ന്യൂദൽഹി: ബഹിരാകാശരംഗത്ത് പുതിയ കമ്പനി രൂപീകരിക്കാൻ ഇന്ത്യ. ധനമന്ത്രി നിർമല സീതാരാമൻ ബജറ്റ് പ്രസംഗത്തിലാണ് ഇക്കാര്യം അറിയിച്ചത്. ന്യൂ സ്പേസ് ഇന്ത്യ ലിമിറ്റഡ് (എൻഎസ്ഐഎൽ) എന്ന പേരിലാണ് കമ്പനി രൂപീകരിക്കുന്നത്. ഐഎസ്ആർഒയുടെ വാണിജ്യ വിഭാഗമായി ആയിരിക്കും ഈ കമ്പനി പ്രവർത്തിക്കുക.
ഐഎസ്ആർഒയുടെ ഗവേഷണങ്ങളോടും വികസനപ്രവർത്തനങ്ങളോടും ചേർന്ന് കമ്പനി പ്രവർത്തിക്കുമെന്ന് ധനമന്ത്രി അറിയിച്ചു. ബഹിരാകാശ ഉത്പന്നങ്ങൾ, സാങ്കേതിക വിദ്യയുടെ കൈമാറ്റം, ഐഎസ്ആർഒയുമായി ചേർന്നു വാണിജ്യ ബഹിരാകാശ വിക്ഷേപണങ്ങൾ ക്രമീകരിക്കുക എന്നിവ കമ്പനിയുടെ ചുമതലകളിൽ ഉൾപ്പെടും. നിലവിൽ ഈ ചുമതലകൾ ആൻട്രിക്സ് കോർപറേഷനാണു നിർവഹിച്ചുവരുന്നത്.
പൂർണമായും കേന്ദ്ര സർക്കാരിനു കീഴിൽ വരുന്ന ആൻട്രിക്സിൽ, ബഹിരാകാശ വകുപ്പാണ് ഭരണചുമതലകൾ നിർവഹിക്കുന്നത്. രാജ്യത്ത് കൂടുതല് നിക്ഷേപം എത്തിക്കുക എന്ന ലക്ഷ്യത്തോടെ ആഗോള നിക്ഷേപസംഗമം സംഘടിപ്പിക്കും, ആഗോളവ്യാപാരികളും, വ്യവസായ ഗ്രൂപ്പുകളും, ഡിജിറ്റല് കമ്പനികളും സംഗമത്തിനെത്തും. എല്ലാ വര്ഷവും ആഗോളനിക്ഷേപം സംഘടിപ്പിക്കുമെന്നും ധനമന്ത്രി നിര്മല സീതാരാമന് ബജറ്റ് അവതരണത്തിനിടെ പ്രഖ്യാപിച്ചു.
