ബെംഗളൂരു: ലോക്‌സഭാ തെരഞ്ഞെടുപ്പില്‍ ജെഡിഎസ്സുമായി സഖ്യം ഉണ്ടാക്കിയതാണ് കര്‍ണ്ണാടകയില്‍ ഉണ്ടായ പരാജയത്തിനു കാരണമെന്ന് കോണ്‍ഗ്രസ് നേതാവും മുന്‍ കേന്ദ്രമന്ത്രിയുമായ വീരപ്പ മൊയ്‌ലി. സംസ്ഥാനത്ത് സഖ്യമില്ലാതെ ഒറ്റയ്‌ക്ക് മത്സരിച്ചിരുന്നെങ്കില്‍ പതിനഞ്ചോ പതിനാറോ സീറ്റില്‍ കോണ്‍ഗ്രസിന് ജയിക്കാന്‍ കഴിയുമായിരുന്നുവെന്നും അദ്ദേഹം പറഞ്ഞു.
ചിക്കബെല്ലാപ്പൂര്‍ സീറ്റില്‍ നിന്ന് വീരപ്പമൊയ്ലിയും ഇത്തവണ പരാജയപ്പെട്ടിരുന്നു. സഖ്യമില്ലായിരുന്നെങ്കില്‍ ചിക്കാബല്ലാപൂര്‍ മാത്രമല്ല. മറ്റ് മണ്ഡലങ്ങളിലും നൂറ് ശതമാനം ഉറപ്പായും ജയിച്ചേനെ. സഖ്യത്തെ വിശ്വസിച്ചത് തെറ്റായിപ്പോയി, തെരഞ്ഞെടുപ്പില്‍ ഞങ്ങളുടെ ജനങ്ങള്‍ എനിക്ക് എതിരായെന്ന് വളരെ വ്യക്തമാണെന്നും വീരപ്പ മൊയ്‌ലി പറഞ്ഞു. മാധ്യമ പ്രവര്‍ത്തകരോട് സംസാരിക്കവേയാണ് ഇക്കാര്യം വ്യക്തമാക്കിയത്.
അതേസമയം തെരഞ്ഞെടുപ്പില്‍ കോണ്‍ഗ്രസ് പ്രവര്‍ത്തകര്‍ തന്നെ താങ്കളെ എതിര്‍ത്തത് എന്തുകൊണ്ടാണെന്ന ചോദ്യത്തിന് അദ്ദേഹം കൂടുതല്‍ വിവരങ്ങള്‍ വെളിപ്പെടുത്തിയില്ല. കാരണം പണമോ അധികാരമോ ആയിരിക്കാം എന്ന് മാത്രമാണ് മറുപടി നല്‍കിയത്.
സംസ്ഥാന സര്‍ക്കാരിന്റെ കാര്യക്ഷമതയില്ലായ്‌മയും ലോക്സഭ തെരഞ്ഞെടുപ്പില്‍ മോശം ഫലം ലഭിക്കാന്‍ കാരണമാകുമെന്ന് സൂചിപ്പിച്ച അദ്ദേഹം, സര്‍ക്കാരിനെ രക്ഷിക്കുക മാത്രമല്ല അധികാരത്തിലിരിക്കുന്നവര്‍ ജനങ്ങളുടെ ആവശ്യങ്ങള്‍ പരിശോധിക്കുകയും വേണമെന്നും വീരപ്പ മൊയ്‌ലി പറഞ്ഞു. ഇത്തരത്തില്‍ മോശമായ ഒരു അനുഭവം ഇനി ഉണ്ടാകാന്‍ പാടില്ല, കോണ്‍ഗ്രസിനെ അടിത്തട്ടില്‍ നിന്ന് പുനഃസംഘടിപ്പിക്കണമെന്നും അദ്ദേഹം ആവശ്യപ്പെട്ടു.
വീരപ്പ മൊയ്ലിയെ ബിജെപി സ്ഥാനാര്‍ത്ഥിയായ ബി.എന്‍ ബച്ചേ ഗൗഡ 1,82,110 വോട്ടുകള്‍ക്കാണ് പരാജയപ്പെടുത്തിയത്. കര്‍ണ്ണാടകയിലെ 28 ലോക്സഭ സീറ്റില്‍ 25 സീറ്റ് ബിജെപിക്കാണ്. ബാക്കി ഓരോ സീറ്റ് വീതം കോണ്‍ഗ്രസും ജെഡിഎസും നേടി. കൂടാതെ ബിജെപി പിന്തുണയോടെ മത്സരിച്ച സുമതല അംബരീഷിനും മണ്ഡ്യയില്‍ ഒരു സീറ്റ് ലഭിച്ചു.
