ബെംഗളൂരു: കര്ണാടകയില് രണ്ടാംഘട്ട വോട്ടെടുപ്പ് ഇന്ന്. വടക്കന് കര്ണാടകയിലെ 14 മണ്ഡലങ്ങളായ കലബുറഗി, റായ്ച്ചൂര്, ചിക്കോടി, ശിവമൊഗ്ഗ, ദാവന്കരെ, ഉത്തര കന്നഡ, ധര്വാഡ്, ബെള്ളാരി, ഹാവേരി, കൊപ്പാല്, ബിദര്, വിജയപുര, ബാഗല്കോട്ട്, ബെളഗാവി എന്നീ മണ്ഡലങ്ങളിലാണ് ഇന്ന് വോട്ടെടുപ്പ്.
രണ്ടാംഘട്ടത്തില് 14 മണ്ഡലങ്ങളിലുമായി 237 സ്ഥാനാര്ഥികളാണ് മത്സരിക്കുന്നത്. ഇതില് ബെളഗാവി മണ്ഡലത്തിലാണ് ഏറ്റവും കൂടുതല് മത്സരാര്ത്ഥികളുള്ളത്. 57 പേരാണ് ഇവിടെ മത്സരിക്കുന്നത്. ഇതിനാല് ഇവിടെ ഓരോ ബൂത്തിലും നാലുവോട്ടിങ് യന്ത്രം സജ്ജീകരിക്കും. ഏറ്റവും കുറവ് മത്സരാര്ത്ഥികള് ഉള്ളത് റായ്ച്ചൂരിലാണ്. ഇവിടെ അഞ്ച് സ്ഥാനാര്ത്ഥികളാണ് മത്സരിക്കുന്നത്.
പ്രധാനമന്ത്രി നരേന്ദ്രമോദി, ബിജെപി ദേശീയ പ്രസിഡന്റ് അമിത്ഷാ, വിദേശകാര്യമന്ത്രി സുഷമാസ്വരാജ്, പ്രതിരോധമന്ത്രി നിര്മ്മല സീതാരാമന്, കേന്ദ്രമന്ത്രി സ്മൃതി ഇറാനി തുടങ്ങിയ ദേശീയ നേതാക്കള് അടക്കം ബിജെപിക്കായി പ്രചരണത്തിനായി വടക്കന് കര്ണാടകയില് എത്തിയിരുന്നു. പ്രഹ്ലാദ് ജോഷി, ബി.വൈ. രാഘവേന്ദ്ര, അനന്ത്കുമാര് ഹെഗ്ഡെ, ഈശ്വര് ഖണ്ഡ്രെ, മല്ലികാര്ജുന ഖാര്ഗെ തുടങ്ങിയവരാണ് മത്സരിക്കുന്ന പ്രമുഖര്.
രണ്ട് ഘട്ടങ്ങളിലായിട്ടാണ് കര്ണാടകയില് തെരഞ്ഞെടുപ്പ് നടക്കുന്നത്. അതില് ആദ്യഘട്ടത്തില് 14 മണ്ഡലങ്ങളിലെ തെരഞ്ഞെടുപ്പ് ഏപ്രില് 18ന് നടന്നിരുന്നു.
