ബെംഗളൂരു: പശ്ചിമ ബംഗാളിലെ ബര്ദ്വാനിനടുത്ത് ഖഗ്രാഗറില്2014ല് നടന്ന സ്ഫോടന കേസിലെ പ്രതിയായ ഒരു ജമാഅത്ത് ഉല് മുജാഹിദീന് (ജെഎന്ബി) ഭീകരനെ കൂടി ബെംഗളൂരുവില് നിന്ന് ദേശീയ അന്വേഷണ സംഘം (എന്ഐഎ) പിടികൂടി. ഹബിബുര് റഹ്മാന് ഷെയ്ക് (27) ആണ് അറസ്റ്റിലായത്. ഹബിബുര് കബൂര് ഷെയ്ക്, ഹബിബുര് എസ്.കെ എന്നീ പേരുകളിലും ഇയാള് അറിയപ്പെട്ടിരുന്നു.
ബെംഗളൂരിവിനു സമീപം ദൊഡ്ഡബെല്ലാപ്പുരയില് ഒരു മുസ്ലീം പള്ളിയോടു ചേര്ന്നുള്ള സ്ഥലത്ത് ഒളിവില് കഴിയുകയായിരുന്നു ഇയാള്. എന്ഐഎയ്ക്ക് ലഭിച്ച രഹസ്യവിവരത്തെ തുടര്ന്ന് കഴിഞ്ഞ ദിവസം പുലര്ച്ചെ നടത്തിയ പരിശോധനയിലാണ് ഇയാള് വലയിലായത്. ഇയാള് പാനിപൂരി കച്ചവടം നടത്താനുള്ള പദ്ധതി തയ്യാറാക്കി വരികയായിരുന്നു.
ജെഎന്ബി മുതിര്ന്ന നേതാക്കളായ ജാഹിദുള് ഇസ്ലാം (കന്സൂര്), റഹ്മത്തുള്ള ഷെയ്ക്, മൗലാന യൂനഫ് എന്നിവരുടെ അടുത്ത അനുയായിയാണ് അറസ്റ്റിലായ ഹബിബുര് ഷെയ്ക്. 2015 മാര്ച്ചില് ഇയാള്ക്കെതിരെയുള്ള കുറ്റപത്രം എന്ഐഎ കോടതിയില് സമര്പ്പിച്ചിരുന്നു. ഇന്ത്യയിലും ബംഗ്ലാദേശിലും നടന്ന നിരവധി തീവവ്രാദ ആക്രമണങ്ങളില് ഇയാള്ക്കു പങ്കുള്ളതായി എന്ഐഎ ഉദ്യോഗസ്ഥന് പറഞ്ഞു.
ജെഎന്ബിയുടെ സജീവ പ്രവര്ത്തകനായ ഇയാള് നിരവധി തീവ്രവാദ പരിശീലന ക്യാമ്പുകളില് പങ്കെടുത്തിട്ടുണ്ട്. ബെംഗളൂരു എന്ഐഎ പ്രത്യേക കോടതിയില് ഹാജരാക്കി കസ്റ്റഡിയില് വാങ്ങി കൊല്ക്കത്തയിലേക്ക് കൊണ്ടുപോയി.
ഇതേ കേസിലെ പ്രധാന സൂത്രധാരനില് ഒരാളായ കൊടുംഭീകരന് മുഹമ്മദ് ജാഹിദുള് ഇസ്ലാം (28) നെ 2018 ആഗസ്റ്റ് ഏഴിന് ബെംഗളൂരു രാമനഗരയില് നിന്ന് എന്ഐഎ അറസ്റ്റു ചെയ്തിരുന്നു.
മുഹമ്മദിന്റെ താമസ സ്ഥലത്ത് നിന്നും കമ്പ്യൂട്ടര്, സ്ഫോടന വസ്തുക്കള്, കര്ണാടകയിലെ വിനോദ സഞ്ചാരകേന്ദ്രങ്ങള്, ക്ഷേത്രങ്ങളുടെയും പള്ളികളുടെയും ചിത്രങ്ങള് എന്നിവ പിടിച്ചെടുത്തിരുന്നു. 2013ല് ഏഴുപേര്ക്ക് പരിക്കേറ്റ ബുദ്ധ ഗയ ബോംബ് സ്ഫോടന കേസിലെ പ്രധാന ആസൂത്രകരില് ഒരാളായിരുന്നു മുഹമ്മദ്. 2005ല് ബംഗ്ലാദേശ് സര്ക്കാരും 2018മെയില് ഇന്ത്യും നിരോധിച്ച സംഘടനയാണ് ജമാഅത്ത് ഉല് മുജാഹിദീന് (ജെഎന്ബി)
