വാഷിങ്ടണ്‍: സാമ്പത്തിക അടിയന്തരാവസ്ഥയെത്തുടര്‍ന്ന് അമേരിക്കയില്‍ ഗുരുതരമായ പ്രതിസന്ധി. ക്രിസ്തുമസിന് മണിക്കൂറുകള്‍ മാത്രം അവശേഷിക്കെ ലക്ഷക്കണക്കിന് സര്‍ക്കാര്‍ ജീവനക്കാരുടെ ശമ്പളവും ജോലിയും അനിശ്ചിതത്വത്തിലായി.
മെക്‌സിക്കന്‍ അതിര്‍ത്തിയില്‍ നിര്‍മിക്കുന്ന മതിലിന്റെ ചെലവിനുള്ള അഞ്ചു ബില്യണ്‍ ഡോളര്‍ അടക്കം അടിയന്തര ആവശ്യങ്ങള്‍ക്കുള്ള പണം അനുവദിക്കുന്നതിനുള്ള ധനബില്‍ സെനറ്റില്‍ പാസാവാത്തതിനെത്തുടര്‍ന്നാണ് ഷട്ട് ഡൗണ്‍ എന്നു വിളിക്കുന്ന പ്രതിസന്ധി ഉടലെടുത്തത്. അമേരിക്കയുടെ ഓഹരിവിപണി കഴിഞ്ഞ ഒന്‍പതു വര്‍ഷത്തിനിടയ്‌ക്കുള്ള ഏറ്റവും വലിയ തകര്‍ച്ച നേരിടുകയാണ്.
പണം അനുവദിക്കാന്‍ ആവശ്യപ്പെടുന്ന പ്രസിഡന്റ് ഡൊണാള്‍ഡ് ട്രംപിന്റെ അഭ്യര്‍ഥന ഡെമോക്രാറ്റിക് പാര്‍ട്ടിക്കു മുന്‍തൂക്കമുള്ള സെനറ്റ് നിരസിക്കുകയായിരുന്നു. ഡെമോക്രാറ്റുകളും ഭരണകക്ഷിയായ റിപ്പബ്ലിക്കന്‍ പാര്‍ട്ടിക്കാരും നടത്തിയ ഒത്തുതീര്‍പ്പു ചര്‍ച്ചകളും പരാജയപ്പെട്ടു.
നാലു ലക്ഷത്തോളം ജീവനക്കാര്‍ക്ക് ക്രിസ്തുമസിന് മുമ്പ് ശമ്പളം കിട്ടാന്‍ സാധ്യതയില്ല. മൂന്നു ലക്ഷത്തി അമ്പതിനായിരത്തിലേറെ ജീവനക്കാര്‍ ഇനി അറിയിപ്പു ലഭിക്കും വരെ ജോലിക്കു ഹാജരാകേണ്ടതില്ല. ഫലത്തില്‍ ഇവര്‍ ലീവില്‍ പോയ അവസ്ഥയിലായിരിക്കും. ഇവരൊന്നും തിങ്കളാഴ്ച ജോലിക്കു ഹാജരാവേണ്ടതില്ല. വൈറ്റ് ഹൗസിലെ ജീവനക്കാരെയും ഷട്ട് ഡൗണ്‍ ബാധിച്ചു. പ്രസിഡന്റിന്റെ എക്‌സിക്യൂട്ടീവ് ഓഫീസിലെ 1056 ജീവനക്കാര്‍ക്ക് അവധിയില്‍ പോകേണ്ടി വന്നു.
ധനബില്ലിന്റെ കാര്യത്തില്‍ ഒത്തുതീര്‍പ്പ് ഉണ്ടാവാതെ സെനറ്റ് പിരിഞ്ഞപ്പോള്‍ സാമ്പത്തിക അടിയന്തരാവസ്ഥയുടെ കാര്യം ഏതാണ്ട് ഉറപ്പായിരുന്നു. മെക്‌സിക്കന്‍ അതിര്‍ത്തിയിലെ നിര്‍ദിഷ്ട മതിലിന്റെ നിര്‍മാണത്തിന് പണം എന്ന ആവശ്യത്തില്‍ ട്രംപ് ഉറച്ചു നിന്നതോടെയാണ് പ്രതിസന്ധിയും രൂക്ഷമായത്. സൈനിക ആവശ്യങ്ങള്‍, രഹസ്യാന്വേഷണ ഏജന്‍സികളുടെയും ജയിലുകളുടെയും പ്രവര്‍ത്തനം, അതിര്‍ത്തിയിലെ നിരീക്ഷണം തുടങ്ങിയവയ്‌ക്കുള്ള തുക മുടങ്ങില്ല.
കഴിഞ്ഞ 40 വര്‍ഷത്തിനിടയ്‌ക്കുള്ള ഏറ്റവും കടുത്ത പ്രതിസന്ധിയെന്ന് സാമ്പത്തിക നിരീക്ഷകരും മാധ്യമങ്ങളും വിശേഷിപ്പിക്കുമ്പോള്‍ത്തന്നെ ഡെമോക്രാറ്റിക് പാര്‍ട്ടിയെ പഴിച്ച് തടിയൂരാനുള്ള ശ്രമത്തിലാണ് ട്രംപ്.
പ്രതിരോധ സെക്രട്ടറി ജിം മാറ്റിസ് രാജിവച്ചതിനു തൊട്ടുപിന്നാലെ ഷട്ട് ഡൗണ്‍ കൂടി വന്നതോടെ ട്രംപിന്റെ ഭരണസംവിധാനവും കടുത്ത പ്രതിസന്ധിലായി. അനിശ്ചിതത്വം തുടര്‍ന്നാല്‍ അമേരിക്ക ഇന്നോളം കണ്ടിട്ടില്ലാത്ത തരത്തിലുള്ള പ്രശ്‌നങ്ങള്‍ സംജാതമാവുമെന്ന മുന്നറിയിപ്പും സാമ്പത്തിക വിദഗ്ധര്‍ നല്‍കുന്നു. ഡെമോക്രാറ്റുകള്‍ മാത്രമല്ല റിപ്പബ്ലിക്കന്‍ പാര്‍ട്ടിയിലുള്ള സെനറ്റര്‍മാരില്‍ ചിലരും ധനബില്ലിനെ എതിര്‍ക്കുന്നത് ട്രംപിനെ അസ്വസ്ഥനാക്കുന്നുണ്ട്.
വൈസ് പ്രസിഡന്റ് മൈക് പെന്‍സ്, വൈറ്റ് ഹൗസ് ചീഫ് ഓഫ് സ്റ്റാഫ് മിക് മുള്‍വാന്‍സി, ട്രംപിന്റെ മുതിര്‍ന്ന ഉപദേശകന്‍ ജാര്‍ഡ് കുഷ്‌നെര്‍ എന്നിവരുടെ നേതൃത്വത്തില്‍ തുടര്‍ച്ചയായി ഒത്തുതീര്‍പ്പു നീക്കങ്ങള്‍ തുടരുകയാണ്.
