കണ്ണൂര്: തളാപ്പ് ചിന്മയ വനിതാ കോളേജില് അധ്യാപികമാര് ശാസിച്ചതിനെ തുടര്ന്ന് വിദ്യാര്ഥിനി ബോധരഹിതയായെന്ന് ആരോപിച്ച് എസ്എഫ്ഐ പ്രവര്ത്തകര് കോളേജില് അഴിഞ്ഞാടി. എസ്എഫ്ഐ പ്രവര്ത്തകരുടെ നേതൃത്വത്തില് പ്രകടനമായെത്തിയാണ് കോളജില് അക്രമം നടത്തിയത്. അക്രമത്തില് കോളജിലെ ജനല്ച്ചില്ലുകളും ചെടിച്ചട്ടികളും കാറിന്റെ ചില്ലുകളും തകര്ന്നു. സംഭവത്തില് എസ്എഫ്ഐ ജില്ലാ പ്രസിഡന്റ് സി.പി ഷിജു, മുഹമ്മദ് ഫാസില്, മുബഷിര് എന്നിവരെ പോലീസ് കസ്റ്റഡിയിലെടുത്തു.
ചിന്മയാ വിദ്യാലയത്തില് ഏതാനും ദിവസം മുമ്പ് നടന്ന സമരവുമായി ബന്ധപ്പെട്ട് നേതൃത്വം നല്കിയ വിദ്യാര്ഥികളെ കഴിഞ്ഞ ദിവസങ്ങളില് മാനേജ്മെന്റും അധ്യാപകരും ചോദ്യം ചെയ്തുവെന്നാണ് ഒരു വിഭാഗം വിദ്യാര്ത്ഥിനികള് പറയുന്നത്. വിദ്യാര്ത്ഥികളുടെ രക്ഷിതാക്കളെ വിളിച്ച് പ്രിന്സിപ്പാള് ഇക്കാര്യങ്ങള് സംസാരിക്കുകയും ഇത്തരത്തിലുളള ഒരു സംഭവവും കോളേജ് അധികൃതരുടെ ഭാഗത്തു നിന്നും നടക്കുന്നില്ലെന്നും ബോധ്യപ്പെടുത്തുകയും ചെയ്തിരുന്നു.
അതിനുശേഷം ഒരു കൂട്ടം അധ്യാപികമാര് പിജി പഠനം നടത്തുന്ന ഒരു വിദ്യാര്ഥിനിയെ ശാസിച്ചതായും ഇത് വിദ്യാര്ത്ഥിക്ക് മാനസികമായി ബുദ്ധിമുട്ടുണ്ടാക്കിയതായും പറയുന്നു. ഇതിന്റെ തുടര്ച്ചയായി ഭയം കാരണം വിദ്യാര്ത്ഥി ചികിത്സ തേടിയെന്ന് ചൂണ്ടിക്കാട്ടിയാണ് എസ്എഫ്ഐ പ്രതിഷേധവുമായി എത്തിയത്. തുടര്ന്ന് പ്രതിഷേധം അക്രമത്തില് കലാശിക്കുകയായിരുന്നു. ലൈബ്രറി കേന്ദ്രീകരിച്ച് എസ്എഫ്ഐ പ്രവര്ത്തകര് നടത്തുന്ന കോളേജിനെതിരായ നീക്കങ്ങളെ ചോദ്യം ചെയ്തതിലുളള അരിശമാണ് അക്രമത്തിന് കാരണമായതെന്ന് പറയപ്പെടുന്നു.
അതേസമയം കാമ്പസിനകത്ത് കരുതിക്കൂട്ടി പ്രശ്നങ്ങളുണ്ടാക്കാന് ഒരു വിഭാഗം നടത്തിയ ഗൂഢ നീക്കത്തിന്റെ ഭാഗമാണ് ഇന്നലെ നടന്ന സംഭവ വികാസങ്ങളെന്ന് മാനേജ്മെന്റ് അധികൃതര് അറിയിച്ചു. കോളേജില് വരാത്ത വിദ്യാര്ത്ഥിയെ ശാസിച്ചുവെന്നും ആശുപത്രിയില് പ്രവേശിപ്പിച്ചുവെന്നുമുളളത് കെട്ടിച്ചമച്ച കഥയാണ്. വര്ഷങ്ങളായി നല്ല നിലയില് പ്രവര്ത്തിക്കുന്ന ചിന്മയ കോളേജിനെ കരിവാരിത്തേക്കാനും പൂട്ടിക്കാനുമുളള ചില ശക്തികളുടെ ഗൂഢനീക്കമാണ് അക്രമത്തിനും ആരോപണങ്ങള്ക്കും പിന്നിലെന്നും ചിന്മയ മാനേജ്മെന്റ് അധികൃതര് പറഞ്ഞു.
കോളേജിന് തിങ്കളാഴ്ചവരെ അവധി
കണ്ണൂര്: കണ്ണൂര് തളാപ്പില് പ്രവര്ത്തിക്കുന്ന ചിന്മയ മിഷന് വനിതാ കോളേജില് തിങ്കളാഴ്ചവരെ അധ്യയനം ഉണ്ടായിരിക്കില്ലെന്ന് കോളേജ് അധികൃതര് അറിയിച്ചു.
