ആലപ്പുഴ: ‘എന്റെ കുട്ടികള്‍ക്ക് യാതൊരുവിധ വാക്സിനും നല്‍കിയല്ല വളര്‍ത്തിയത്. വാക്‌സിനെ എതിര്‍ക്കുന്നവര്‍ രാജ്യദ്രോഹികളാണെന്ന പ്രചാരണത്തെ ഭയക്കേണ്ടതില്ല’ ആലപ്പുഴ ലോക്‌സഭാ മണ്ഡലത്തില്‍ ഇടതുമുന്നണി സ്ഥാനാര്‍ഥിയാകാന്‍ സാധ്യതയുള്ള, അരൂര്‍ എംഎല്‍എ എ.എം. ആരിഫ് പൊതുവേദിയില്‍ പറഞ്ഞതാണിത്. രോഗപ്രതിരോധ വിഷയത്തില്‍ പോലും തന്റെ വിശ്വാസത്തെ മുറുകെ പിടിക്കാന്‍ ശ്രമിച്ച കമ്മ്യൂണിസ്റ്റ് നേതാവാണ് താന്‍ എന്ന് വ്യക്തമാക്കാന്‍ അന്ന് ആരിഫിന് സാധിച്ചു.
ശബരിമല വിഷയത്തിലടക്കം കടുത്ത പ്രതിസന്ധി നേരിടുന്ന സിപിഎം ആലപ്പുഴ ലോക്‌സഭാ മണ്ഡലം തിരിച്ചുപിടിക്കാന്‍ സിറ്റിങ് എംഎല്‍എയായ ആരീഫിനെ നിയോഗിക്കാന്‍ ഒരുങ്ങുന്നതിന്റെ മാനദണ്ഡവും മറ്റൊന്നല്ല.
മലപ്പുറം, കോഴിക്കോട്, കണ്ണൂര്‍ ജില്ലകളില്‍ വാക്സിനേഷനെതിരെ ചില മുസ്ലിം സംഘടനകള്‍ വ്യാപക പ്രചാരണം അഴിച്ചുവിട്ട സമയത്തായിരുന്നു ആരീഫിന്റെ വിവാദ പ്രസംഗം. പ്രതിഷേധം ശക്തമായതോടെ താന്‍ വാക്‌സിന്‍ നല്‍കുന്ന കാര്യത്തില്‍ സര്‍ക്കാര്‍ നിലപാടിനൊപ്പമാണെന്ന് പറഞ്ഞ് പിന്നീട് ആരിഫ് മുഖം രക്ഷിക്കാന്‍ ശ്രമിച്ചു. മന്ത്രി ജി. സുധാകരനുമായി പാര്‍ട്ടിക്കുള്ളില്‍ കലഹം സൃഷ്ടിച്ചും ആരീഫ് വിവാദത്തിലായിരുന്നു. ആലപ്പുഴയില്‍ നടന്ന സിപിഎം സംസ്ഥാന സമ്മേളനത്തോടനുബന്ധിച്ച് നടത്തിയ സെമിനാറില്‍ വൈകിയെത്തിയതിന് സുധാകരന്‍ വിമര്‍ശിക്കുകയും ആരിഫ് ഇറങ്ങിപ്പോകുകയും ചെയ്തിരുന്നു.
അപമാനത്തില്‍ മനംമടുത്ത് ആരിഫ് പാര്‍ട്ടി വിടുന്നെന്ന പ്രചരണവും ഉണ്ടായിരുന്നു. പിന്നീട് ഇരുവരും ചേര്‍ന്ന് പത്രസമ്മേളനം നടത്തി പ്രശ്നങ്ങള്‍ ഒതുക്കിത്തീര്‍ത്തു. വണ്ടാനം മെഡിക്കല്‍ കോളേജില്‍ മുഖ്യമന്ത്രി പിണറായി വിജയന്‍ പങ്കെടുത്ത പരിപാടിയില്‍ പ്രോട്ടോകോള്‍ ലംഘിച്ച് തന്നെ അപമാനിച്ചെന്ന് പരാതിപ്പെട്ടതും വിവാദമായി. ജി. സുധാകരന്റെ മണ്ഡലത്തില്‍ നടന്ന പരിപാടിയിലെ പരാതിയും സുധാകരനെതിരെയുള്ള നീക്കമായി വ്യാഖ്യാനിക്കപ്പെട്ടിരുന്നു.
