കാസര്‍കോട്: ബാലഗോകുലത്തിന്റെ ഉത്തരകേരളം വാര്‍ഷിക സമ്മേളനത്തിന് തുടക്കമായി. എടനീര്‍ മഠാധിപതി സ്വാമി സച്ചിതാനന്ദഭാരതി ഉദ്ഘാടനം ചെയ്തു. ബാലഗോകുലം സംസ്ഥാന അധ്യക്ഷന്‍ എം. സത്യന്‍ അധ്യക്ഷനായി. ആര്‍എസ്എസ് ക്ഷേത്രീയ കാര്യവാഹ് എം. രാധാകൃഷ്ണന്‍, സംസ്ഥാന ഭഗിനി പ്രമുഖ സ്മിത വത്സന്‍, പൊതു കാര്യദര്‍ശി കെ.എന്‍. സജി, കാസര്‍കോട് ജില്ലാ ബാലസമിതി അധ്യക്ഷന്‍ അരവിന്ദന്‍ എന്നിവര്‍ സംബന്ധിച്ചു.
പൊതുകാര്യദര്‍ശി എന്‍.എം. സദാനന്ദന്‍ സ്വാഗതവും കാസര്‍കോട് ജില്ലാ കാര്യദര്‍ശി എന്‍.ടി. വിദ്യാധരന്‍ നന്ദിയും പറഞ്ഞു. തുടര്‍ന്നുള്ള ബാലസഭയില്‍ സംസ്ഥാന ഉപാധ്യക്ഷന്‍ കെ.പി. ബാബുരാജ് വിഷയാവതരണം നടത്തി. ഭഗനി സമ്മേളനത്തില്‍ ഡെപ്യൂട്ടി സോളിസിറ്റര്‍ ജനറല്‍ അഡ്വ. ഒ.എം. ശാലീന സംസാരിച്ചു. ബാലപ്രതിഭാസംഗമം ചിന്‍മയമിഷന്‍ കേരളം ഘടകം മേധാവി സ്വാമി വിവിക്താനന്ദസരസ്വതി ഉദ്ഘാടനം ചെയ്തു. ഇന്ന് വാര്‍ഷിക പൊതുസഭ രാവിലെ 10ന് കേന്ദ്രമന്ത്രി ശ്രീപദ് യശോനായിക് ഉദ്ഘാടനം ചെയ്യും. രാജ്യസഭ എംപി സി. സദാനന്ദന്‍ മാസ്റ്റര്‍ മുഖ്യതിഥിയാകും. കൊണ്ടേവൂര്‍ നിത്യാനന്ദ യോഗാശ്രമം സ്വാമി യോഗാനന്ദ സരസ്വതിയും സംബന്ധിക്കും.
സമൂഹത്തില്‍ നിന്ന് നഷ്ടപ്പെട്ടുകൊണ്ടിരിക്കുന്ന സംസ്‌കൃതിയുടെ തനിമയെ തിരിച്ച് പിടിക്കാന്‍ ബാലഗോകുലം പ്രവര്‍ത്തകര്‍ക്ക് സാധിക്കണമെന്ന് ആര്‍എസ്എസ് ക്ഷേത്രീയ കാര്യവാഹ് എം. രാധാകൃഷ്ണന്‍ പറഞ്ഞു. ബാലഗോകുലത്തിന്റെ ഉത്തരകേരളം വാര്‍ഷിക സമ്മേളനത്തിന്റെ ഭാഗമായുള്ള പ്രവര്‍ത്തക പഠനശിബിരത്തില്‍ നവയുഗ സംഘാടകന്‍ എന്ന വിഷയത്തില്‍ സംസാരിക്കുകയായിരുന്നു അദ്ദേഹം. മാറാത്ത മൂല്യങ്ങള്‍ പകര്‍ന്ന് കൊടുക്കുന്ന സാസ്‌കാരിക ക്ഷമതയുള്ള വര്‍ത്തമാനകാല പ്രവര്‍ത്തകരാണ് ഇന്ന് ബാലഗോകുലത്തിന് ആവശ്യം. ഇളകാത്തമൂല്യങ്ങള്‍ കുട്ടികളില്‍ പകര്‍ന്ന് കൊടുക്കാന്‍ സാധിക്കണം.
കുട്ടികള്‍ എങ്ങനെയായിരിക്കണമെന്ന് നാം പഠിപ്പിക്കുമ്പോള്‍ ആ ഗുണം പഠിപ്പിക്കുന്ന വ്യക്തിയിലും അന്തര്‍ലീനമായിരിക്കണം. സോഷ്യല്‍ മീഡിയയുടെ അതിപ്രസരത്തില്‍ പരമ്പരാഗത സംസ്‌കാരത്തില്‍ നിന്ന് കുട്ടികള്‍ വ്യതിചലിക്കുന്നതിന് രക്ഷാകര്‍ത്താക്കളും ഉത്തരവാദികളാകുന്നു. ഭാരതത്തിന്റെ ശക്തിയും പ്രഭാവവും ലോകം അംഗീകരിക്കുന്ന കാലഘട്ടത്തിലൂടെയാണ് നാം കടന്ന് പോകുന്നത്. സമൂഹത്തില്‍ മുന്നേറ്റമുണ്ടാക്കിയ അയ്യന്‍കാളിയെ പോലുള്ള സാമൂഹ്യ പരിഷ്‌കര്‍ത്താകളുടെ ജീവിതങ്ങള്‍ പഠിക്കണം, അദ്ദേഹം നിര്‍ദേശിച്ചു.
