ന്യൂദല്‍ഹി: ഡാമുകളിലെ ജലനിരപ്പ് ശ്രദ്ധിക്കണമെന്ന് മൂന്നു മാസം മുമ്പ് തന്നെ കേരളത്തെ അറിയിച്ചിരുന്നതായി കേന്ദ്രജലകമ്മീഷന്‍. സംസ്ഥാനത്ത് കനത്ത മഴയ്‌ക്ക് സാധ്യതയുണ്ടെന്നും ഡാമുകളുടെ കാര്യത്തില്‍ വലിയ ശ്രദ്ധ വേണമെന്നുമായിരുന്നു മുന്നറിയിപ്പ്. കനത്ത മഴയ്‌ക്ക് സാധ്യതയുണ്ടെന്ന കാലാവസ്ഥാ മുന്നറിയിപ്പ് കേന്ദ്രം നല്‍കിയില്ലെന്ന് മുഖ്യമന്ത്രി ആവര്‍ത്തിക്കുമ്പോഴാണ് കേന്ദ്രജലകമ്മീഷന്റെ വെളിപ്പെടുത്തല്‍.
കനത്ത മഴയ്‌ക്ക് സാധ്യതയുണ്ടെന്നും അതിനാല്‍ ഡാമുകള്‍ തുറന്നുവിടുന്നതുമായി ബന്ധപ്പെട്ട നടപടിക്രമങ്ങളെപ്പറ്റി ആലോചിക്കണമെന്നും സംസ്ഥാന സര്‍ക്കാരിനെ കേന്ദ്രജലകമ്മീഷന്‍ അറിയിച്ചിരുന്നു. ജൂണില്‍ മണ്‍സൂണ്‍ ശക്തിപ്രാപിച്ചതോടെ തന്നെ ഡാമുകള്‍ സംബന്ധിച്ച മുന്നറിയിപ്പ് കൈമാറിയെന്നും ജലകമ്മീഷന്‍ അറിയിച്ചു.
രാജ്യത്തെ മറ്റെല്ലാ സംസ്ഥാനങ്ങളിലുമുള്ള പ്രളയ മുന്നറിയിപ്പ് കേന്ദ്രം സ്ഥാപിക്കാത്ത ഏക സംസ്ഥാനം കേരളമാണെന്ന് ജലകമ്മീഷന്‍ കുറ്റപ്പെടുത്തി. ഏഴുവര്‍ഷം മുമ്പ് തന്നെ പ്രളയ മുന്നറിയിപ്പ് കേന്ദ്രം സംസ്ഥാനത്തിന് അംഗീകരിക്കാന്‍ ധാരണയായതാണ്. എന്നാല്‍ ഇതാവശ്യമില്ലെന്നായിരുന്നു സംസ്ഥാനത്തിന്റെ നിലപാട്. ഇപ്പോഴുണ്ടായ പ്രളയത്തിന്റെ സാഹചര്യത്തില്‍ വീണ്ടും കേന്ദ്രം അനുവദിച്ചിട്ടുണ്ട്. എന്നാല്‍ ഇപ്പോഴും നിഷേധാത്മക സമീപനമാണ് കേരളം സ്വീകരിക്കുന്നത്, ജല കമ്മീഷന്‍ കുറ്റപ്പെടുത്തി.
2011 ഒക്ടോബറിലാണ് കൊച്ചിയിലെ ഹൈഡ്രോളജിക്കല്‍ ഒബ്‌സര്‍വേഷന്‍ സ്‌റ്റേഷനെ പ്രളയ മുന്നറിയിപ്പ് കേന്ദ്രമാക്കി മാറ്റാന്‍ തീരുമാനിച്ചത്. എന്നാല്‍ കേരളം താല്‍പ്പര്യമെടുത്തില്ല. ഇതേ തുടര്‍ന്ന് കേരളത്തിന് അനുവദിച്ച കേന്ദ്രം തമിഴ്‌നാട് നേടിയെടുക്കുകയായിരുന്നു.
