തൃശൂര്/കൊടകര/മാള: പഞ്ചവാദ്യ കുലപതി ഇനി ഓര്മ്മ. ഉത്സവപ്പറമ്പുകളില് വാദ്യപെരുമഴ പെയ്യിക്കുന്ന തിമിലപ്രമാണി അന്നമനട പരമേശ്വര മാരാര്ക്ക് സാംസ്കാരിക കേരളം പ്രണാമം അര്പ്പിച്ചു. കൊടകരയിലും അന്നമനടയിലും പൊതുദര്ശനത്തിന് വച്ച ഭൗതിക ശരീരത്തില് അന്ത്യാഞ്ജലി അര്പ്പിക്കാനെത്തിയത് വാദ്യപ്രേമികളടക്കം ആയിരങ്ങള്. സംസ്കാരം ഇന്നലെ വൈകിട്ട് പാമ്പാടി ഐവര്മഠത്തില് ഔദ്യോഗിക ബഹുമതികളോടെ നടത്തി.
അന്നമനടയുടെ ഭൗതിക ശരീരം ഇന്നലെ രാവിലെ 9.30 മുതല് ഉച്ചയ്ക്ക് 12 വരെ കൊടകര കാവില് എന്എസ്എസ് കരയോഗം ഹാളില് പൊതുദര്ശനത്തിനു വച്ചു. സമൂഹത്തിന്റെ വിവിധ തുറകളിലുള്ള ആയിരങ്ങളാണ് അന്തിമോപചാരമര്പ്പിക്കാനെത്തിയത്. മുഖ്യമന്ത്രിക്ക് വേണ്ടി ജില്ലാ കളക്ടര് ടി.വി. അനുപമ റീത്ത് സമര്പ്പിച്ചു. മന്ത്രി പ്രൊഫ.സി. രവീന്ദ്രനാഥിനു വേണ്ടി കൊടകര പഞ്ചായത്ത് പ്രസിഡന്റ് പി.ആര്. പ്രസാദന്, മന്ത്രി വി.എസ്. സുനില്കുമാറിനു വേണ്ടി ജില്ലാ പഞ്ചായത്ത് പൊതുമരാമത്ത് സ്റ്റാന്ഡിങ് കമ്മിറ്റി ചെയര്മാന് കെ.ജെ. ഡിക്സന് എന്നിവര് റീത്തു സമര്പ്പിച്ചു.
കലാമണ്ഡലം ഗോപി, വാദ്യ-മേള രംഗത്തെ പ്രമുഖരായ പെരുവനം കുട്ടന് മാരാര്, കോങ്ങാട് മധു, കിഴക്കൂട്ട് അനിയന് മാരാര്, കുനിശേരി ചന്ദ്രന്, ചോറ്റാനിക്കര വിജയന്, പരക്കാട് തങ്കപ്പമാരാര്, തിച്ചൂര് മോഹനന്, കുന്നിശേരി അനിയന് മാരാര്, കലാമണ്ഡലം വൈസ് ചാന്സലര് ഡോ.ടി.കെ. നാരായണന്, സംഗീത നാടക അക്കാദമി സെക്രട്ടറി രാധാകൃഷ്ണന് നായര്, ബിജെപി ജില്ലാ പ്രസിഡന്റ് എ. നാഗേഷ്, പട്ടിക മോര്ച്ച ദേശീയ വൈസ് പ്രസിഡന്റ് ഷാജുമോന് വട്ടേക്കാട്, വിവിധ രാഷ്ട്രീയ കക്ഷി നേതാക്കള് അന്തിമോപചാരമര്പ്പിക്കാനെത്തി. കേരള കലാമണ്ഡലം, കൊച്ചിന് ദേവസ്വം ബോര്ഡ്, കേരള സംഗീത നാടക അക്കാദമി തുടങ്ങി നിരവധി സ്ഥാപനങ്ങള്ക്ക് വേണ്ടിയും റീത്ത് സമര്പ്പിച്ചു.
സംസ്ഥാന ബഹുമതികളോടെ സംസ്കാര ചടങ്ങുകള് നടത്തുന്നതിന്റെ ഭാഗമായി പോലീസ് ഗാര്ഡ് ഓഫ് ഓണര് നല്കി. തുടര്ന്ന് പരമേശ്വര മാരാരുടെ ജന്മസ്ഥലമായ അന്നമനടയിലേക്ക് മൃതദേഹം കൊണ്ടു പോയി. അന്നമനട പഞ്ചായത്ത് സ്മൃതി മണ്ഡപത്തില് പൊതുദര്ശത്തിന് വെച്ചു.
