തൊടുപുഴ: ശബരിമല വിഷയത്തില് ഹൈന്ദവ ജനതയില് ഉണ്ടായ ഐക്യത്തിന് പരോക്ഷമായി പിണറായി വിജയന് സര്ക്കാരിനോട് നാം കടപ്പെട്ടിരിക്കുന്നുവെന്ന് ജന്മഭൂമി മുന് മുഖ്യപത്രാധിപര് പി. നാരായണന്. തൊടുപുഴ വെങ്ങല്ലൂര് കവലയില് നടന്ന അയ്യപ്പധര്മ്മ സദസ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
അകന്നുനിന്ന ഹൈന്ദവ ജനതയില് നാം ഒന്നാണെന്നുള്ള ബോധം ഉണ്ടായത് യുവതീപ്രവേശനം സംബന്ധിച്ച കോടതി വിധിയെ തുടര്ന്നുണ്ടായ സംഭവ വികാസങ്ങളോടെയാണ്. ഇത് തുടര്ന്നും മുന്നോട്ട് പോകണമെന്നും വിശ്വാസങ്ങളും ക്ഷേത്രങ്ങളും സംരക്ഷിക്കപ്പെടണമെന്നും അദ്ദേഹം പറഞ്ഞു. ഇടുക്കിയില് എറണാകുളം അതിര്ത്തിയായ വെങ്ങല്ലൂര് മുതല് കോട്ടയം ജില്ലയുടെ അതിര്ത്തിയായ നെല്ലാപ്പാറ വരെയാണ് അയ്യപ്പജ്യോതി തെളിച്ചത്. വിവിധയിടങ്ങളിലായി നടന്ന പരിപാടിയില് പ്രമുഖര് പങ്കെടുത്ത് സംസാരിച്ചു.
