കാഞ്ഞങ്ങാട്/കണ്ണൂര്‍: കാസര്‍കോട് ലോക്‌സഭാ മണ്ഡലത്തിലെ പുതിയങ്ങാടിയില്‍ കള്ളവോട്ട് ചെയ്ത മുസ്ലിം ലീഗുകാരായ എസ്.വി. മുഹമ്മദ് ഫായിസ്, കെ.എം. അബ്ദുള്‍ സമദ്, കെ.എം. മുഹമ്മദ് എന്നിവര്‍ക്കെതിരെ കേസെടുത്തു. വിദേശത്തേക്ക് കടന്ന അബ്ദുള്‍ സമദിനെതിരെ അറസ്റ്റ് വാറണ്ടും പുറപ്പെടുവിച്ചു.
ഇന്ത്യന്‍ ശിക്ഷാ നിയമം 171 സി, ഡി, എഫ് വകുപ്പുകളും ജനപ്രാതിനിധ്യ നിയമത്തിന്റെ അടിസ്ഥാനത്തിലുമാണ് കേസ്. മുഹമ്മദ് ഫായിസും അബ്ദുള്‍ സമദും രണ്ടുതവണ വീതവും കെ.എം. മുഹമ്മദ് മൂന്നുതവണയുമാണ് കല്ല്യാശ്ശേരി പുതിയങ്ങാടി ഹയര്‍ സെക്കന്‍ഡറി സ്‌കൂളിലെ 69, 70 ബൂത്തുകളില്‍ വോട്ട് ചെയ്തതെന്നാണ് കണ്ടെത്തിയത്. കോണ്‍ഗ്രസ് ബൂത്ത് ഏജന്റിനെതിരെ പ്രേരണാക്കുറ്റത്തിന് കേസെടുത്തു. ബൂത്ത് ഏജന്റിന്റെ നിര്‍ദേശപ്രകാരമാണ് കള്ളവോട്ട് ചെയ്തതെന്ന് മുഹമ്മദ് മൊഴി നല്‍കിയിരുന്നു.
മുഹമ്മദ് ഫായിസും കെ.എം. മുഹമ്മദും കഴിഞ്ഞ ദിവസം വരണാധികാരി മുമ്പാകെ മൊഴി നല്‍കി. അബ്ദുള്‍സമദ് മൊഴി നല്‍കാതെ ഗള്‍ഫിലേക്ക് കടന്നു. പ്രശ്‌ന ബാധിത ബൂത്തായതിനാല്‍ സിസി ടിവി സംവിധാനവും നിരീക്ഷകനുമുണ്ടായിരുന്നതിനാല്‍ കൃത്യമായ തെളിവുകളാണ് ലഭിച്ചത്. പോളിങ് ഉദ്യോഗസ്ഥരുടെ പങ്ക് അന്വേഷിച്ച് ഏഴു ദിവസത്തിനകം റിപ്പോര്‍ട്ട് നല്‍കാന്‍ മുഖ്യതെരഞ്ഞെടുപ്പ് ഓഫീസര്‍ നിര്‍ദ്ദേശം നല്‍കിയിട്ടുണ്ട്.
അതിനിടെ, പിലാത്തറയ്‌ക്കു പിന്നാലെ തൃക്കരിപ്പൂര്‍ ചീമേനിയില്‍ നടന്ന കള്ളവോട്ടിലും പോലീസ് കേസെടുത്തു. ഇതോടെ കേസെടുത്ത സിപിഎം പ്രവര്‍ത്തകരുടെ എണ്ണം നാലായി. തൃക്കരിപ്പൂര്‍ ചീമേനിയിലെ 48-ാം നമ്പര്‍ ബൂത്തിലാണ് ചീമേനി സ്വദേശി കെ. ശ്യാംകുമാര്‍ കള്ളവോട്ട് ചെയ്തത്.
ജനപ്രാതിനിധ്യ നിയമത്തിലെ സെക്ഷന്‍ 171, ഉപ വകുപ്പുകളായ സി, ഡി, എഫ് വകുപ്പുകള്‍ ചുമത്തിയാണ് ശ്യാംകുമാറിനെതിരെ കേസെടുത്തത്. അവിഹിതമായ സ്വാധീനം ഉപയോഗിച്ച് ആള്‍മാറാട്ടം നടത്തി മറ്റൊരാളുടെ വോട്ട് രേഖപ്പെടുത്തിയെന്നതാണ് ഇയാള്‍ക്കെതിരെ ചുമത്തിയ കുറ്റം. നേരത്തെ പിലാത്തറയില്‍ കള്ളവോട്ട് സംഭവത്തില്‍ കണ്ണൂര്‍ ചെറുതാഴം പഞ്ചായത്തംഗം എം.വി. സലീന, മുന്‍ അംഗം കെ.പി. സുമയ്യ, പത്മിനി എന്നിവര്‍ക്കെതിരെ കേസെടുത്തിരുന്നു.
