കൊല്ക്കത്ത: കാളിഘട്ട് പോസ്റ്റ് ഓഫീസില് ജയ് ശ്രീറാം എന്നെഴുതിയ പോസ്റ്റ് കാര്ഡുകള് നിറയുന്നു. ജയ് ശ്രീറാം മന്ത്രത്തോട് അസഹിഷ്ണുത കാട്ടുന്ന ബംഗാള് മുഖ്യമന്ത്രി മമത ബാനര്ജിക്കുള്ള ബിജെപി പ്രവര്ത്തകരുടെ മറുപടിയാണിത്.
കാളിഘട്ട് പോസ്റ്റ് ഓഫീസിന്റെ പരിധിയിലാണ് മമതയുടെ ഔദ്യോഗിക വസതി. വ്യാഴാഴ്ച മാത്രം 4500 പോസ്റ്റ്കാര്ഡുകള് പോസ്റ്റ്മാന് മമതയുടെ വീട്ടിലെത്തിച്ചു. സംസ്ഥാനത്തിന്റെ പല ഭാഗത്തും യാത്ര ചെയ്യുമ്പോള് ജയ് ശ്രീറാം മുഴങ്ങുമ്പോള് മമത രോഷാകുലയായിരുന്നു. പലയിടത്തും ബിജെപി പ്രവര്ത്തകരെ അറസ്റ്റ് ചെയ്തു. വാഹനത്തില് നിന്നു പുറത്തിറങ്ങി മമത വെല്ലുവിളിക്കുന്ന ദൃശ്യങ്ങളും പ്രചരിച്ചു.
ഈ ഘട്ടത്തിലാണ് പ്രതിഷേധമറിയിക്കാന് ജയ് ശ്രീറാം എന്നെഴുതിയ പോസ്റ്റ് കാര്ഡുകള് മമതയ്ക്ക് അയയ്ക്കാന് ബിജെപി നേതാക്കള് ആഹ്വാനം ചെയ്തത്. കഴിഞ്ഞ ദിവസങ്ങളില് ആയിരക്കണക്കിന് പോസ്റ്റ് കാര്ഡുകളാണ് മമതയ്ക്ക് ലഭിച്ചത്.
