ശാസ്ത്രീയ നാമം: Seronia lemonia
സംസ്കൃതം: കപിതഃ
എവിടെ കാണാം: അതിശുഷ്ക വനങ്ങളില് കണ്ടുവരുന്നു. തമിഴ്നാട്ടിലെ ബെന്നാരിയിലും കേരളത്തിലെ ചിന്നാര് വനങ്ങളിലും കണ്ടു വരുന്നു.
പ്രത്യുത്പാദനം: വിത്തില് നിന്ന്
ചില ഔഷധപ്രയോഗങ്ങള്: വിളാര്പഴ (വുഡ് ആപ്പിള്) ത്തിന്റെ തൊലി അരച്ചുതേയ്ക്കുന്നത് വ്രണം ഉണങ്ങാന് അഭികാമ്യമാണ്. ഇതിന്റെ പഴുത്തകായ് കഴിച്ചാല് വയറിളക്കവും പുളിച്ചു തികട്ടലും മാറും. ചുമ, നെഞ്ചുപിടിത്തം എന്നീ രോഗങ്ങള്ക്ക് വിളാര്മരത്തിന്റെ തൊലിയും ഇളംകായും ഉണക്കിപ്പൊടിച്ച് ഒരു സ്പൂണ് പൊടി തേനില് സേവിക്കുക. ഭൈരവമഹര്ഷിയുടെ വ്രണഭൈരവതൈലത്തില് വിളാംപശ ഉപയോംിക്കുന്നു.
വ്രണഭൈരവതൈലം: വല്സനാദി, ചായില്യം, മഞ്ചട്ടിപ്പൊടി, പൊന്നരിക്കാരം, മനയോല, പച്ചക്കര്പ്പൂരം, ചൂടന് കര്പ്പൂരം, രസകര്പ്പൂരം, തുത്ത്, തുരിശ്, നെല്ലിക്കാഗന്ധകം, അരത്ത, തിരുവട്ടപ്പശ, ചെഞ്ചല്യം, ഗൗരിപാഷാണം, ഇരട്ടിമധുരം, നറുനീണ്ടിക്കിഴങ്ങ്, നവസാരം, നെല്ലിക്കാത്തൊണ്ട്, കടുക്കാത്തൊണ്ട്, താന്നിക്കാത്തൊണ്ട്, ദേവതാരം, കുന്തിരിക്കം, വരട്ടുമഞ്ഞള്, മരമഞ്ഞള്ത്തൊലി, പുളിങ്കുരു, തൂണിയാങ്കം, ആട്ടിന്കാഷ്ഠം, ചെമ്പരത്തിത്തൊലി, തേക്കിന്പശ, വേപ്പിന്പശ, വിളാംപശ, മാവിന്പശ, തെങ്ങിന് പൂക്കുലയരി, ഇവ ഓരോന്നും 15 ഗ്രാം വീതം പേരാലിന്റെ പാലിലോ, ഇലവിന്റെ തൊലി ഇടിച്ചു പിഴിഞ്ഞ നീരിലോ, പുതിയ തെങ്ങിന് കള്ളിലോ, നന്നായി അരച്ച് ഒരു നേര്ത്ത തുണിയില് തേച്ച് ഇരുമ്പു കമ്പിയില് ചുറ്റി വെയിലില് ഉണക്കണം. അതിനു ശേഷം ഒരു ഓട്ടുരുളിയില് ഒന്നര ലിറ്റര് എള്ളെണ്ണയും ഒന്നര ലിറ്റര് വെളിച്ചെണ്ണയും ഒന്നായി ചേര്ക്കുക. ഉണക്കി വച്ചിരിക്കുന്ന മരുന്നു പന്തം നെയ്യില് മുക്കി കത്തിച്ച് ഉരുളിയുടെ മീതെ തലകീഴായി പിടിക്കുക.
ഉരുളിയിലെ എണ്ണ അല്പാല്പമായി പന്തത്തിലേക്ക് കോരി ഒഴിക്കുക. അതില് നിന്നു വീഴുന്ന എണ്ണ അതേ ഉരുളിയില് ശേഖരിക്കുക. ഇത് മരുന്നു മുഴുവന് കത്തിത്തീരും വരെ തുടരുക. ഈ എണ്ണ ചൂടാറുമ്പോള്, ഉരുളിയില് നിന്നെടുത്ത് കുപ്പിപ്പാത്രത്തില് സൂക്ഷിക്കുക. ഈ തൈലം സര്വാംഗം തേച്ചാല് അപസ്മാരം, ചിത്തഭ്രമം എന്നീ രോഗങ്ങളും എല്ലാവിധ ദുഷ്ടവ്രണങ്ങളും (പ്രത്യേകിച്ച് പാമ്പുകടിയേറ്റ് പൊട്ടിയൊലിക്കുന്ന വ്രണങ്ങള്) ശമിക്കും. ഇതുകൊണ്ട് പൊറുക്കാത്ത വ്രണങ്ങളില്ല. വ്രണചികിത്സയ്ക്ക് ഇതിലും നല്ലൊരു മരുന്നില്ല. ഭൈരവമഹര്ഷിയാണ് ഈ തൈലം ആദ്യമായി ഉണ്ടാക്കിയത്.
