ആലപ്പുഴ: സംഗീത നാടക അക്കാദമിയുടെ പ്രൊഫഷണല് നാടക മത്സരത്തിലെ അവാര്ഡ് പ്രഖ്യാപനം പകല്കൊളളയെന്ന് വിമര്ശനം. മികച്ച രണ്ടാമത്തെ സംവിധായകനായ രാജീവന് മമ്മിളി, മികച്ച രണ്ടാമത്തെ നാടകകൃത്തായി തെരഞ്ഞെടുക്കപ്പെട്ട പ്രദീപ് കുമാര് കാവുന്തറ എന്നിവര് അവാര്ഡ് നിരസിച്ചു. പ്രൊഫഷണല് നാടക മത്സരങ്ങള് സത്യസന്ധവും, സുതാര്യമായും നടത്തണമെന്നും വിശ്വാസ്യത ഉറപ്പുവരുത്തണമെന്നും ആവശ്യപ്പെട്ടാണ് അവാര്ഡ് നിരസിക്കുന്നതെന്ന് ഇരുവരും പത്രസമ്മേളനത്തില് അറിയിച്ചു.
സംഗീത നാടക അക്കാദമിയുടെ എക്സിക്യൂട്ടീവ് അംഗവും നാടകകൃത്തുമായ ഫ്രാന്സീസ് ടി. മാവേലിക്കരയുടെ നാടകങ്ങള് മത്സരത്തില് അവതരിപ്പിക്കുകയും, അവാര്ഡുകള് പങ്കിട്ടെടുക്കുകയും ചെയ്തത് നീതികരിക്കാനാകില്ല. മികച്ച നാടകകൃത്തിനുള്ള അവാര്ഡ് ഫ്രാന്സീസിനായിരുന്നു. കൂടാതെ ഇദ്ദേഹം രചന നിര്വഹിച്ച നാടകങ്ങള്ക്ക് ആറ് അവാര്ഡുകള് ലഭിച്ചു. അവാര്ഡ് നിര്ണയ സമിതിയെ പോലും നിയോഗിക്കുന്ന എക്സിക്യൂട്ടീവ് കമ്മറ്റിയിലെ അംഗത്തിന് തന്നെ തുടര്ച്ചയായി അവാര്ഡുകള് ലഭിക്കുന്നത് അംഗീകരിക്കാനാകില്ല, മുന് വര്ഷവും മികച്ച നാടകകൃത്തിനുള്ള അവാര്ഡും ഫ്രാന്സീസ് ടി. മാവേലിക്കരയ്ക്കായിരുന്നു. ഇടതുസര്ക്കാര് അധികാരത്തില് വരുമ്പോള് ഇദ്ദേഹം അക്കാദമി എക്സിക്യൂട്ടീവ് അംഗമാകാറുണ്ട്.
ഇത്തവണത്തെ നാടക മത്സരം വെറും പ്രഹസനമായിരുന്നു. വേണ്ട പ്രചാരണമോ, മത്സരത്തില് പങ്കെടുക്കുന്ന സമിതികള്ക്ക് മതിയായ പ്രതിഫലമോ അക്കാദമി നല്കാറില്ല. നാടക സമിതികള്ക്കോ, കലാകാരന്മാര്ക്കോ യാതൊരു ഗുണവും അക്കാദമിയില് നിന്ന് ലഭിക്കുന്നില്ല, എങ്ങനെയെങ്കിലും മത്സരങ്ങള് നടത്തി അവാര്ഡുകള് നല്കുകയെന്ന ഒറ്റ അജണ്ടയിലൊതുങ്ങുകയാണ് അക്കാദമിയുടെ പ്രവര്ത്തനമെന്നും അവര് കുറ്റപ്പെടുത്തി.
മുന്കാലങ്ങളില് സമിതികള്ക്കും, കലാകാരന്മാര്ക്കും നല്കിയിരുന്ന ആനുകൂല്യങ്ങള് പോലും ഇപ്പോള് നിഷേധിക്കുകയാണെന്നും അവര് ചൂണ്ടിക്കാട്ടി. നാടകകൃത്ത് സി. ആര്. മനോജും പത്രസമ്മേളനത്തില് പങ്കെടുത്തു. ലളിതകലാ അക്കാദമിയുടെ അവാര്ഡ് പ്രഖ്യാപനം വിവാദത്തിലായതിന് പിന്നാലെ സംഗീതനാടക അക്കാദമിയുടെ അവാര്ഡുകളും വിവാദമായി.
