കൊച്ചി: അഗാധമായ പ്രണയമായിരുന്നു ജാനകിയമ്മയ്ക്ക് ഭര്ത്താവ് വി. രാമപ്രസാദിനോട്. രാമു എന്ന സ്നേഹപൂര്ണമായ വിളിയില് പോലും പ്രണയം നിറഞ്ഞുനിന്നു. അദ്ദേഹം ഇല്ലായിരുന്നുവെങ്കില് എസ്. ജാനകിയെന്ന ഗായിക ആരാലും അറിയപ്പെടാതെ പോയേനെ. ആ പ്രതിഭയെ നമ്മളിലേക്ക് എത്തിച്ചതില് രാമപ്രസാദിനുള്ള പങ്ക് വലുതാണ്.
ഒരു വേദിയില് ഒറ്റയ്ക്ക് നിന്നു പാടുമ്പോഴായിരുന്നു ആദ്യമായി രാമപ്രസാദ് ജാനകിയെ കാണുന്നത്. അദ്ദേഹത്തിന്റെ അച്ഛനായിരുന്നു ആ ഏകാംഗ ഷോ സംഘടിപ്പിച്ചത്. അന്നത്തെ പ്രശസ്ത ഫിലിം ബാനര് ആയിരുന്ന എവിഎം സ്റ്റുഡിയോസിലേക്ക് ജാനകിയെ കുറിച്ച് ഒരു കത്തെഴുതാന് അച്ഛനെ പ്രേരിപ്പിച്ചത് രാമപ്രസാദായിരുന്നു. ആദ്യ നോട്ടത്തില് തന്നെ ജാനകി ആ ഹൃദയത്തില് ഇടം നേടി.
1956ല് ജീവിതസഖിയാക്കി. തൊട്ടടുത്ത വര്ഷം സിനിമയില് പിന്നണി പാടുന്നതിനുള്ള അവസരം തേടിയെത്തി. പിന്നീടുള്ള ജാനകിയമ്മയുടെ സംഗീതയാത്രയില് ഉടനീളം അദ്ദേഹം നിഴല് പോലെ കൂടെനിന്നു. ആ ജീവിതം തന്നെ ജാനകിയുടെ പാട്ടുജീവിതത്തിന് വേണ്ടി സമര്പ്പിച്ചു.
തന്റെ എല്ലാ പാട്ടുകളേയും സ്നേഹിച്ച വ്യക്തിയായിരുന്നു രാമപ്രസാദ് എന്ന് ജാനകിയമ്മ പറയുമായിരുന്നു. പാട്ട് റെക്കോഡിങ്ങിന് പോകുമ്പോള് പോലും തനിച്ചു വിട്ടിരുന്നില്ല. പരസ്പരം പിരിഞ്ഞിരിക്കാന് ഇരുവര്ക്കും സാധിച്ചിരുന്നുമില്ല. രാമുവിന്റെ പിന്തുണയില്ലായിരുന്നുവെങ്കില് സംഗീത ജീവിതത്തില് ഇത്രത്തോളം നേട്ടങ്ങള് ഉണ്ടാകുമായിരുന്നില്ലെന്നും അവര് പറഞ്ഞിട്ടുണ്ട്. 1997ലായിരുന്നു അദ്ദേഹത്തിന്റെ മരണം. ആ ഓര്മകളിലായിരുന്നു പിന്നീടുള്ള ജാനകിയമ്മയുടെ ജീവിതം.
