ന്യൂദല്ഹി : രണ്ടാം മോദി സര്ക്കാരിന്റെ ബജറ്റ് അവതരണത്തിനായി കേന്ദ്ര ധനമന്ത്രി നിര്മ്മല സീതാരാമന് ധനമന്ത്രാലയത്തിലെത്തി. സഹമന്ത്രി അനുരാഗ് ഠാക്കൂറിനൊപ്പമാണ് നിര്മ്മല സീതാരാമന് എത്തിയത്. ലോക്സഭാ തെരഞ്ഞെടുപ്പിന് മുമ്പ് പിയൂഷ് ഗോയല് അവതരിപ്പിച്ച ഇടക്കാല ബജറ്റിന്റെ തുടര്ച്ചയാകും ഇന്നത്തെ കേന്ദ്ര ബജറ്റ്.
ബജറ്റ് അവതരണത്തില് പങ്കെടുക്കുന്നതിനായി പ്രധാനമന്ത്രി നരേന്ദ്രമോദിയും പാര്ലമെന്റില് എത്തിയിട്ടുണ്ട്. രാഷ്ട്രപതി രാംനാഥ് കോവിന്ദിനെ കണ്ട്, ബജറ്റ് രേഖ നല്കി, അംഗീകാരം വാങ്ങിയ ശേഷമാണ് നിര്മല സീതാരാമന് തിരികെ കേന്ദ്രമന്ത്രിസഭാ യോഗത്തില് പങ്കെടുക്കാന് പാര്ലമെന്റില് എത്തിയത്.
അല്പസമയത്തിനകം പ്രധാനമന്ത്രി നരേന്ദ്രമോദിയുടെ നേതൃത്വത്തില് കേന്ദ്രമന്ത്രിസഭാ യോഗം തുടങ്ങും. ബജറ്റിലെ പ്രധാനപ്പെട്ട കാര്യങ്ങള് മന്ത്രി മന്ത്രിസഭാ യോഗത്തില് വിശദീകരിക്കും. ഇതിന് ശേഷം 11 മണിയോടെയാകും ബജറ്റവതരണം.
