക പ്രതിസന്ധി മൂലം അടച്ചുപൂട്ടല്‍ ഭീഷണിയും വിവാദങ്ങളും നേരിടുന്ന പശ്ചാത്തലത്തില്‍ മറ്റൊരു അക്ഷേപം കൂടി ചാനലിനെതിരെ ഉയര്‍ന്നിരിക്കുന്നു.
ചാനലിലെ മുതിര്‍ന്ന മാധ്യമപ്രവര്‍ത്തകന്‍ തനിക്കെതിരെ ലൈംഗിക അധിക്ഷേപം നടത്തിയെന്ന വിമര്‍ശനവുമായി ഹിമാന്‍ഷി ഗുപ്ത എന്ന ജീവനക്കാരി ട്വിറ്റര്‍ പോസ്റ്റ് ഇട്ടതോടെയാണ് തിരംഗ ടിവി വീണ്ടും പുലിവാല് പിടിച്ചത്. അസ്ലീല വാട്‌സാപ്പ് സന്ദേശങ്ങളും മുതിര്‍ന്ന മാധ്യമപ്രവര്‍ത്തകന്റെ ഫോട്ടോയും അടക്കം തെളിവുകളോടെ ട്വിറ്ററില്‍ ഹിമാന്‍ഷി പോസ്റ്റ് ചെയ്ത സന്ദേശവും ചാനലിന് തിരിച്ചടിയായി.
വാട്‌സ്ആപ് സന്ദേശത്തില്‍ തന്നോട് ലൈംഗികബന്ധത്തിലേര്‍പ്പെടാന്‍ പ്രൊഡ്യൂസര്‍ ആവശ്യപ്പെട്ടുവെന്ന് മാധ്യമ പ്രവര്‍ത്തക ട്വിറ്ററില്‍ വെളിപ്പെടുത്തി. വാട്‌സ്ആപ് സന്ദേശമടങ്ങിയ സ്‌ക്രീന്‍ ഷോട്ട് സഹിതമാണ് യുവതി ട്വിറ്ററില്‍ ഇക്കാര്യം അറിയിച്ചത്.
അതേസമയം കപില്‍ സിബലിനെതിരെ പരാതി നല്‍കുമെന്ന് മാധ്യമപ്രവര്‍ത്തകയും അവതാരികയുമായ ബര്‍ക്കാ ദത്ത് ട്വിറ്ററിലൂടെ അറിയിച്ചു. വിശ്വാസവഞ്ചനക്കും കരാറിനെ മാനിക്കാന്‍ വിസമ്മതിച്ചതിനും കബില്‍ സിബല്‍ അദ്ദേഹത്തിന്റെ ഭാര്യ പ്രൊമില സിബലിനുമെതിരെ ക്രിമിനല്‍, സിവില്‍ നടപടികള്‍ തുടങ്ങുമെന്നും ബര്‍ക്കാ ദത്ത് അറിയിച്ചു.
കബില്‍ സിബലിന്റെ ഉടമസ്ഥതയിലുള്ള എച്ച്ടിഎന്‍ തിരംഗ ചാനലില്‍ മാധ്യമപ്രവര്‍ത്തകര്‍ക്കെതിരെ നടക്കുന്ന അന്യായങ്ങള്‍ക്കെതിരെ ദത്ത് തുറന്നടിച്ചിരുന്നു. ഇതിന്റെ പശ്ചാത്തലത്തിലാണ് നിയമ നടപടികളുമായി ദത്ത് രംഗത്തെത്തിയത്. ആറുമാസത്തെ ശമ്പളമില്ലാതെ 200 ലധികം ജീവനക്കാരെ ജോലിയില്‍ നിന്ന് അന്യായമായി പിരിച്ചുവിട്ടെന്നും മാധ്യമപ്രവര്‍ത്തകരോട് മോശമായ രീതിയിലാണ് കബില്‍ സിബലും ഭാര്യയും പെരുമാറുന്നതെന്നും തിരംഗ ചാനലുമായി സഹകരിച്ചിരുന്ന ദത്ത് കുറ്റപ്പെടുത്തി.
സിബല്‍ മാധ്യമപ്രവര്‍ത്തകരെ കബളിപ്പിക്കുകയും വഞ്ചിക്കുകയും ചെയ്തുവെന്നും അവരെ ഒന്ന് കാണാന്‍ കൂട്ടാക്കിയില്ലെന്നും ദത്ത് ആരോപിച്ചു. മാനദണ്ഡങ്ങള്‍ പാലിച്ച് ശമ്പളം നല്‍കണമെന്നാവശ്യപ്പെട്ട ജീവനക്കാരോട് സിബലിന്റെ ഭാര്യ മോശമായ പരാമര്‍ശങ്ങളാണ് നടത്തിയതെന്നും ദത്ത് പറഞ്ഞു.
