കണ്ണൂര്: കണ്ണൂര് സെന്ട്രല് ജയിലിലെ സെല്ലിനുള്ളില് തടവുകാര് പരസ്യ മദ്യപാനം നടത്തിയ സംഭവം മൂടിവെയ്ക്കാന് നീക്കമെന്നാരോപണം. അഞ്ചാം ബ്ലോക്കിലെ സെല്ലില് കൊലക്കേസ് പ്രതികളായ മൂന്നുപേരുള്പ്പെടെ അഞ്ചു തടവുകാരാണ് കഴിഞ്ഞദിവസം രാത്രി കൂട്ടം കൂടിയിരുന്ന് മദ്യപിച്ചതായ വിവരം പുറത്തു വന്നത്. സെല്ലിലെ സഹതടവുകാര് മദ്യപാനത്തെ എതിര്ത്തതോടെ ജയില് ഉേദ്യാഗസ്ഥര് വിവരമറിയുകയും പരിശോധനയില് മദ്യക്കുപ്പിയും ഗ്ലാസുകളും പിടിച്ചെടുക്കുകയുമായിരുന്നു.
ഇതേ ബ്ലോക്കിന്റെ പിറകില് നിന്നും ഇന്നലെ രാവിലെ കഞ്ചാവും കണ്ടെടുത്തിരുന്നു. മദ്യപാനം പിടിക്കപ്പെട്ടതിനാല് പരിശോധനയുണ്ടാകുമെന്ന് കരുതി സെല്ലില്നിന്ന് പുറത്തേക്കെറിഞ്ഞതാണ് കഞ്ചാവ് പൊതിയെന്ന് സംശയിക്കുന്നതായി ജയിലുദ്യോഗസ്ഥര് പറഞ്ഞു. സംഭവം മറച്ചുവെയ്ക്കാന് ജയില് അധികൃതര് ശ്രമിക്കുന്നതായി ആരോപണം ഉയര്ന്നിട്ടുണ്ട്. മദ്യപാനം നടന്നതിനെക്കുറിച്ച് ഡ്യൂട്ടിയിലുണ്ടായിരുന്ന ജീവനക്കാരന് വിവരം നല്കിയിരുന്നുവെന്നും എന്നാല് ഇത് സംബന്ധിച്ച് മറ്റൊന്നും അറിയില്ലെന്നുമാണ് ജയിലിലെ ഉന്നത ഉദ്യോഗസ്ഥര് പറയുന്നത്. ജയിലിനുള്ളില് നടന്ന കുറ്റകൃത്യം പോലീസിനെ അറിയിക്കാത്തതും വിവാദമായിട്ടുണ്ട്.
ഏതാനും ആഴ്ചകള്ക്ക് മുമ്പ് മദ്യവും മാംസവും ജയില് മതിലിന് മുകളിലൂടെ ചാടിക്കൊടുക്കുന്നതിനിടയില് ജയിലധികൃതര് പിടികൂടിയിരുന്നു.
എല്ഡിഎഫ് സര്ക്കാര് അധികാരത്തിലെത്തിയ ശേഷം സിപിഎം ശിക്ഷാ തടവുകാര് തുടര്ച്ചയായി ജയിലിനകത്ത് അഴിഞ്ഞാടുകയാണെന്ന ആരോപണം നിലനില്ക്കെയാണ് ജയിലിനകത്ത് തടവുകാര് പരസ്യമായി മദ്യപാനം നടത്തിയെന്ന വാര്ത്ത പുറത്തു വന്നിരിക്കുന്നത്.
