പാലാഴിമഥനകാലത്ത് ഉത്ഭവിച്ച സുലക്ഷ്ണയെന്ന സുന്ദരകന്യക പാര്വതിയുടെ പരിചാരികയായിരുന്നു. ഒരിക്കല് അവളെ വാമദേവന് ഏകാന്തതയില് പരിഗ്രഹിക്കാനിടയായി. ആശങ്കാകുലയായി തീര്ന്ന കന്യകയെ പരമശിവന് ആശ്വസിപ്പിച്ചു. ‘നീ വിവാഹിതയായി ഭര്തൃസംഗമമുണ്ടായതിനു ശേഷമേ ഈ തേജോധാരണം രണ്ടായി പിരിഞ്ഞ് ഗര്ഭമായി പരിണമിക്കുകയുള്ളൂ ‘ എന്നാല് ഇക്കാര്യങ്ങളെല്ലാം ദിവ്യദൃഷ്ടിയാല് അറിഞ്ഞ പാര്വതി , സുലക്ഷണയെ ‘നീയൊരു മണ്ഡൂകമായി പരിണമിക്കട്ടെ’ എന്ന് ശപിച്ചു.
കാലം കുറേക്കഴിഞ്ഞപ്പോള് മയനെന്ന അസുരശില്പി ശിവനെ പ്രസാദിപ്പിച്ച് തനിക്കൊരു മകള് വേണമെന്ന് അപേക്ഷിച്ചു. ശിവന് പാര്വതിയോട് പറഞ്ഞ് സുലക്ഷണയുടെ ശാപംമാറ്റി. മണ്ഡൂകത്തെ മണ്ഡോദരിയാക്കി മയന് മകളായി നല്കി. മണ്ഡോദരിയെ പിന്നീട് രാവണന് വിവാഹം ചെയ്തു നല്കി. സുലക്ഷ്ണയെന്ന മണ്ഡോദരി പ്രസവിച്ച ആദ്യസന്താനമാണ് ഈ കാനീനന്. ( മേഘനാദന്) . രാവണന്റെ പുത്രനായതിനാല് രാവണിയെന്നും പേരുവന്നു.
പ്രസവിച്ചപ്പോള് തന്നെ മേഘഗര്ജനം പോലുള്ള ശബ്ദം മുഴക്കിയതിനാല് നല്കിയ പേരാണ് മേഘനാദന്. പരമശിവനില് നിന്ന് സകലമായാജാലങ്ങളും അഭ്യസിച്ചതിനാല് മായാവിയെന്നും അറിയപ്പെട്ടു.
ഒരിക്കല് രാവണന് സ്വര്ഗം ആക്രമിച്ചു കൊണ്ടിരിക്കെ മേഘനാദന് ഇന്ദ്രനെ തട്ടിയെടുത്ത് ലങ്കയിലേക്ക് പോന്നു. ബ്രഹ്മാവെത്തിയാണ് ഇന്ദ്രനെ മോചിപ്പിച്ചത്. ഇന്ദ്രനെ ജയിച്ചവനെന്ന അര്ഥത്തില് ഇന്ദ്രജീത് എന്ന പേരു വീണത് അങ്ങനെയാണ്.
രാവണന് സര്വലോകങ്ങളും കീഴടക്കിക്കൊണ്ടിരുന്ന കാലത്ത് നികുംഭിലയില് വെച്ച് മഹാഹോമാദികള് നടത്തി ബ്രഹ്മാവിനെ മേഘനാദന് പ്രത്യക്ഷപ്പെടുത്തി നിരവധി വരിഷ്ഠ വരങ്ങള് നേടി. എവിടെയും എങ്ങനെയും സഞ്ചരിക്കാവുന്ന വിമാനം, ആയുധങ്ങളൊന്നും ഏല്ക്കാത്ത ദിവ്യകഞ്ചുകം. ആരിലും എവിടേയും ഫലിക്കുന്ന അത്ഭുതായുധം, മായാജാലം തുടങ്ങിയവയെല്ലാം മേഘനാദന് സിദ്ധിച്ച അപൂര്വ വരങ്ങളാണ്. സത്യബ്രഹ്മചാരിയും നിത്യനിരാഹാരനും നിര്ന്നിദ്രനുമായി പതിനാലു വര്ഷം കഴിഞ്ഞുകൂടിയ സമപ്രായക്കാരനുമാത്രമേ മേഘനാദനെ വധിക്കാനാകൂ.
ഇക്കാര്യങ്ങളെല്ലാം തനിക്കു മാത്രമേ അറിയുകയുള്ളൂവെന്ന് വിഭീഷണന് ലക്ഷ്മണനെ രഹസ്യമായി അറിയിച്ചു. ‘യുദ്ധത്തില് പലതരം മായാപ്രയോഗങ്ങള് അവന് നടത്തും. ഇക്കാര്യങ്ങളെല്ലാം മേഘനാദനോട് ഏറ്റുമുട്ടുമ്പോള് മനസ്സിലുണ്ടാകണം. ലക്ഷ്മണ കുമാരാ, താങ്കള്ക്കല്ലാതെ മറ്റാര്ക്കും അവനെ വധിക്കാനാകില്ല. ‘ മേഘനാദന്റെ പ്രത്യേകതകളും അവനോട് യുദ്ധം ചെയ്യേണ്ടതെങ്ങനെയെന്നും വിഭീഷണന് സവിസ്തരം ലക്ഷ്മണനെ ബോധ്യപ്പെടുത്തി.
വാനരരാക്ഷസ സേനകള് യുദ്ധം തുടങ്ങി. വാനരപ്രവരന്മാരായ സുഗ്രീവന്, ഹനുമാന്, അംഗദന്, നളന്, നീലന്, കുമുദന്, വിവിദന് തുടങ്ങിയവര് രാക്ഷസസൈന്യത്തലവന്മാരായ പ്രസേനനന്, വജ്രനാസന്, ധൂമ്രാക്ഷന് വക്രദംഷ്ട്രന്, മഹാപാര്ശ്വന്, വിരൂപാക്ഷന്, നക്രവക്രന് തുടങ്ങിയവരോട് ഏറ്റുമുട്ടി.
(തുടരും)
