ചിറക്കല്: നമ്മുടെ അറിവും അനുഭവജ്ഞാനവുമാണ് ജീവിത വീക്ഷണങ്ങളെ നിശ്ചയിക്കുന്നതെന്ന് സ്വാമി ആധ്യാത്മാനന്ദ സരസ്വതി പറഞ്ഞു. നവരാത്രിയോടനുബന്ധിച്ച് കണ്ണൂര് ചിറക്കല് ശ്രീ ചാമുണ്ഡിക്കോട്ടത്ത് നവരാത്രീ തത്വചിന്തനം എന്ന വിഷയത്തെ അധികരിച്ച് പ്രഭാഷണം നടത്തുകയായിരുന്നു അദ്ദേഹം.
നമ്മുടെ അറിവും അനുഭവജ്ഞാനവും ശുഭകരമാക്കാന് ആചാര്യന്മാര് സന്ദേശങ്ങള് ഉള്ക്കൊള്ളിച്ച് ആഘോഷങ്ങള് നിശ്ചയിച്ച് നല്കിയിരിക്കുന്നു. നവരാത്രി സന്ദേശം ജന്മസാഫല്യവുമായി ബന്ധപ്പെടുത്തി ചിന്തിക്കാവുന്നതാണ്. ആത്മജ്ഞാനം നേടാനുള്ള തീര്ത്ഥയാത്രാ പദ്ധതിയായി പരിഗണിക്കുമ്പോള് ആഘോഷം സാര്ത്ഥകമാവും. ദുര്ഗ്ഗാദേവിയെ കര്മ്മയോഗം കൊണ്ടും,ലക്ഷ്മീദേവിയെ ഉപാസന കൊണ്ടും ആരാധിക്കാനുള്ള ആദേശം ഈ നിലക്ക് ആചാര്യന്മാര് നല്കുന്നു. ജ്ഞാനോപാസന അക്ഷര രൂപിണിയായ സരസ്വതീ ആരാധനയില് സംഭവിക്കുന്നു. ജീവിത വിജയം വിജയ ദശമിയുടെ സന്ദേശമായി പരിഗണിക്കാമെന്നും സ്വാമിജി പറഞ്ഞു.
