കോയമ്പത്തൂര്: ലൗവ് ജിഹാദില് ഇരയാക്കപ്പെട്ട് ആത്മഹത്യ ചെയ്ത മകളുടെ മരണത്തിന് പിന്നിലുള്ളവരെ പിടികൂടണമെന്ന് മലയാളിയായ പിതാവ്. മതംമാറാന് നിര്ബന്ധിച്ച ജാഫര് എന്ന യുവാവിനെതിരെ തലശേരി സ്വദേശിയായ ഗംഗാധരന് കഴിഞ്ഞ ദിവസം കോയമ്പത്തൂര് പെലീസ് കമ്മീഷണര്ക്ക് പരാതി നല്കി. മകള് ആത്മഹത്യ ചെയ്തിട്ടും അതിനു പിന്നില് പ്രവര്ത്തിച്ചവരെ സംരക്ഷിക്കുന്ന നിലപാടാണ് പൊലീസ് സ്വീകരിക്കുന്നതെന്ന് അദേഹം പത്രസമ്മേളനത്തില് പറഞ്ഞു.
ശ്രീനാരായണ ഗുരു കോളേജിലെ ഒന്നാം വര്ഷ ബികോം വിദ്യാര്ഥിനി അശ്വതി ഗംഗയാണ് കുനിയമുത്തൂര് എന്ന സ്ഥലത്തെ സ്വന്തം വീട്ടില് ഏപ്രില് 25 ന് ആത്മഹത്യ ചെയ്തത്. അശ്വിനിയുടെ വീട്ടില് എത്തി ജാഫര് ഭീഷണിപ്പെടുത്തിയതിനെ തുടര്ന്നാണ് പെണ്കുട്ടി ആത്മഹത്യ ചെയ്തത്. അതിനു മുമ്പ് തന്നെ അശ്വിനിക്ക് ജാഫറില് നിന്ന് ഭീഷണി സന്ദേശങ്ങള് ലഭിച്ചിരുന്നുവെന്ന് പിതാവ് പറഞ്ഞു.
ജാഫറിന്റെ ശല്യം മൂലം വിദ്യാര്ഥിനി കോളേജില് പോവുകയോ ഫോണ് എടുക്കുകയോ ചെയ്യുന്നുണ്ടായിരുന്നില്ല. ജാഫര് വീട്ടില് വരുമെന്ന് ഭീഷണി സന്ദേശങ്ങള് അയച്ചിരുന്നു. പെണ്കുട്ടിയുടെ ആത്മഹത്യാ കുറിപ്പ് പോലീസ് പുറത്തു വിട്ടിട്ടില്ല. എന്നാല് പെണ്കുട്ടിയുടെ വീട്ടില് വച്ച് ഏതാണ്ട് അരമണിക്കൂറോളം നേരം മതം മാറ്റാന് ജാഫര് സമ്മര്ദ്ദം ചെലുത്തുകയും പുറത്തറിയിച്ചാല് കുടുംബത്തിനു സുരക്ഷിതമായി കഴിയാന് സാധിക്കാതെ വരും എന്ന് ഭീഷണിപ്പെടുത്തുകയും ചെയ്തു. അതെ തുടര്ന്നാണ് പെണ്കുട്ടി തൂങ്ങി മരിച്ചതെന്ന് പിതാവ് പറയുന്നു.
ആത്മഹത്യശ്രമം നടത്തിയ മകളെ ഗംഗാധരന് ഉടന് ആശുപത്രിയില് എത്തിച്ചെങ്കിലും രക്ഷിക്കാനായില്ല. സംഭവം അറിഞ്ഞ് പൊലീസ് സ്ഥലത്തെത്തിയെങ്കിലും ചോദ്യം ചെയ്യലുകള് ഒന്നുമുണ്ടായില്ല. പകരം ഗംഗാധരനെ അടുത്ത ദിവസം സ്റ്റേഷനിലേക്ക് വിളിപ്പിക്കുകയായിരുന്നു. പെണ്കുട്ടിയുടെ പിതാവ് സ്റ്റേഷനില് എത്തിയപ്പോഴേക്കും പോലീസ് എഫ് ഐ ആര് തയ്യാറാക്കി കഴിഞ്ഞിരുന്നു. തമിഴ് വായിക്കാന് അറിയാത്ത ഗംഗാധരനോട് ഇതില് ഒപ്പു വച്ചിട്ട് മൃതദേഹം തലശ്ശേരിയിലേക്ക് കൊണ്ടു പൊയ്ക്കൊള്ളാനായിരുന്നു പോലീസിന്റെ നിര്ദ്ദേശം. കുനിയമുത്തൂര് പോലീസ് സ്റ്റേഷനില് കേസ് റെജിസ്റ്റര് ചെയ്തുവെങ്കിലും യാതൊരു തുടര് നടപടികളും ഉണ്ടായിട്ടില്ല. പ്രതി ഇപ്പോഴും സ്വതന്ത്രനായി നടക്കുന്നു. അതേ തുടര്ന്നാണ് ലവ് ജിഹാദിനെ പറ്റി വിശദമായ അന്വേഷണം വേണമെന്ന് ആവശ്യപ്പെട്ട് പോലീസ് കമ്മീഷണര്ക്ക് പരാതി നല്കാന് ഇദേഹം തീരുമാനിച്ചത്.
ഹിന്ദു പെണ്കുട്ടികളെ ലവ് ജിഹാദ് വലയിലാക്കി മതം മാറ്റുന്ന സംഘത്തിലെ അംഗമാണ് ജാഫര് എന്ന് ഗംഗാധരന് പരാതിയില് പറയുന്നു. പ്രതിയുടെ പിന്നിലുള്ള സംഘടിത ശക്തിയെ ഭയന്ന് പോലീസിന് നടപടി എടുക്കാന് ഭയമാണെന്നും പരാതിയിലുണ്ട്.
