തിരുവനന്തപുരം:രാജ്യത്ത് ഡിജിറ്റൽ ഗാർഡനുള്ള ആദ്യ രാജ്ഭവനെന്ന നേട്ടം കേരള രാജ്ഭവന് സ്വന്തം. രാജ്ഭവനിലെ 183-ഓളം വൃക്ഷയിനങ്ങളിൽ പതിപ്പിച്ച ലേബലിലെ ക്യൂ ആർ കോഡ് സ്കാൻ ചെയ്താൽ ആ വ്യക്ഷത്തിന്റെ പ്രാദേശിക നാമം, ശാസ്ത്രീയ നാമം, പൂവ്, കായ്, സസ്യകുടുംബം, പ്രത്യേകത, ഉപയോഗങ്ങൾ തുടങ്ങിയവ അറിയാനാകും. ഇതിനായി ട്രീസ് ഓഫ് കേരള രാജ്ഭവൻ എന്ന വെബ്സൈറ്റും രൂപകല്പന ചെയ്തിട്ടുണ്ട്.
കേരള യൂണിവേഴ്സിറ്റി കാര്യവട്ടം ക്യാമ്പസിലെ സെന്റർ ഫോർ ബയോഡൈവേഴ്സിറ്റി ഡയറക്ടർ ഡോ. എ. ഗംഗാപ്രസാദിന്റേയും റിസർച്ച് സ്കോളർ അഖിലേഷ് എസ്. വി. നായരുടേയും ശ്രമഫലമായാണ് ഈ നേട്ടം കൈവരിക്കാനായത്. രാജ്ഭവനിൽ കേരള യൂണിവേഴ്സിറ്റി വൈസ് ചാൻസലർ ഡോ. മഹാദേവൻപിള്ള മരങ്ങളുടെ ഡിജിറ്റലൈസേഷന്റെ അച്ചടിപ്പതിപ്പ് ഗവർണർ പി. സദാശിവത്തിന് കൈമാറി.
പൊതു സ്ഥലങ്ങളിൽ ഇത്തരത്തിലുള്ള സംരംഭം കനകക്കുന്ന് കൊട്ടാരവളപ്പിലാണുള്ളത്. അതും ഇവരുടെ നേതൃത്വത്തിൽ തന്നെയാണ് ചെയ്തത്.
