കാലിഫോര്ണിയ: ഈ ലോകകപ്പിലെ ഏറ്റവും ആവേശകരമായ മത്സരത്തിനൊടുവില് ആതിഥേയരായ അമേരിക്കയെ അട്ടിമറിച്ച് തുര്ക്കി. ഇന്നലെ 70,000ത്തോളം ആരാധകരെ സാക്ഷിയാക്കി സോഫിസറ്റേഡിയത്തില് നടന്ന പോരാട്ടത്തിനൊടുവില് രണ്ടിനെതിരെ മൂന്ന് ഗോളുകള്ക്കാണ് തുര്ക്കി വിജയം പിടിച്ചുവാങ്ങിയത്. കളി അവസാനിക്കുന്നതിന് തൊട്ടുമുന്പ് പരിക്ക് സമയത്തിന്റെ എട്ടാം മിനിറ്റില്, കാന് അയ്ഹാന് നേടിയ ഗോളിലാണ് തുര്ക്കി വിജയം സ്വന്തമാക്കിയത്. ഇതോടെ തുടര്ച്ചയായ മൂന്നാം വിജയം നേടി ഗ്രൂപ്പ് ഡിയിലെ അവസാന മത്സരത്തിനിറങ്ങിയ യുഎസിന് നിരാശയായി. ആദ്യ രണ്ട് കളികളിലും പരാജയപ്പെട്ട തുര്ക്കി മൂന്ന് പോയിന്റുമായി ഗ്രൂപ്പില് അവസാന സ്ഥാനക്കാരായി പുറത്തായി. തോറ്റെങ്കിലും രണ്ട് കളികളില് ജയിച്ച് ആറ് പോയിന്റുമായി യുഎസാണ് ഗ്രൂപ്പില് ഒന്നാമത്. നാല് പോയിന്റുമായി ഓസ്ട്രേലിയയും രണ്ടാമതായി നോക്കൗട്ട് റൗണ്ടിലെത്തി.
കളിയില് അമേരിക്കയ്ക്കായിരുന്നു മുന്തൂക്കം. പന്ത് നിയന്ത്രിച്ചു നിര്ത്തുന്നതിലും ഷോട്ടുകള് ഉതിര്ക്കുന്നതിലും യുഎസ് മുന്നിട്ടുനിന്നു. 53 ശതമാനം പന്ത് കൈവശം വച്ച യുഎസ് 7 ഓണ് ടാര്ഗറ്റ് ഷോട്ടുകള് ഉള്പ്പെടെ ആകെ അടിച്ചത് 18 എണ്ണം. എന്നാല് തുര്ക്കി മൂന്ന് ഓണ് ടാര്ഗറ്റ് ഉള്പ്പെടെ പറത്തിയത് 9 എണ്ണം മാത്രം.
മത്സരം തുടങ്ങി മൂന്നാം മിനിറ്റില് യുഎസ്എ ആദ്യ ഗോള് നേടിയിരുന്നു. യുഎസ്എയുടെ സെബാസ്റ്റ്യന് ബെര്ഹാള്ട്ടര് എടുത്ത കോര്ണര് കാലില് സ്വീകരിച്ച് ഓസ്റ്റണ് ഇടതുകാല് കൊണ്ട് പായിച്ച ബുള്ളറ്റ് ഷോട്ടാണ് വലയില് കയറിയത്. യുഎസ്എയുടെ ആദ്യ ഗോള് പിറന്നതോടെ തുര്ക്കി ആക്രമണം കടുപ്പിച്ചു. തുടര്ച്ചയായ മുന്നേറ്റങ്ങള്ക്കൊടുവില് പത്താം മിനിറ്റില് തുര്ക്കി സമനില ഗോള് നേടി. അവരുടെ ആര്ഡ്ര ഗുലര് ആണ് ഗോളടിച്ചത്.
ബാരിസ് അല്പെര് യില്മാസ് നല്കിയ പാസ് ബോക്സിന്റെ നടുവില് നിന്നും ആര്ഡ്ര വലയിലെത്തിക്കുകയായിരുന്നു. 29-ാം മിനിറ്റില് യുഎസ് രണ്ടാമതും ഗോളടിച്ചെങ്കിലും റഫറി ഓഫ്സൈഡ് ഫ്ളാഗ് ഉയര്ത്തി. തൊട്ടുപിന്നാലെ തുര്ക്കി ലീഡ് നേടി. 31-ാം എറന് എല്മാലി നല്കിയ പാസ് അല്പെര് യില്മാസ് വലയിലെത്തിക്കുകയായിരുന്നു. ആദ്യപകുതിയില് തുര്ക്കി 2-1ന് മുന്നില്.
രണ്ടാം പകുതി ആരംഭിച്ച് നാല് മിനിറ്റാകുന്നതിന് മുന്നേ യുഎസ്എ സമനില പിടിച്ചു. സെബാസ്റ്റ്യന് ബെര്ഹാള്ട്ടര് ആണ് ഗോള് നേടിയത്. ബോക്സിനകത്തു നിന്ന് തുര്ക്കി പ്രതിരോധനിരതാരം ക്ലിയര് ചെയ്ത പന്ത് ബോക്സിന് തൊട്ടുവെളിയില് നിന്ന് സെബാസ്റ്റ്യന് നല്ലൊരു ഷോട്ടിലൂടെ വലയിലെത്തിക്കുകയായിരുന്നു. മത്സരം സമനിലയില് അവസാനിച്ചു ഉറപ്പിച്ചിരിക്കെ തുര്ക്കിയുടെ വിജയഗോള് പിറന്നു. ബോക്സിനകത്തെ കൂട്ടപ്പൊരിച്ചിലിനിടെ തുര്ക്കിയുടെ കാന് അയ്ഹാന് പോസ്റ്റിന് തൊട്ടുമുന്നില് നിന്നും തൊടുത്ത ഷോട്ടാണ് യുഎസ് വലയില് കയറിയത്.
