കേരളത്തിലെ ഹിന്ദുക്കളില് ആരാധന, ക്ഷേത്ര സന്ദര്ശനം മുതലായ പൊതു വിഷയങ്ങളില് കാര്യമായ ജാതി വിഭജനം ഇന്ന് നിലനില്ക്കുന്നുണ്ടെന്ന് തോന്നുന്നില്ല. ചില തൊഴിലുകളില് പാരമ്പര്യമായി സിദ്ധിച്ച മികവും സാമര്ഥ്യവും പിന്തുടരപ്പെടുന്നുണ്ട് എന്നത് സത്യമാണ്. ചില സമൂഹങ്ങള് അവരുടെ ഇടയിലെ പരിഷ്കര്ത്താക്കളുടെ പേരില് പുതുതായി സ്ഥാപിച്ചുവരുന്ന ആരാധനാലയങ്ങളില് മറ്റു ജാതിക്കാര് കാര്യമായി ദര്ശനം നടത്താറില്ല, എങ്കിലും ഇതര ക്ഷേത്രങ്ങളില് എല്ലാ ജാതിക്കാരും ഇടകലരുകയും സഹകരിക്കുകയും ചെയ്യുന്നു. സര്ക്കാര് അപേക്ഷ ഫോറങ്ങള് പൂരിപ്പിക്കുമ്പോഴും വിവാഹത്തിനും മാത്രമാണ് ഹിന്ദുക്കള് തങ്ങളുടെ ജാതിയെപ്പറ്റി കാര്യമായി ചിന്തിക്കുന്നത്.
എന്നാല് വൈക്കത്ത് നടക്കുന്ന താലപ്പൊലികളെപ്പറ്റി വാര്ത്തകള് വായിക്കുമ്പോള് ഒരു അരോചകത്വമാണ് തോന്നാറുള്ളത്. നായര് താലപ്പൊലി, ഈഴവ താലപ്പൊലി, വിശ്വകര്മ താലപ്പൊലി എന്നൊക്കെയുള്ള ലേബലിലാണ് താലപ്പൊലി നടക്കുന്നത്.
ചില ദേശങ്ങളുടെയും ക്ഷേത്രങ്ങളുടെയും തനതു വക എന്ന് വിശേഷിപ്പിക്കാമായിരുന്ന പകല്പ്പൂരവും കുടമാറ്റവും പൊങ്കാലയും ഒക്കെ എല്ലായിടത്തും വ്യാപകമായതുപോലെ ഇനി ജാതി താലപ്പൊലിയും വ്യാപകമായാല് അത്ഭുതമില്ല. ഈ രീതി അവസാനിപ്പിക്കാന് എല്ലാ സമുദായ നേതൃത്വവും കൂട്ടായി ശ്രമിക്കേണ്ടിയിരിക്കുന്നു.
ജയദേവന് എം.എസ്, കാണക്കാരി
യഥാര്ത്ഥ വിധി എന്തായിരുന്നു?
ശബരിമല യുവതീപ്രവേശന വിഷയത്തില് കോടതി വിധി എന്താണെന്ന് ഇതുവരെ ഒരു മാധ്യമത്തിലും വിശദമായി പ്രസിദ്ധീകരിച്ചിട്ടില്ല. അതിനാല്തന്നെ കേരളത്തില് ഇന്ന് നടക്കുന്ന ഭരണകക്ഷി സ്പോണ്സേര്ഡ് കലാപരിപാടികള്ക്ക് എത്രത്തോളം നിയമസാധുതയുണ്ടെന്ന് പരിശോധിക്കാനും സാധാരണ പൗരന്മാര്ക്ക് നിര്വാഹമില്ല. സുപ്രീം കോടതിയുടെ വിധി ഭരണഘടന നല്കുന്ന ലിംഗസമത്വം എല്ലാ മേഖലയിലും ഉറപ്പാക്കണം. ശബരിമലയില് സ്ത്രീകളെ നിര്ബന്ധിച്ച് രഹസ്യമായി കൊണ്ടുപോയി ആരാധന നടത്തിച്ച് തിരികെ കൊണ്ടുപോരേണമെന്ന് വിധി പറയുന്നുണ്ടോ? അങ്ങനെ ചെയ്താല് വിധി നടപ്പിലായതായി പരിഗണിക്കുമോ?
ക്യാപ്റ്റന് കെ. വേലായുധന്, കോഴിക്കോട്
