ഭോപ്പാല്‍: മതിയായ കാരണമില്ലാതെ വേര്‍പിരിഞ്ഞ് താമസിക്കുന്ന ഭാര്യക്ക് ജീവനാംശം ആവശ്യപ്പെടാനാവില്ലെന്ന് മധ്യപ്രദേശ് ഹൈക്കോടതി. ഭര്‍തൃവീട്ടുകാരുമായുള്ള പൊരുത്തമില്ലായ്‌മയോ, മാതാപിതാക്കളെ പരിപാലിക്കുന്ന ഭര്‍ത്താവുമായുള്ള ഭിന്നതയോ ഭാര്യക്ക് ഭര്‍തൃവീട് ഉപേക്ഷിച്ച് പോകാനും ജീവനാംശം ആവശ്യപ്പെടാനും കാരണമായി ചൂണ്ടിക്കാണിക്കാനാവില്ല. ഭാര്യയെ പ്രീണിപ്പിക്കാന്‍ വേണ്ടി മാത്രം ഒരു പുരുഷന്‍ മാതാപിതാക്കളെ അകറ്റി നിറുത്തണമെന്ന് പ്രതീക്ഷിക്കുന്നത് ന്യായമല്ലെന്ന് ജസ്റ്റിസ് ജയ് കുമാര്‍ പിള്ള പറഞ്ഞു. ഇന്ത്യന്‍ സംസ്‌കാരത്തില്‍ മകന്‍ മാതാപിതാക്കളെ പരിപാലിക്കുന്നത് സാധാരണമാണ്.
ഭാര്യയ്‌ക്കും രണ്ട് കുട്ടികള്‍ക്കും പ്രതിമാസം 20,000 രൂപ ജീവനാംശം നല്‍കണമെന്ന കുടുംബക്കോടതി ഉത്തരവിനെതിരെ പുരുഷന്‍ സമര്‍പ്പിച്ച ഹര്‍ജി പരിഗണിക്കവെയാണ് കോടതി ഈ നിരീക്ഷണങ്ങള്‍ നടത്തിയത്.
