കണ്ണൂര്: പയ്യന്നൂര് മലയാളഭാഷാ പാഠശാലയുടെ 2018 ലെ പുരസ്ക്കാരങ്ങള് ഏച്ചൂര് നളന്ദ കോളേജിന്റെ സഹകരണത്തോടെ 15ന് കോളേജ് ഓഡിറ്റോറിയത്തില് നടക്കുന്ന ചടങ്ങില് വിതരണം ചെയ്യുമെന്ന് അധികൃതര് വാര്ത്താ സമ്മേളനത്തില് അറിയിച്ചു. രാവിലെ 10 മണിക്ക് നളന്ദ കോളേജ് കലോത്സവത്തന്റെ ഭാഗമായുളള സാംസ്ക്കാരിക സദസ്സില്വെച്ചാണ് പുരസ്ക്കാരങ്ങള് വിതരണം ചെയ്യുക. മലയാള പാഠശാല ഡയരക്ടര് ടി.പി.ഭാസ്ക്കരപ്പൊതുവാള് അവാര്ഡുകള് സമ്മാനിക്കും.
ചന്തുമേനോന് നോവല് പുരസ്ക്കാരം യു.കെ.കുമാരന്റെ തക്ഷന്കുന്ന് സ്വരൂപം എന്ന നോവലിനാണ്. സഞ്ജയന് കവിതാ പുരസ്ക്കാരം ഏഴാച്ചേരി രാമചന്ദ്രനും ടിപിഎന് കൈതപ്രം സാഹിത്യ പുരസ്ക്കാരം ടി.സി.വി.സതീശന്റെ പെരുമാള്പുരം എന്ന നോവലിനും നല്കും. പെരുമ്പടവം ശ്രീധരന് അധ്യക്ഷനായുളള പുരസ്ക്കാര സമിതിയില് പ്രഭാവര്മ്മയും പി.കെ.ഗോപിയും അംഗങ്ങളായിരുന്നു. 15001 രൂപയും ദാമോദരന് വെളേളാറ രൂപകല്പ്പന ചെയ്ത ശില്പ്പവുമാണ് പുരസ്ക്കാരം. ഏച്ചൂര് നളന്ദ കോളേജ് ഏര്പ്പെടുത്തിയ ശ്രേഷ്ഠാചാര്യ പുരസ്കാരം ടി.പി.ഭാസ്കരപ്പൊതുവാളിന് ചടങ്ങില് സമ്മാനിക്കും. അവാര്ഡ് സമര്പ്പണ സമ്മേളനം പ്രശസ്ത സിനിമാ സംഗീത സംവിധായകന് കിളിമാനൂര് രാമവര്മ്മ ഉദ്ഘാടനം ചെയ്യും. കോളേജ് പ്രിന്സിപ്പാള് പി.ലക്ഷ്മണന് അധ്യക്ഷത വഹിക്കും. ടി.എം.ഹരീഷ്കുമാര്,കെ.പ്രകാശന്, കണ്ണൂര് രത്നകുമാര്, കൃഷ്ണകുമാര് കണ്ണോത്ത് എന്നിവര് സംസാരിക്കും.
വാര്ത്താ സമ്മേളനത്തില് ടി.പി.ഭാസ്ക്കരപൊതുവാള്, ടി.എം.ഹരീഷ്കുമാര്, അമീര്അലി, കണ്ണൂര് രത്നകുമാര്, കെ.പ്രകാശന് പങ്കെടുത്തു.
