അമേത്തി : കേന്ദ്രമന്ത്രി സ്മൃതി ഇറാനിയുടെ അടുത്ത സഹായിയും മുന് ഗ്രാമത്തലവനുമായ സുരേന്ദ്ര സിങ്ങിന്റെ കൊലപാതകത്തിനു പിന്നില് ബിജെപി പ്രവര്ത്തകര് തന്നെയെന്ന് വാര്ത്തകള്ക്കെതിരെ ഉത്തര്പ്രദേശ് പോലീസ്. ഇത്തരത്തില് വ്യാജ വാര്ത്തകള് പ്രചരിപ്പിക്കുന്നവര്ക്കെതിരെ കേസ് എടുക്കുമെന്നും യുപി പോലീസ് അറിയിച്ചു.
കൊലപാതകത്തിനു പിന്നില് ഏതെങ്കിലും പാര്ട്ടിയാണെന്നു പറഞ്ഞിട്ടില്ല. ഇത്തരത്തിലുള്ള പ്രചാരണങ്ങള് അടിസ്ഥാനരഹിതമാണെന്നും യുപി പോലീസ് ഔദ്യോഗിക ട്വിറ്റര് അക്കൗണ്ടിലൂടെ വ്യക്തമാക്കി. സംഭവവുമായി ബന്ധപ്പെട്ട് മൂന്നുപേരെ പോലീസ് അറസ്റ്റ് ചെയ്തതായി ഡിജിപി ഒ.പി. സിങ് അറിയിച്ചു. രണ്ടുപേര് ഒളിവിലാണ്. അഞ്ചുപേര് ചേര്ന്നാണ് കൊലപാതകം നടത്തിയതെന്നാണു സൂചന.
ലോക്സഭ തെരഞ്ഞെടുപ്പിന്റെ ഫലം പുറത്തുവന്നതിനു പിന്നാലെയാണ് അമേഠിയില് നടുക്കുന്ന കൊലപാതകം നടന്നത്. സ്മൃതിയുടെ വിജയത്തിനു പിന്നില് പ്രവര്ത്തിച്ചവരില് പ്രധാനിയായിരുന്നു ബരോലി ഗ്രാമത്തിലെ മുന് ഗ്രാമത്തലവനായ സുരേന്ദ്രസിങ്. ഇദ്ദേഹത്തെ വീടിനു മുന്നില് വെടിയേറ്റ് മരിച്ചനിലയില് പിറ്റേന്ന് കണ്ടെത്തുകയായിരുന്നു.
എന്നാല് ബിജെപി പ്രാദേശിക പ്രവര്ത്തകരാണ് കൊലപാതകത്തിന് പിന്നിലെന്ന് ചില ഓണ്ലൈന് മാധ്യമങ്ങള് വ്യാജ വാര്ത്തകള് ഇതുമായി ബന്ധപ്പെട്ട് പ്രചരിപ്പിക്കുകയായിരുന്നു. മലയാളത്തിലെ കോണ്ഗ്രസ്, ജിഹാദി ചായ്വുള്ള ചില ഓണ്ലൈന് മാധ്യമങ്ങളും ഇത്തരത്തിലുള്ള വാര്ത്ത പുറത്തുവിട്ടിരുന്നു.
ബിജെപി പ്രവര്ത്തകരാണ് സുരേന്ദ്ര സിങ്ങിന്റെ കൊലപാതകത്തിന് പിന്നിലെത്ത് യുപി പോലീസ് സ്ഥിരീകരിച്ചെന്ന വിധത്തില് നിരവധി കോണ്ഗ്രസ് പ്രവര്ത്തകര് ഇത് സാമൂഹ്യ മാധ്യമങ്ങളില് പങ്കുവെയ്ക്കുകയും ചെയ്തിരുന്നു. ഇത്തരത്തില് വ്യാജ വാര്ത്തകള് പ്രചരിപ്പിച്ചവര്ക്കെതിരെ കര്ശ്ശന നടപടി സ്വീകരിക്കുമെന്നും യുപി പോലീസ് അറിയിച്ചിട്ടുണ്ട്.
അതേസമയം പ്രദേശിക കോണ്ഗ്രസ് പ്രവര്ത്തകരാണ് കൊലപാതകത്തിനു പിന്നിലെന്നാണ് സുരേന്ദ്ര സിങ്ങിന്റെ കുടുംബം ആരോപിക്കുന്നത്.
സുരേന്ദ്രസിങ്ങിന്റെ സംസ്കാര ചടങ്ങില് പങ്കെടുക്കാന് എത്തിയ സ്മൃതി ഇറാനി അദ്ദേഹത്തിന്റെ ശവമഞ്ചം ചുമന്നിരുന്നു. കോണ്ഗ്രസിന്റെ പ്രധാനമന്ത്രി സ്ഥാനാര്ത്ഥിയായ രാഹുല് ഗാന്ധിയെ 55,000 വോട്ടുകള്ക്കാണ് മുന്കേന്ദ്രമന്ത്രി കൂടിയായ സ്മൃതി പരാജയപ്പെടുത്തിയത്.
ഇടതുപക്ഷ പ്രവര്ത്തകനായ എംവി നികേഷ് കുമാറിന്റെ ഉടമസ്ഥതയിലുള്ള റിപ്പോര്ട്ടര് ടിവിയും സിപിഎമ്മിന്റെ മുഖപത്രമായ ദേശാഭിമാനിയും ഈ വ്യാജവാര്ത്ത പ്രചരിപ്പിച്ചിട്ടുണ്ട്.
കേരളത്തിലെ കോണ്ഗ്രസിന്റെ ഔദ്യോഗിക ഫെയ്സ്ബുക്ക് പേജും ഈ വ്യാജവാര്ത്ത പോസ്റ്റ് ചെയ്തിട്ടുണ്ട്. യു.പി പോലീസ് ഔദ്യോഗിക വിശദീകരണം നല്കിയിട്ടും ഇവരൊന്നും ഈ വാര്ത്ത പിന്വലിക്കാന് തയാറായിട്ടില്ല.
സുരേന്ദ്ര സിങ്ങിന്റെ സംസ്കാര ചടങ്ങില് പങ്കെടുക്കാന് എത്തിയ സ്മൃതി ഇറാനി അദ്ദേഹത്തിന്റെ ശവമഞ്ചം ചുമന്നതും വാര്ത്തയായിരുന്നു.
