പാലക്കാട്: ശബരിമല യുവതീ പ്രവേശന വിഷയത്തില് ഭക്തരെ വെല്ലുവിളിച്ച് ക്ഷേത്രപ്രവേശന വിളംബരത്തിന്റെ 82ാം വാര്ഷികാഘോഷത്തിന് ലക്ഷങ്ങള് ചെലവിട്ട സര്ക്കാര് കല്പ്പാത്തി രഥോത്സവത്തിന് ധനസഹായം നിഷേധിച്ചു.
ക്ഷേത്രപ്രവേശനവിളംബര ആഘോഷത്തിന്റെ പേരില് പാലക്കാട് ജില്ലയിലും പൊടിച്ചത് ലക്ഷങ്ങള്. പ്രളയത്തിന്റെ പേരു പറഞ്ഞാണ് ഇത്തവണ രഥോത്സവത്തിനുള്ള ധനസഹായം നിരസിച്ചത്. പിന്നില് രാഷ്ട്രീയ പകപോക്കലെന്ന ആരോപണവും ഉയരുന്നു.
പ്രസിദ്ധമായ കല്പ്പാത്തി രഥോത്സവത്തിന് കഴിഞ്ഞവര്ഷം 13 ലക്ഷം രൂപയാണ് സംസ്ഥാന സര്ക്കാര് അനുവദിച്ചത്. എന്നാല്, ഇത്തവണ പ്രളയത്തിന്റെ പശ്ചാത്തലത്തില് തുക അനുവദിക്കാനാവില്ലെന്ന് അറിയിച്ചു. കഴിഞ്ഞ 26 വര്ഷമായി തുടരുന്ന കല്പ്പാത്തി സംഗീതോത്സവം പ്രളയത്തിന്റെ പശ്ചാത്തലത്തില് നടത്തേണ്ടെന്നും ജില്ലാ ടൂറിസം പ്രമോഷന് കൗണ്സില് തീരുമാനിച്ചു. എന്നാല്, സംഗീതപ്രേമികളുടെയും കലാകാരന്മാരുടെയും പിന്തുണയോടെ മ്യൂസിക് റിച്വല്സ് ആന്ഡ് സ്പിരിച്വല് ഓര്ഗനൈസിങ് കമ്മിറ്റിയുടെ ആഭിമുഖ്യത്തില് 27-ാമത് കല്പ്പാത്തി സംഗീതോത്സവം നടത്തുകയായിരുന്നു. ഈമാസം ഏഴിന് ആരംഭിച്ച സംഗീതോത്സവം ഇന്നലെ സമാപിച്ചു.
മലബാര് ദേവസ്വത്തിന്റെ കീഴിലുള്ള കല്പ്പാത്തിയിലെ വിശാലാക്ഷി സമേത വിശ്വനാഥ സ്വാമി ക്ഷേത്രത്തിലേക്കുള്ള ധനസഹായവും നിഷേധിച്ചിരിക്കുകയാണ്. കഴിഞ്ഞവര്ഷം വരെ മൂന്നുലക്ഷം രൂപ അനുവദിച്ചിരുന്നു.
ഇതുവരെ ആഘോഷിക്കാതിരുന്ന ക്ഷേത്രപ്രവേശന വിളംബരത്തിന്റെ വാര്ഷികത്തോടനുബന്ധിച്ച് വിവിധ പരിപാടികള്ക്കായി ലക്ഷങ്ങളാണ് പൊടിച്ചത്. രണ്ടു ദിവസങ്ങളിലായി നടന്ന വിവിധ പരിപാടികളില് പൊതുജനപങ്കാളിത്തം വളരെ കുറവായിരുന്നു. പ്രളയത്തില് ദുരിതമനുഭവിക്കുന്നവര്ക്ക് സഹായധനം അനുവദിക്കാതെ ഇത്തരം പരിപാടികള്ക്ക് ലക്ഷങ്ങള് ചെലവാക്കിയതില് ശക്തമായ പ്രതിഷേധം ഉയര്ന്നിട്ടുണ്ട്.
എന്നാല്, കല്പ്പാത്തി രഥോത്സവത്തിനുള്ള ധനസഹായം അനുവദിക്കാത്തതിനു പിന്നില് രാഷ്ട്രീയ വൈരമാണെന്ന ആരോപണവുമുണ്ട്. ശബരിമല യുവതീപ്രവേശനത്തിനെതിരെ കല്പ്പാത്തിയിലെ ബ്രാഹ്മണസമൂഹം ഉള്പ്പെടെയുള്ളവര് പ്രതിഷേധിച്ചിരുന്നു. നാമജപയാത്രയിലും പങ്കെടുത്തു. ഇടതുസര്ക്കാര് നിലപാടിനെതിരെ പ്രതിഷേധിച്ചതും ധനസഹായം നല്കാതിരുന്നതിന് കാരണമായിട്ടുണ്ടാവുമെന്നാണ് വിശ്വാസികളുടെ അഭിപ്രായം.
സര്ക്കാര് ധനസഹായം ലഭിക്കാത്തതിനാല് ഒരു തരത്തിലും രഥോത്സവത്തിന്റെ മാറ്റ്കുറയാതിരിക്കാനുള്ള ശ്രമത്തിലാണ് കമ്മിറ്റി അംഗങ്ങള്. രഥോത്സവ കമ്മിറ്റിയും വിശ്വാസികളും സ്പോണ്സര്മാരും ഒത്തുചേര്ന്ന് വന് ആഘോഷമാക്കാനുള്ള ശ്രമത്തിലാണ്.
