കണ്ണൂര്: വോട്ടര് അവബോധ പരിപാടിയായ സ്വീപ്പി (ടഢഋഋജ) ന്റെ ഭാഗമായി ജില്ലാ ഇലക്ഷന് വിഭാഗത്തിന്റെ നേതൃത്വത്തില് ജില്ലയിലെ ഹൈസ്കൂള്, ഹയര്സെക്കന്ററി സ്കൂള്, കോളേജ് വിദ്യാഭ്യാസ സ്ഥാപനങ്ങളില് വോട്ടേഴ്സ് എന്റോള്മെന്റ് ദിനം ആചരിച്ചു. കണ്ണൂര് മുനിസിപ്പല് ഹയര് സെക്കന്ററി സ്കൂളില് നടന്ന ജില്ലാതല ഉദ്ഘാടനം അസിസ്റ്റന്റ് കലക്ടര് അര്ജുന് പാണ്ഡ്യന് നിര്വഹിച്ചു. വോട്ട് ചെയ്യുകയെന്നത് പൗരന്റെ അവകാശം മാത്രമല്ല ഉത്തരവാദിത്തം കൂടിയാണെന്ന് അദ്ദേഹം പറഞ്ഞു. വോട്ടവകാശം ലാഘവത്തോടെ ഉപയോഗിക്കേണ്ട ഒന്നല്ല. രാജ്യവുമായി ബന്ധപ്പെട്ട സുപ്രധാന തീരുമാനങ്ങളെടുക്കുന്ന ഭരണ നേതൃത്വത്തെ തെരഞ്ഞെടുക്കുവാനുള്ള അവകാശം വളരെ ശ്രദ്ധാപൂര്വം ഉപയോഗിക്കുകയെന്നത് ഓരോ വോട്ടറുടെയും കടമയാണ്. പുതുതലമുറയില് ഈ ബോധം ശക്തിപ്പെടുത്തേണ്ടത് അനിവാര്യമാണ്. അതിനുള്ള ഏറ്റവും അനുയോജ്യമായ വേദി വിദ്യാലയങ്ങളാണെന്നും അദ്ദേഹം പറഞ്ഞു.
കണ്ണൂര് തഹസില്ദാര് വി.എം.സജീവന് ചടങ്ങില് അദ്ധ്യക്ഷത വഹിച്ചു. ഇലക്ഷന് ഡെപ്യൂട്ടി കലക്ടര് പി.പി.ജയരാജന്, പ്രിന്സിപ്പല് ഹിമ, ഹെഡ്മാസ്റ്റര് പ്രകാശ് ബാബു, സ്വീപ്പ് ചാര്ജ്ജ് ഓഫീസര് സി എം ലതാദേവി, ഇലക്ഷന് ഡെപ്യൂട്ടി തഹസില്ദാര് കെ വി ഷാജു, ഇലക്ടറല് ലിറ്ററസി ക്ലബ്ബ് നോഡല് ഓഫീസര് എം മുഹമ്മദ് ബഷീര് എന്നിവര് സംസാരിച്ചു. ദിനാചരണത്തിന്റെ ഭാഗമായി സ്കൂള്, കോളേജ് തലങ്ങളില് ചിത്രരചനാ മത്സരവും ക്വിസ് മത്സരവും സംഘടിപ്പിച്ചു.
