ന്യൂദല്ഹി : രണ്ടാം മോദി സര്ക്കാരിന്റെ ആദ്യ ബജറ്റ് ധനമന്ത്രി നിര്മ്മല സീതാരാമന് ഇന്ന് ലോക്സഭയില് അവതരിപ്പിക്കും. ബജറ്റ് അവതരിപ്പിക്കുന്ന ആദ്യ പൂര്ണസമയ വനിതാ ധനമന്ത്രി എന്ന ബഹുമതി ഇതോടെ നിര്മ്മല സീതാരാമന് സ്വന്തമാകും.
ഇന്ത്യയുടെ ചരിത്രത്തിലെ 90ാമത്തെ ബജറ്റാണ് ഇന്ന് ധനമന്ത്രി അവതരിപ്പിക്കാന് പോകുന്നത്. രാവിലെ 11 മണിക്കാണ് ബജറ്റ് അവതരണം.
മുന് പ്രധാനമന്ത്രി ഇന്ദിരാഗാന്ധിക്കുശേഷം ആദ്യമായാണ് ഒരു വനിതാ കേന്ദ്ര ബജറ്റ് അവതരിപ്പിക്കുന്നത്. സംസ്ഥാനങ്ങളും ഏറെ പ്രതീക്ഷയോടെയാണ് ബജറ്റിനെ ഉറ്റുനോക്കുന്നത്.
സാമ്പത്തിക വളര്ച്ച ലക്ഷ്യം വച്ചുള്ള പ്രഖ്യാപനങ്ങള് ബജറ്റില് ഉണ്ടാകും. കൂടുതല് നിക്ഷേപം, ഉപഭോഗം, ഗ്രാമീണ കാര്ഷിക മേഖലയില് ഊന്നല്, ചെറുകിട മേഖലയില് കൂടുതല് തൊഴിലവസരങ്ങളുണ്ടാക്കല്, അടിസ്ഥാന വികസന മേഖലയില് കൂടുതല് പരിഷ്കരണവും സ്വകാര്യവത്കരണവും, തൊഴില് പരിഷ്കരണം, പൊതുമേഖലാ സ്ഥാപനങ്ങളുടെ ഓഹരി വില്പ്പന, ഓഹരി വിപണി, കയറ്റുമതി തുടങ്ങിയവയുമായി ബന്ധപ്പെട്ട് ഒട്ടേറെ പ്രഖ്യാപനങ്ങളും പദ്ധതികളും പ്രതീക്ഷിക്കാം.
ചെറുകിട ഇടത്തരം മേഖലകള്ക്കും കാര്ഷികമേഖലയ്ക്കും വായ്പ കൂടുതല് ഉദാരമാക്കിയേക്കും. കാര്ഷിക- ഗ്രാമീണ മേഖല, ജലസംരക്ഷണം തുടങ്ങിയവക്ക് പ്രത്യേക പദ്ധതികള് ഉണ്ടാവാം. ഭവന നിര്മ്മാണ മേഖലയുമായി ബന്ധപ്പെട്ട് ഇളവുകള് ഉണ്ടാകാന് സാധ്യതയുണ്ട്.
