കൊച്ചി: തൃശൂര്‍ കേരളവര്‍മ്മ കോളേജില്‍ അയ്യപ്പസ്വാമിയെ നിന്ദിച്ച് എസ്എഫ്‌ഐക്കാര്‍ ഫള്ക്‌സ് സ്ഥാപിച്ച സംഭവത്തെ വിമര്‍ശിച്ച് എബിവിപി ദേശീയ സെക്രട്ടറി ശ്യാം രാജ്.
കേരളത്തിലെ എസ്എഫ്‌ഐയും, പോരാളി ഷാജിയും, റിപ്പോര്‍ട്ടര്‍ ചാനലും, പിന്നെ നമ്മുടെ ടീച്ചറും ഇത്തിരി കഷ്ടത്തിലാണെന്ന് പറഞ്ഞ ശ്യാംരാജ് ഇവര്‍ക്കാര്‍ക്കും പണ്ടത്തെ പോലെ ഒരു ഗുമ്മു പോരെന്നും പരിഹസിച്ചു.
എബിവിപിയൊക്കെ എല്ലാ ക്യാമ്പസിലും നല്ല രീതിയില്‍ പ്രവര്‍ത്തിച്ചു തുടങ്ങിയതിനാല്‍ എല്ലാ വര്‍ഷത്തേയും പോലെ, ഒരു കുത്തിത്തിരിപ്പ് ഉണ്ടാക്കാമെന്ന എസ്എഫ്ഐയുടെ ധാരണ തെറ്റി.
ഭക്തര്‍ക്ക് അംഗീകരിക്കാന്‍ പറ്റാത്ത രീതിയില്‍ സ്വാമി അയ്യപ്പന്റെ ചിത്രം ക്യാമ്പസില്‍ വരച്ചു വച്ചാല്‍ അടിയുണ്ടാകുമെന്ന എസ്എഫ്ഐയുടെ ചിന്ത പാളി. ക്യാമ്പസില്‍ അവര്‍ പ്രതീക്ഷിച്ചതു പോലെ അടിയുണ്ടായില്ലെന്ന് മാത്രമല്ല, വരച്ച പോസ്റ്ററുമെടുത്ത് കണ്ടം വഴി ഓടേണ്ടിയും വന്നു, പോലീസ് കേസുമായി, പോരാത്തതിന് സിപിഎം ഓഫീസില്‍ നിന്ന് നല്ല ചീത്ത വിളിയും കേട്ടു.
തുടര്‍ന്ന് ആ ചിത്രം തങ്ങള്‍ വരച്ചതല്ലെന്ന് സ്ഥാപിക്കാനായി നെട്ടോട്ടമോടിയ എസ്എഫ്ഐയുടെ മുന്‍കാല ചരിത്രം അറിയാവുന്ന നാട്ടുകാര്‍ അതും വിശ്വസിച്ചില്ല. പക്ഷേ പോരാളി ഷാജിയും കൂട്ടരും വെറുതെ ഇരുന്നില്ലെന്നും അടുത്ത ഉടായിപ്പ് ഉടന്‍ ഇറക്കിയ അവര്‍ എബിവിപി യൂണിറ്റ് വൈസ് പ്രസിഡന്റ് പ്രണവ് ജി കൃഷ്ണന്റെ ക്ഷമാപണം എന്ന പേരില്‍ ഒരു സ്‌ക്രീന്‍ ഷോട്ട് ഉണ്ടാക്കിയെന്നും (സാധാരണ ഇവരുണ്ടാക്കുന്ന ഫെയ്‌ക്കിന്റെ പേര് വിഷ്ണു എന്നാണ്. ബുദ്ധിപൂര്‍വം പേര് മാറ്റിപ്പിടിച്ചു) ശ്യാം രാജ് വിമര്‍ശിച്ചു
എന്നാല്‍ പ്രണവ് എന്ന് പേരുള്ള എബിവിപി പ്രവര്‍ത്തകന്‍ കേരളവര്‍മ്മ കോളേജിലില്ലെന്ന് അറിയാത്ത അവരുടെ ഈ പദ്ധതിയും പാളി. ഇവിടെ എബിവിപി യൂണിറ്റ് വൈസ് പ്രസിഡന്റ് അനഘ സന്തോഷാണ്. എന്തായാലും ഈ സംഭവത്തെ തുടര്‍ന്ന് അനഘ പോലീസ് സ്റ്റേഷനില്‍ പരാതി നല്‍കിയിട്ടുണ്ട്.
ഇടത് വിദ്യാര്‍ത്ഥി സംഘടനയെ കണക്കിന് വിമര്‍ശിച്ച ശ്യാം രാജ് എസ്എഫ്‌ഐ സംസ്ഥാന നേതൃത്വത്തോട് പരിഹാസ രൂപേണ ചോദ്യം ചോദിക്കാനും മറന്നില്ല. ‘അല്ല ചങ്ങായിമാരേ, നിങ്ങള്‍ക്കീ പിള്ളാരോട് പണിയെടുത്ത് ജീവിക്കാന്‍ പറഞ്ഞു കൂടേ അല്ലേല്‍ വേണ്ട, ഇങ്ങനെയൊക്കെ അങ്ങ് പോട്ടേന്ന്. എന്തായാലും, ഞങ്ങളിതിലൊന്നും വന്ന് കൊത്താന്‍ പോകുന്നില്ല…..’
