ന്യൂദല്ഹി: ഗര്ബ നൃത്തമില്ലാതെ ഗുജറാത്തില് നവരാത്രി ആഘോഷങ്ങള് പൂര്ണമാകില്ല. കുട്ടികള് മുതല് മതിര്ന്നവര് വരെയുള്ള എല്ലാവരും ഈ നൃത്തം ചെയ്തു നവരാത്രി ആഘോഷിക്കുന്നു. ഇത്തവണ കാഴ്ച വൈകല്യമുള്ള പെണ്കുട്ടികള്ക്കും ഗര്ബ നൃത്തം ചെയ്യാന് അവസരം ലഭിച്ചു. കാഴ്ചയില്ലാത്ത 200 ഓളം പെണ്കുട്ടികളെ പരിപാലിക്കുന്ന ‘അന്ധ് കന്യാ പ്രകാശ് ഗൃഹ്’ സ്കൂളില്നിന്നുള്ള വിദ്യാര്ഥികളാണിവര്.
ഇതിന്റെ പ്രത്യേകത എന്തെന്നു ചോദിച്ചാല് പ്രധാനമന്ത്രി നരേന്ദ്രമോദി എഴുതിയ വരികള്ക്കൊപ്പമാണ് ഇവര് നൃത്തം വച്ചത്. ‘ഖുമേ ഏനോ ഗര്ബോ’ എന്ന തലക്കെട്ടിലുള്ള ഗാനം മോദിയുടെ മാതൃഭാഷയായ ഗുജറാത്തിയിലാണ് രചിച്ചിരിക്കുന്നത്. ഐശ്വര്യ മജ്മുദര്, അമി പരീഖ് എന്നിവര് ചേര്ന്നാണ് പാടിയിരിക്കുന്നത്. നേരത്തേ തന്നെ എഴുത്തിന്റെ ലോകത്ത് സജീവമാണ് പ്രധാനമന്ത്രി. നിരവധി പുസ്തകങ്ങളും മനോഹരമായ കവിതകളും എഴുതിയിട്ടുണ്ട്.
‘രാമതാ രാം അകേല’ എന്ന പേരില് എഴുതിയ ഗുജറാത്തി കവിത അദ്ദേഹം ഏപ്രലില് പങ്കുവച്ചിരുന്നു. നവരാത്രി ദിവസങ്ങളില് നരേന്ദ്രമോദി വ്രതം അനുഷ്ഠിക്കുന്നത് പതിവാണ്.
