ശാസ്ത്രനാമം: Borreria articularis
സംസ്കൃതം: വാസുകം, പാശുപതം
തമിഴ്: നത്തച്ചൂരി
എവിടെക്കാണാം: ഇന്ത്യയില് വരണ്ട പ്രദേശങ്ങളിലും വെള്ളക്കെട്ടില്ലാത്ത സ്ഥലങ്ങളിലും കണ്ടു വരുന്നു. കേരളത്തില്, തമിഴ്നാടിനോട് അതിര്ത്തി പങ്കിടുന്ന പാലക്കാട്, ഇടുക്കി ജില്ലകളിലും കാസര്കോട് ജില്ലയിലും ധാരാളമായി കണ്ടുവരുന്നു.
പ്രത്യുത്പാദനം: വിത്തില് നിന്ന്
ചില ഔഷധ പ്രയയോഗങ്ങള്
താര്താവില്, ചങ്ങലംപരണ്ട, മുരിങ്ങാത്തൊലി, കറ്റാര്വാഴപ്പോള, ചെന്നിനായകം, കോലരക്ക്, കാവിമണ്ണ്, ചെഞ്ചെല്യം, പഞ്ചമന്പഴുക്ക, കറുത്ത ഉഴുന്ന്, എന്നിവ സമം കോഴിമുട്ടവെള്ളയില് അരച്ച് ആല്ക്കഹോളില് കലക്കി തേച്ചാല്, ചതവുകൊണ്ടുണ്ടായ നീര്, ഉളുക്ക്, ചതവ്, എന്നിവ മാറിക്കിട്ടും.
താര്താവില് സമൂലം ഇടിച്ചുപിഴിഞ്ഞ നീര് നാല് ലിറ്റര്, മുരിങ്ങാത്തൊലി ഇടിച്ചുപിഴിഞ്ഞ നീര് ഒരു ലിറ്റര്, ചങ്ങലംപരണ്ട ഇടിച്ചുപിഴിഞ്ഞ നീര് ഒരു ലിറ്റര്, മുക്കാപീര്യം ഇടിച്ചുപിഴിഞ്ഞ നീര് ഒരു ലിറ്റര്, എന്നിവയിലേക്ക് എള്ളെണ്ണ 250 മില്ലി, വേപ്പെണ്ണ 250 മില്ലി, ആവണക്കെണ്ണ 250 മില്ലി, നെയ്യ് 250 മില്ലി, എന്നിവ ചേര്ത്ത് അര കിലോ ചെന്നിനായകം അരച്ച് ചേര്ത്ത് മെഴുക് പാകത്തില് തൈലം കാച്ചി അരിച്ച് തേച്ചാല് ചതവ്, ഉളുക്ക്, അസ്ഥി പൊട്ടല് എന്നിവ കൊണ്ടുണ്ടാകുന്ന നീര,് സന്ധികള്ക്ക് ചതവുകൊണ്ടുണ്ടാകുന്ന നീര് ഇവ ശമിക്കും. മര്മ്മ ചികിത്സയില് ഉഴിച്ചിലിന് ഏറ്റവും ശ്രേഷ്ഠമായ തൈലമാണിത്.
കാട്ടപ്പ ഇടിച്ചുപിഴിഞ്ഞ നീര് ഒരു ലിറ്റര്, താര്താവില് ഇടിച്ചുപിഴിഞ്ഞ നീര് ഒരു ലിറ്റര് ഇവ രണ്ടും ഒന്നായി ചേര്ത്ത് 250 ഗ്രാം കാഞ്ഞിരക്കുരു പുഴുങ്ങി പുറംതോടും അകത്തെ മുകുളവും കളഞ്ഞ്, ആട്ടിന്പാലില് അരച്ച് നാല് ലിറ്റര് താര്താവില് ഇടിച്ചു പിഴിഞ്ഞ നീര്, നാലു ലിറ്റര് കാട്ടപ്പ ഇടിച്ചുപിഴിഞ്ഞ നീര്, എള്ളെണ്ണ ഒരു ലിറ്റര്, നറുനെയ്യ് അരലിറ്റര്, കാട്ടുപന്നിനെയ്യ് ഇരുനൂറ്റിയമ്പത് മില്ലി(കാട്ടുപന്നിയെ കൊല്ലുന്നതും അതിന്റെ നെയ് എടുക്കുന്നതും കുറ്റകരവും ശിക്ഷാര്ഹവുമാണെന്നത് ഓര്മിക്കുക), എന്നിവ ചേര്ത്ത് ഇളക്കി മെഴുക് പാകത്തില് കാച്ചി അരിച്ച് തേച്ചാല് മുട്ടുവേദന(ക്രോര്ട്ടു ശീര്ഷം എന്ന വാദം) ഒരു മാസം കൊണ്ടു പൂര്ണമായും ശമിക്കും.
താര്താവിലിന്റെ അരി, ബദാം പരിപ്പ്, വാല്നട്ട്, അടപതിയന് കിഴങ്ങ്, പാലില് പുഴുങ്ങി ഉണങ്ങിയ നായ്ക്കുരുണ പരിപ്പ്, പാലില് പുഴുങ്ങി ഉണങ്ങിയ അമുക്കുരം, ഇവ സമം പൊടിച്ച് ഒരു സ്പൂണ് പൊടി പാലില് ദിവസം രണ്ട് നേരം വീതം സേവിച്ചാല് പുരുഷന്മാരിലെ ബീജദോഷം ശമിക്കും, ശീഖ്രസ്കലനവും മാറിക്കിട്ടും. താര്താവില് അരി തമിഴ്നാട്ടില് ധാരാളമായി ലഭിക്കുന്നു.
