കൊല്‍ക്കത്ത: ഡോക്ടര്‍മാരുടെ സമരത്തില്‍ കേന്ദ്രം റിപ്പോര്‍ട്ട് ആവശ്യപ്പെട്ടതിന് പിന്നാലെ സമരശക്തിക്കു മുന്നില്‍ ബംഗാള്‍ മുഖ്യമന്ത്രി മമത ബാനര്‍ജി മുട്ടുമടക്കി. സമരം ചെയ്യുന്ന ഡോക്ടര്‍മാരുടെ ന്യായമായ എല്ലാ ആവശ്യങ്ങളും അംഗീകരിച്ചതായി മമത പറഞ്ഞു. ഡോക്ടര്‍മാര്‍ തിരികെ ജോലിയില്‍ പ്രവേശിക്കണമെന്നും മമത അഭ്യര്‍ഥിച്ചു.
സമരത്തിന്റെ ആറാം ദിവസം ശനിയാഴ്ച വൈകുന്നേരം വാര്‍ത്താ സമ്മേളനത്തിലാണ് മമത ഇക്കാര്യം അറിയിച്ചത്. സമരം ചെയ്ത ഡോക്ടര്‍മാര്‍ക്കെതിരെ ശക്തമായ ശിക്ഷാ നടപടികള്‍ സ്വീകരിക്കില്ലെന്നും മമത അറിയിച്ചു. ഡോക്ടര്‍മാരുടെ സമരം ശക്തമായ സാഹചര്യത്തില്‍ സ്ഥിതിഗതികള്‍ സംബന്ധിച്ച് സംസ്ഥാനത്തോട് കേന്ദ്രം റിപ്പോര്‍ട്ട് ആവശ്യപ്പെട്ടിരുന്നു. ഇതിനു പിന്നാലെയാണ് നിലപാടില്‍ മമത മാറ്റം വരുത്തിയത്. സുരക്ഷാ വീഴ്ചയുമായി ബന്ധപ്പെട്ട് ആരോഗ്യ മേഖലയില്‍ പ്രവര്‍ത്തിക്കുന്നവരില്‍ നിന്ന് നിരവധി പരാതികള്‍ ലഭിക്കുന്നുണ്ടെന്നും സംഭവത്തില്‍ ബംഗാള്‍ സര്‍ക്കാര്‍ വിശദമായ റിപ്പോര്‍ട്ട് സമര്‍പ്പിക്കണമെന്നും കേന്ദ്ര ആഭ്യന്തര മന്ത്രാലയം ആവശ്യപ്പെട്ടിട്ടുണ്ട്.
പരിക്കേറ്റ് ആശുപത്രിയില്‍ തുടരുന്ന ഡോക്ടര്‍മാരെ സന്ദര്‍ശിച്ച് മുഖ്യമന്ത്രി ക്ഷമ ചോദിക്കണം, ആക്രമണത്തെ അപലപിച്ച് പ്രസ്താവനയിറക്കണം, എന്‍ആര്‍എസ് ആശുപത്രിയില്‍ ആക്രമണമുണ്ടായ രാത്രി ഡോക്ടര്‍മാര്‍ക്ക് സുരക്ഷ ഏര്‍പ്പെടുത്തുന്നതില്‍ വീഴ്ച വരുത്തിയ പോലീസ് ഉദ്യോഗസ്ഥര്‍ക്കെതിരെ ജുഡീഷ്യല്‍ അന്വേഷണം വേണം, ആക്രമണം നടത്തിയവര്‍ക്കെതിരെ എന്ത് നടപടിയെടുത്തു എന്നതിന്റെ രേഖകള്‍ കാണിക്കണം, ജൂനിയര്‍ ഡോക്ടര്‍മാര്‍ക്കെതിരെ എടുത്തിട്ടുള്ള എല്ലാ വ്യാജ കേസുകളും റദ്ദാക്കണം എന്നീ നിബന്ധനകളും ഡോക്ടര്‍മാര്‍ മുന്നോട്ടുവച്ചിട്ടുണ്ട്.
കൊല്‍ക്കത്ത എന്‍ആര്‍എസ് മെഡിക്കല്‍ കോളേജിലെ ജൂനിയര്‍ ഡോക്ടര്‍മാരെ രോഗികളുടെ ബന്ധുക്കള്‍ കൈയേറ്റം ചെയ്തിരുന്നു. ഇതില്‍ പരിഭാ മുഖര്‍ജിയെന്ന ജൂനിയര്‍ ഡോക്ടര്‍ തലയ്‌ക്ക് പരിക്കേറ്റ് ഇപ്പോഴും അത്യാസന്ന നിലയില്‍ കോമയില്‍ തുടരുകയാണ്. സംഭവത്തില്‍ അന്വേഷണം ആവശ്യപ്പെട്ടപ്പോള്‍ മമത സര്‍ക്കാര്‍ ഡോക്ടര്‍മാര്‍ക്കെതിരെ തിരിഞ്ഞതാണ് പ്രശ്‌നങ്ങള്‍ക്കു തുടക്കം.
ബംഗാളില്‍ പലയിടങ്ങളിലും രോഗികള്‍ ഡോക്ടര്‍മാരെ കൈയേറ്റം ചെയ്യുന്നതിനെതിരെ മമത സര്‍ക്കാര്‍ നടപടിയെടുക്കാത്തതിനാലാണ് ഡോക്ടര്‍മാര്‍ സമരത്തിലേക്ക് നീങ്ങിയത്. തങ്ങളുടെ സമരം തകര്‍ക്കുക മാത്രമാണ് കൂടിക്കാഴ്ചയിലൂടെ മമത ലക്ഷ്യമിടുന്നത്. അതിനാലാണ് ചര്‍ച്ചയില്‍ പങ്കെടുക്കാന്‍ തയാറാകാത്തതെന്നും ഡോക്ടര്‍മാര്‍ അറിയിച്ചു. സംഭവത്തെ തുടര്‍ന്ന് ഐഎംഎ നാളെ രാജ്യവ്യാപക പണിമുടക്കിന് ആഹ്വാനം ചെയ്തു. അതേസമയം, ഡോക്ടര്‍മാര്‍ ചര്‍ച്ചയില്‍ പങ്കെടുക്കില്ലെന്ന് അറിയച്ചിതോടെ പരിഭയെ ആശുപത്രിയിലെത്തി സന്ദര്‍ശിക്കില്ലെന്ന് മമതയും നിലപാടെടുത്തു.
